Չորեքշաբթի, 13 Դեկտեմբերի 2017 14:44

Արմինֆո.Երկարաձգելով ԱԷԿ երկրորդ էներգաբլոկի շահագործման ժամկետը` Հայաստանը ժամանակ կունենա կողմնորոշվելու նոր միջուկային էներգաբլոկի տեխնոլոգիաների և հզորությունների առնչությամբ: ԱրմԻնֆո-ի հետ հարցազրույցում այդպիսի կարծիք է հայտնել էներգետիկ ենթակառուցվածքների և բնական պաշարների փոխնախարար Հայկ Հարությունյանը` մեկնաբանելով ՀԱԷԿ փակմանն առնչվող ԵՄ պահանջի վերաբերյալ հարցը:

 

Փոխնախարարի ասելով, ՀԱԷԿ գործող բլոկն, անկասկած, չի կարող գործել հավերժ: Հայկական կողմը, ԵՄ հետ համապարփակ և ընդլայնված գործընկերության շուրջ համաձայնագրին համապատասխան, որն ստորագրվել է նոյեմբերի 24-ին Բրյուսելում, ստանձնել է բլոկը շահագործումից հանելու, այլ ոչ թե ԱԷԿ փակման «ճանապարհային քարտեզ՚ մշակելու պարտավորություն, ինչպես երբեմն ներկայացնում են ԶԼՄ-ները: «Այսօր ՀԱԷԿ երկրորդ էներգաբլոկի շահագործման ժամկետի երկարաձգման նախագծի իրագործման գործում զգալի ֆինանսական ռեսուրսներ են ներդրվում, որպեսզի, մի կողմից, հանրապետությունն ապահովվի անհրաժեշտ ծավալի և մատչելի գնով էլեկտրաէներգիայով, իսկ մյուս կողմից, բարձրացվի դրա անվտանգության մակարդակը՚, - նշել է փոխնախարարը, հավելելով, որ բլոկի ռեսուրսն սպառվելուց հետո այն կկանգնեցվի: «Սակայն այն կկանգնեցվի միայն այն դեպքում, եթե ստեղծվեն անհրաժեշտ փոխարինող հզորություններ, ինչի մասին, ըստ էության, ասվում է փաստաթղթում՚, - հաղորդել է Հայկ Հարությունյանը: Նա նաև նշել է այն փաստը, որ ատոմային էներգետիկայի շուկան ակտիվորեն զարգանում է: «Մենք կփորձենք գտնել առավելագույնս հաջող լուծում թե էներգետիկայի, թե Հայաստանի տնտեսության համար՚, - ամփոփել է փոխնախարարը:

 

Ավելի վաղ մամուլի ասուլիսում էներգետիկ ենթակառուցվածքների և բնական պաշարների նախարար Աշոտ Մանուկյանը նշել էր, որ ՀԱԷԿ երկրորդ էներգաբլոկը կաշխատի այնքան, որքան թույլ տա ռեսուրսը: Միայն դրանից հետո այն կփակվի, և փոխարենը նոր ատոմային բլոկ կկառուցվի: Նախարարը նշել էր, որ ՀՀ կառավարությունը և իր գլխավորած գերատեսչությունը հակվում են 50 ՄՎտ հզորությամբ մոդուլային ատոմային ռեակտորների կառուցման նախագծերին: Այժմ դրանք փորձարկման փուլում են և, ինչպես ակնկալվում է, կկառուցվեն առաջիկա երկու տարվա ընթացքում; Այդ պատճառով Հայաստանի կառավարությունը 2 տարով հետաձգել է նոր ատոմային բլոկի հզորության հարցի քննարկումը:

 

Հիշեցնենք, որ ՀԱԷԿ երկու էներգաբլոկները զինված են ռուսական առաջին սերնդի ВВЭР-440 ռեակտորներով: Առաջին բլոկը շահագործման է հանձնվել 1976 թվականին, երկրորդը` 1980 թվականին: 1989 թվականի մարտին, Սպիտակի ավերիչ երկրաշարժից հետո, կայանի աշխատանքը դադարեցվել էր: 1995 թվականի նոյեմբերին էներգետիկ սուր ճգնաժամի առնչությամբ ՀԱԷԿ 407,5 ՄՎտ հզորությամբ երկրորդ էներգաբլոկը վերագործարկվեց: 2014 թվականի մարտին ՀՀ կառավարությունը որոշում կայացրեց երկրորդ էներգաբլոկի շահագործման ժամկետը 10 տարով երկարաձգելու մասին: Նախագծի համակարգումն իրականացնում է «Ռոսատոմի՚ դուստր կառույց «Ռուսատոմ սերվիս՚ ԲԸ: Աշխատանքների ավատրը նախատեսվում է 2019 թվականին: Ռուսաստանի կառավարությունը ՀԱԷԿ շահագործման ժամկետի երկարաձգման համար Հայաստանին 270 մլն դոլարի վարկ է տրամադրել` 15 տարվա ընացքում մարման պայմանով` 3%  տարեկան տոկոսադրույքով: Բացի այդ, նույն նպատակների համար Ռուսաստանի Դաշնությունը 30 մլն դոլարի դրամաշնորհ է տրամադրել Հայաստանին: Ծրագրի իրագործման նպատակով 2015 թվականի մարտին ստեղծվել է համատեղ համակարգման կոմիտե, որն առ այսօր հինգ նիստ է անցկացրել: