Հինգշաբթի, 7 Դեկտեմբերի 2017 19:36

Արմինֆո. Նաիրա Բադալյան: Դեկտեմբերի 7-ի հերթական նիստում կառավարությունը հաստատել է Իրանի հետ սահմանին «Մեղրի՚ ազատ տնտեսական գոտու ստեղծման մասին որոշման նախագիծը: ԱՏԳ կազմակերպիչ է ճանաչվել կառավարության կողմից հիմնադրված «Մեղրի՚ ազատ տնտեսական գոտի» փակ բաժնետիրական ընկերությունը:

 

Ինչպես հաղորդել է տնտեսական զարգացման և ներդրումների նախարար Սուրեն Կարայանը, արդեն ավարտվել են ԱՏԳ գործունեության համար անհրաժեշտ ենթակառուցվածքների ստեղծման աշխատանքները: «Այս որոշմամբ սկիզբ կդրվի ԱՏԳ գործունեությանը՚, - հայտարարել է նախարարը: Նրա ասելով, գոտին կզարգանա փուլ առ փուլ: Երկրորդ և ավարտական փուլում ԱՏԳ տարածքը կկազմի 70 հա: Ակնկալվում է, որ առաջիկա տարիներին ԱՏԳ կներառի 50-70 ընկերություն, որոնք կիրականացնեն շուրջ 130-150 մլն դոլարի ներդրումներ: Կստեղծվի մոտ 1500 նոր աշխատատեղ: Արտահանման ծավալը կկազմի 350 մլն դոլար: Ավելի վաղ ՏԶՆՆ մամուլի ծառայությունը հաղորդել էր, որ  «Մեղրի՚  ԱՏԳ առաջին փուլի բացումը նախատեսվում է դեկտեմբերի 15-ին:

 

Հիշեցնենք, որ «Մեղրի՚ ԱՏԳ կառուցման ընդհանուր արժեքը գնահատվում է 32 մլն դոլար, որից 28 մլն կապիտալ ծախսերն են: Իրանի հետ սահմանին ԱՏԳ կառուցումը ՀՀ կառավարության առաջնային ներդրումային ծրագրերից մեկն է և նախատեսում է 10-15 հա մակերեսով ազատ տնտեսական գոտու ստեղծում` մինչև 45-50 հա հետագա ընդլայնման հնարավորությամբ: Չնայած այն հանգամանքին, որ ԱՏԳ դեռ կառուցված չէ, արդեն տարբեր ընկերություններից ԱՏԳ հետ աշխատանքին մասնակցելու բազմաթիվ հայտեր են ստացվել: Խոսքը վերաբերում է Ռուսաստանի 10-ից ավելի ընկերությունների, կան ընկերություններ Իրանից ու Եվրոպայից: Տնտեսական զարգացման և ներդրումների նախարարության գնահատմամբ, ԱՏԳ շահագործումը թույլ կտա ստեղծել 2,5 հազար աշխատատեղ և 30 տոկոսով ավելացնել արտահանումը Հայաստանից: ԱՏԳ ստեղծման հիմնական նպատակն Իրանի և տարածաշրջանի այլ երկրների հետ առևտրատնտեսական հարաբերությունների զարագցումն է, Սյունիիք մարզի զարգացումը, ինչպես նաև Հայաստանի դիրքավորումը որպես Իրանը ԵԱՏՄ երկրների և Վրաստանի հետ կապող օղակ: Ենթադրվում է, որ այնտեղ կգործի 100-120 ընկերություն, որոնց շահույթը 10 տարում կկազմի 52 մլն դոլար: Արտադրված արտադրանքը նախատեսվում է արտահանել Իրան, ԵԱՏՄ երկրներ, Մերձավոր արևելք, Թուրքմենստան և այլ երկրներ: 10 տարվա ընթացքում բոլոր ընկերությունների ներդրումների ընդհանուր ծավալը նախատեսվում է հասցնել մինչև 350-400 մլն դոլար: ԱՏԳ գոտու գործունեությունն արդեն ամրագրված է ԵԱՏՄ մաքսային օրենսդրությունում: ԵԱՏՄ-ում  duty-free համակարգով կգործի այդպիսի յոթ գոտի: