«ԱԳԲԱ Լիզինգ՚ ընկերությունը և «Սեմինա Քընսալթինգը՚ բարենպաստ պայմաններ են ստեղծում գինեգործների համար

Արմինֆո.«ԱԳԲԱ Լիզինգ՚ ընկերությունը (http://www.acbaleasing.am/) և «Սեմինա Քընսալթինգ» խորհրդատվական ընկերությունը (http://semina.am/) Հայաստանի գինեգործների համար բարենպաստ պայմանների ստեղծման գործում համագործակցության շուրջ հուշագիր են ստորագրել: Ինչպես ԱրմԻնֆո-ին հաղորդեցին ընկերության մամուլի ծառայությունից, փաստաթուղթն ստորագրել են «ԱԳԲԱ Լիզինգի՚ գլխավոր տնօրեն Արսեն Բազիկյանն ու «Սեմինա Քընսալթինգի՚ գործադիր տնօրեն Վահե Քեուշգուերյանը:

«Այժմ «ԱԳԲԱ Լիզինգը՚ մշակում է նոր, ավելի ճկուն ֆինանսական գործիքներ, որոնք լիզինգի միջոցով նոր հնարավորություններ կտան մեր գինեգործներին՝ ավելի հեշտ իրագործել իրենց նախագծերը և մտահաղացումները։ Շատ ենք կարևորում «ՍԵՄԻՆԱ ՔԸՆՍԱԼԹԻՆԳԻ» հետ համագործակցությունը, քանի որ նրանց գինեգործության և մեր ֆինանսական ոլորտում տարիների ընթացքում կուտակած լավագույն փորձի համադրությունը թույլ կտա տեղական գինեգործներին աջակցել բիզնես գործունեության ամբողջ շղթայի ընթացքում», - նշել է «ԱԳԲԱ Լիզինգի՚ գլխավոր տնօրեն Արսեն Բազիկյանը:

«Բարձրակարգ գինի կարելի է պատրաստել միայն որակյալ խաղողից։ Ֆերմերն այն մարդն է, ով հասկանում է այս հողի ներուժը։ Հետևաբար, առաջին հերթին պետք է ներդրումները սկսել ֆերմերներից: Նախագծի ընթացքում նախատեսվում է գինեգործության վերաբերյալ մասնագիտական խորհրդատվություն տրամադևրել ֆերմերներին, միաժամանակ աջակցել իրենց սեփական բիզնեսը հիմնելու ճանապարհին», - հավելել է «Սեմինա Քընսալթինգ» տնօրեն Վահե Քեուշգուերյանը։

«Սեմինա Քընսալթինգ» ընկերությունը Հայաստանում խորհրդատվական ծառայություններ է առաջարկում գինեգործության բնագավառում, ինչպես նաև աջակցում է գինեգործներին ռազմավարական զարգացման և մարքեթինգային կառավարման առումով: Ընկերության նպատակն է զարգացնել գինու մշակույթը և արդիականացնել գինեգործության արագ աճող ոլորտը: Վահե Քեուշգուերյանը` «Սեմինա Քընսալթինգի՚ հիմնադիրը, 1990 թվականից աշխատում է գինեգործության ոլորտում:

ԱԳԲԱ Լիզինգը 2003թ-ին Հայաստանի Հանրապետությունում հիմնադրված առաջին լիզինգային ընկերությունն է, որի բաժնետերերն են ֆրանսիական «Կրեդիտ Ագրիկոլ Լիզինգ և Ֆակտորինգ» մասնագիտացված ընկերությունը և ԱԿԲԱ-ԿՐԵԴԻՏ ԱԳՐԻԿՈԼ Բանկը: ԱԳԲԱ Լիզինգը Հայաստանում լիզինգի բացարձակ առաջատարն է՝ շուկայի մոտ 80% մասնաբաժնով:

ԱրմԻնֆո ԼԳ պատրաստած «Հայաստանի բանկերի և վարկային ընկերությունների ֆինանսական վարկանիշի՚ տվյալների համաձայն, լիզինգային գործառնությունների ծավալը 2016 թվականին ավելացել է 11%-ով` կազմելով 16.7 մլրդ դրամ: «ԱԳԲԱ Լիզինգ՚ ընկերության գործառնությունների ծավալը 2017 թվականի հունվարի 1-ին կազմել է 13.1  մլրդ դրամ` 12% աճով: Բանկերի և վարկերի լիզինգային գործառնությունների ընդհանուր ծավալում «ԱԳԲԱ Լիզինգի՚ բաժինը  78,5%.