Հայկական օրգանական գյուղատնտեսական արտադրանքը ներկայացվել է Դուբայում` «Organic & Natural Expo Middle East» մասնագիտացված ցուցահանդեսին

Արմինֆո. Առաջին անգամ «ORGANIC ARMENIA» («Օրգանական Հայաստան») համատեղ տաղավարով Հայաստանի 12 ընկերություններ ներկայացրել են իրենց հավաստագրված ՕՐԳԱՆԱԿԱՆ և բնական արտադրանքը Դուբայում կազմակերպված «Organic & Natural Expo Middle East» ցուցահանդեսին, որն ընթացել է  2017 թվականի դեկտեմբերի 11-13-ը: Այն իր տեսակով միակն է Մերձավոր Արևելքի և Հյուսիսային Աֆրիկայի տարածաշրջանում:

Հայաստանյան ընկերությունների մասնակցությունը հնարավոր դարձավ շնորհիվ «Օրգանական գյուղատնտեսության աջակցության նախաձեռնություն՚ (ՕԳԱՆ) ծրագրի, որը ֆինանսավորվում է Եվրոպական միության և համաֆինանսավորվում ու իրականացվում է Ավստրիական զարգացման գործակալության (ԱԶԳ) կողմից, ՀՀ գյուղատնտեսության նախարարության և ՓՄՁ ԶԱԿ-ի հետ սերտ համագործակցությամբ: Իրենց օրգանական արտադրանքի մատակարարման շղթաները և հարակից առևտրային հոսքերը ընդլայնելու նպատակով ՕԳԱՆ ծրագիրը աջակցում է արտադրողներին հաստատել գործնական կապեր և գտնել արտահանման շուկաներ:

«Հայաստանի համար սա եզակի առիթ է Մերձավոր Արևելքի շուկային ներկայացնելու «Բնական՚ և «Օրգանական՚ («Էկո՚, «Բիո՚) մակնշմամբ իր լավագույն գյուղատնտեսական արտադրանքը և ցուցադրելու հայկական բնության հարստությունները, այն է՝ մեղրի, չորացրած մրգերի, խոտաբույսերի և հյութերի բազմազանությունը՚, - ասվում է ՕԳԱՆ-ի հաղորդագրությունում:

Սեպտեմբերի 11-ին Երևանում «Օրգանական գյուղատնտեսության ամիսի՚ մեկնարկին, որն իրականացվում է «Օրգանական գյուղատնտեսությանն աջակցության նախաձեռնության՚ շրջանակում, Հայաստանում ԵՄ պատվիրակության ղեկավար, դեսպան Պյոտր Սվիտալսկին հայտարարել էր եվրոպական շուկայում հայկական օրգանական գյուղատնտեսական արտադրանքի համար մեծ հեռանկարների մասին, քանի որ այն որակյալ է և համեղ: Դեսպանի ասելով, այսօր աշխարհի օրգանական արտադրանքի շուկայում վիթխարի մրցակցություն է: 2015 թվականի վերջին համաշխարհային օրգանական հանդավարների մակերեսը հասել է 12,7 մլն հա, որից 11,2 մլն հա` ԵՄ-ում: ԵՄ օրգանական մանրածախ շուկայի ընդհանուր արժեքը կազմում է 24 մլրդ եվրո: Այդուհանդերձ, ԵՄ Հայաստանում վիթխարի ներուժ է տեսնում օրգանական գյուղատնտեսության զարգացման համար: Ինչպես կարծում է դեսպան Սվիտալսկին, Հայաստանի օրգանական գյուղատնտեսությունը կարող է լիակատար հաջողությամբ իր շեմն զբաղեցնել եվրոպական շուկայում, քանի որ որակյալ է և համեղ` իր մրցակցային առավելությունների` արևի, բնահողի և կլիմայի շնորհիվ:

«Օրգանական գյուղատնտեսության աջակցության նախաձեռնություն՚ եռամյա ծրագիրը, որը ֆինանսավորում է Եվրամիությունը`  Ավստրիական զարգացման գործակալության համաֆինանսավորմամբ, ունի 3.3 մլն եվրո ընդհանուր բյուջե (1,1 մլն` ֆերմերներին աջակցության տեսքով, մնացածը` նրանց հմտությունների զարգացման): Այն մեկնարկել է 2015 թվականի սեպտեմբերին և կոչված է բացահայտելու Հայաստանի ներուժը օրգանական գյուղատնտեսության ոլորտում: Ծրագիրն ունի 4 հիմնական բաղադրիչ. օրենսդրական դաշտի բարեփոխում և համապատասխան ինստիտուտների ստեղծում, աջակցություն այն անձանց, որոնք ցանկանում են զբաղվել օրգանական գյուղատնտեսությամբ, իրազեկման մակարդակի բարձրացում, արտաքին շուկաների որոնում: Ծրագրի շրջանակում Հայաստանի գրեթե բոլոր մարզերից 18 ֆերմերային տնտեսություններ արդեն ստացել են ֆինանսական աջակցություն, իսկ 28-ը` տեխնիկական աջակցություն :