Բաքուն փորձում է ճնշում գործադրել Թբիլիսիի վրա Հայաստանին դեպի Ռուսաստան այլընտրանքային ճանապարհի հնարավոր տրամադրման հարցում

Արմինֆո.Բաքուն փորձում է ճնշում գործադրել Թբիլիսիի վրա Հայաստանին դեպի Ռուսաստան այլընտրանքային ճանապարհի հնարավոր տրամադրման հարցում: Հայաստանին Վրաստանի տարածքով դեպի Ռուսաստան այլընտրանքային ճանապարի հնարավոր տրամադրման վերաբերյալ Վրաստանի վարչապետ Գեորգի Կվիրիկաշվիլիի հայտարարությունը հարուցել է Ադրբեջանի խորհրդարանի բողոքը:

Ադրբեջանական ԶԼՄ-ների համաձայն՝ Միլլի Մեջլիսի պատգամավորներն առաջարկել են Վրաստանի դեսպանին հրավիրել երկրի ԱԳՆ՝ բացատրություններ պահանջելու և պաշտոնական բողոք հայտնելու նպատակով: Ադրբեջանի խորհրդարանում համոզված են, որ Ադրբեջանը չպետք է այդ հարցին վերաբերվի այնպես՝ կարծես ոչինչ տեղի չի ունեցել՝ հատկապես հաշվի առնելով Ադրբեջանի և Վրաստանի միջև գոյություն ունեցող խոշոր նախագծերը:

Նշենք, որ Վրաստանի կառավարությունը պայմանագիր է ստորագրել շվեյցարական «SGS» ընկերության հետ՝ անհրաժեշության դեպքում Ցխինվալով /Հարավային Օսիա» դեպի Ռուսաստան բեռների փոխադրման նապատակով: Վրաստանի վարչապետ Գեորգի Կվիրիկաշվիլին ասել է, որ եթե Կազբեկ-Վերին Լարս անցակետում արտակարգ իրավիճակ ստեղծվի, բեռները կարող են տեղափոխվել նշած երթուղով: «Այդ պայմանագրի ոչ մի հոդված Վրաստանի շահերի դեմ ուղղված չէ: Այդ միջանցքից կարող են օգտվել թե Թուրքիան, թե Հայաստանը, ինչպես նաև այլ երկրներ, որոնք օգտվում են մեր երկրի տարանցիկ հնարավորություններից: Բայց առայժմ դա միայն միակողմանի ստորագրում է: Մենք շարունակում ենք բանակցությունները, քանի որ ռուսական կողմը որոշակի պայմաններ է առաջ քաշում, որոնք անընդունելի են մեզ համար»,- խորհրդարանում իր ելույթում ասել է Կվիրիկաշվիլին:

Հատկանշական է, որ դեկտեմբերի 25-26-ը Հայաստանի նախագահի Վրաստան պաշտոնական այցից հետո ԶԼՄ-ներում տեղեկություն էր հայտնվել, որ Հայաստանի առաջնորդը բարձրացրել է Սուխում-Զուգդիդի-Երևան երկաթուղային հաղորդակցություն հաստատելու հարցը: Այդ տեղեկատվության պաշտոնական հաստատում կամ հերքում չի եղել:

Հիշեցնենք, որ «Վերին Լարս» անցակետը, որը գտնվում է ռուս-վրացական սահմանի վրա, անցյալ դարի 90-ականներից դարձավ Հայաստանը Ռուսաստանին կապող միակ ցամաքային ճանապարհը: Անցակետը պարբերաբար փակվում է՝ ձմռան շրջանում ձնահոսքերի, իսկ գարնանը ջրհեղեղների պատճառով: ՀՀ տրանսպորտի և կապի նախկին նախարար Գագիկ Բեգլարյանը դեռ 2016-ի ամռանն ասել էր, որ Հարավային Օսիայի տարածքով ճանապարհի բացումը հնարավոր է:

Հիշեցնենք, որ 2013-ի հունվարին Վրաստանի վարչապետ Բիձինա Իվանիշվիլին հնարավոր էր համարել ռուս-հայկական երկաթուղու վերաբացումը, որն անցնում է Աբխազիայի տարածքով: Այն ժամանակ Բիձինա Իվանիշվիլին հայտարարել էր, որ բոլոր կողմերի համաձայնության դեպքում հնարավոր կլինի վերաբացել երկաթուղին: Բրիտանական International Alert ոչ կառավարական կազմակերպության հետազոտությունների համաձայն,  1991 թվականից ի  վեր չգործող Երևան-Թբիլիսի-Սուխում-Սոչի երկաթուղու վերակառուցումը կարժենա  277,5 մլն դոլար, որը կհաջողվի վերադարձնել 100 տարուց ոչ շուտ: 251 մլն դոլար պահանջվում է Փսոու-Ինգուր 190 կմ աբխազական հատվածի  վերականգնման համար: Իսկ Զուգդիդից Թբիլիսի և այնուհետև մինչև Երևան երկաթուղին աշխատում է: Ուշագրավ է, որ  աբխազ փորձագետների պաշտոնական եզրակացությունների համաձայն, այդ գումարը կազմում է 350-400 մլն դոլար, մինչդեռ նրանց վրացի գործընկերները կարծում են, որ դրա համար կպահանջվի 73 մլն դոլարից ոչ ավելի: