Երկուշաբթի, 22 Հունվարի 2018 17:19

Արմինֆո. Եվրասիական տնտեսական միության տրամաբանությունը Հայաստանի համար շատ հասկանալի է և պրագմատիկ: Այդ մասին «Ռիա Նովոստի»-ին հարցազրույցում հայտարարել է վարչապետ Կարեն Կարապետյանը: Նրա խոսքով, Եվրասիական ինտեգրացիոն նախագիծն ընդլայնել է հանրապետության տնտեսական սահմանները՝ ստեղծելով տարողունակ, մոտ 180 միլիոնանոց շուկա՝ առանց մաքսային սահմանների: ԵԱՏՄ շրջանակներում ինտենսիվորեն քննարկվում են Չինաստանի, Իրանի, Հնդկաստանի, Սինգապուրի և այլ երկրների հետ համագործակցության հարցերը:

Ինչպես նշել է Հայաստանի կառավարության ղեկավարը, այսօր Հայաստանն ունի զարգացող տնտեսություն, որն արձագանքում է հաճախ անկանխատեսելի համաշխարհային փոփոխություններին: «2017 թվականի վերջնական տվյալները կհրապարակվեն այս ամիս ավելի ուշ, սակայն արդեն հիմա կարող եմ վստահաբար ասել, որ տնտեսական աճը կլինի ավելին, քան ենթադրվում էր 2016 թվականին»,- հայտարարել է վարչապետը:

Ինչպես գտնում է Կարեն Կարապետյանը, բարենպաստ ներդրումային և բիզնես միջավայրը թույլ կտա Հայաստանին մեկնարկային հարթակ դառնալ ռուսաստանցի ձեռներեցների համար՝ նոր շուկաներ մուտք գործելու նպատակով: Հայաստանն առևտրի արտոնյալ ռեժիմ ունի ԱՄՆ-ի, Կանադայի, Շվեյցարիայի, Նորվեգիայի և Ճապոնիայի հետ: Հայաստանը նաև GSP+ արտոնությունների համընդհանուր համակարգից օգտվող 10 երկրներից մեկն է, ինչը թույլ է տալիս արտոնյալ պայմաններով ԵՄ արտահանել մեր երկրում արտադրված շուրջ 6.400 անուն ապրանք: 2018 թվականի հունվարից Հայաստանը դարձել է REX համակարգի անդամ, ինչը նշանակում է, որ 2018 թվականից սկսած՝ կազմակերպությունները, մեկ անգամ գրանցվելով էլեկտրոնային համակարգում, այլևս  պարտավոր չեն լինի յուրաքանչյուր խմբաքանակի համար ծագման հավաստագիր ստանալ և կկարողանան արտահանել ապրանքները ԵՄ՝ օգտվելով ոչ միայն զրոյական դրույքաչափով մաքսային տուրքերից, այլև ավելի քիչ գումար ծախսել հավաստագրի համար:

Բացի այդ, ինչպես հիշեցրել է Կարեն Կարապետյանը, անցած տարվա վերջին Մեղրիում սկսել է գործել ազատ տնտեսական գոտի: «Կարծում ենք, որ այդ ԱՏԳ-ն լավ հարթակ է ռուսական բիզնեսի և կապիտալի համար, որը հետաքրքրված է Իրանով: «Մենք շատ բաց ենք այդ առումով և պատրաստ ենք համագործակցել՝ ոչ միայն ազատ տնտեսական գոտում ռուսական կապիտալի տեղակայման, այլև համատեղ ներդրումային համագործակցության իրավունքով»,- հայտարարել է նա՝ նշելով, որ ազատ տնտեսական գոտին կոչված է նպաստելու արտահանման ծավալների աճին և նոր աշխատատեղերի ստեղծմանը, ինչպես նաև ուղիղ օտարերկրյա ներդրումների ինտեգրման և առաջատար տեխնոլոգիաների ներդրման միջոցով կայուն տնտեսական զարգացման ապահովմանը:

Ազատ տնտեսական գոտին, լինելով ԵԱՏՄ-Իրան ցամաքային գոտում միակը, թույլ է տալիս օգտվել 80 միլիոնանոց իրանական շուկայի հնարավորություններից՝ հիմքեր ստեղծելով համատեղ ձեռնարկությունների ձևավորման համար: Կարեն Կարապետյանի կարծիքով, ԵԱՏՄ երկրները, այդ թվում և ռուսաստանցի ձեռներեցները, կարող են օգտվել ազատ տնտեսական գոտու հնարավորություններից և Իրան արտահանել ապրանքների խոշոր խմբաքանակներ, իսկ իրանական կողմն՝ արտոնյալ պայմաններով արտահանել իր ապրանքները ԵԱՏՄ և այլ երկրներ: «Հայաստանը, լինելով ԵԱՏՄ անդամ և ունենալով ԵՄ-ի հետ արտոնյալ առևտրային ռեժիմ, Իրանի հետ ընդհանուր սահման, ինչպես նաև գրավիչ ներդրումային և բիզնես միջավայր, Իրանի հետ սահմանին ազատ տնտեսական գոտու առկայության պայմաններում կարող է լուրջ հետաքրքրություն ներկայացնել արտահանման կողմնորոշում ունեցող արտադրությունների համար՝ օգտագործելու Հայաստանի առևտրային և լոգիստիկ հնարավորությունները՝ պայմանավորված վերջինիս աշխարհագրական դիրքով»,- ասել է վարչապետը:  

Հիշեցնենք, որ Հայաստանը ԵԱՏՄ լիարժեք անդամ է դարձել 2015 թվականին: Չնայած այն բանին, որ ինչպես Հայաստանում, այնպես էլ Ռուսաստանում պաշտոնյաները բազմիցս հայտարարել են Միությանը ՀՀ անդամակցության առավելությունների մասին, դրա ընդդիմախոսները նշում են բազմաթիվ բացասական գործոններ՝ առաջին հերթին շատ ապրանքների գների բարձրացում: Ավելի վաղ «Ելք՚ խորհրդարանական խմբակցությունը հանդես էր եկել Հայաստանի մասով ԵԱՏՄ մասին պայմանագրի գործողությունը դադարեցնելու գործընթաց սկսելու օրենսդրական նախաձեռնությամբ՝պատճառաբանելով, որ ԵԱՏՄ-ին անդամակցելու արդյունքում Հայաստանի սոցիալ-տնտեսական մի շարք ոլորտներում տեղի է ունեցել էական հետընթաց, նաև չի ամրապնդվել երկրի անվտանգությունը: