Արսեն Հարությունյան. Վեդիի ջրամբարի և ոռոգման համակարգի կառուցման նախագիծը կհաձնվի կես տարի շուտ` մինչև 2020 թվականի դեկտեմբեր

Արմինֆո. Վեդիի ջրամբարի և ոռոգման համակարգի շինարարությունն ընթանում է ժամանակացույցի գերազանցմամբ: «Եթե շինարարության տեմպերը չնվազեն, նախագիծը կհանձնվի կես տարի շուտ, քան նախատեսվում էր, մինչև 2020 թվականի դեկտեմբեր, այլ ոչ թե` 2021 թվականի մայիսին՚, - հայտարարել է Հայաստանի ջրային տնտեսության պետական կոմիտեի ղեկավար Արսեն Հարությունյանը` փետրվարի 6-ին լրագրողների հետ հանդիպմանը:

Հարությունյանի ասելով, այս ձմեռը բարենպաստ չէր ջրամբարներում ջրի կուտակման առումով, սակայն եղանակային պայմանները բարենպաստ էին շինարարների համար, ինչի արդյունքում աշխատանքները ոչ մի րոպե կանգ չեն առել: Առաջիկա մայիսից կսկսվի 85 մ  բարձրությամբ պատվարի շինարարությունը: Ինչպես նշել է Ջրային տնտեսության պետական կոմիտեի ներկայացուցիչը, փետրվարի 6-ի դրությամբ շինարարությունում աշխատում է 200 մարդ և 100 միավոր շինտեխնիկա: Բացի այդ, եթե ի սկզբանե ջրամբարի ընդհանուր տարողունակությունը նախատեսվում էր 29 մլն խմ` 120 հա մակերեսով, անցկացված աշխատանքների արդյունքում և առանց լրացուցիչ ծախսի ջրի ծավալը կհասցվի մինչև 31 մլն խմ: Թիվը նախնական է և, հնարավոր է, անգամ, ավելացվի, նշել է Ջրային տնտեսության կոմիտեի ղեկավարը:

Վեդիի ջրամբարի կառուցման ծրագիրը, որը կապահովի Արարատյան դաշտավայրի 7500 հա հողերի հուսալի ոռոգումը, կարժենա շուրջ 90 մլն  եվրո:  75 մլն եվրո Ֆրանսիական զարգացման գործակալության վարկն է, 15 մլն եվրո` զուգահեռ ֆինանսավորում Հայաստանի պետական բյուջեից: Շինարարական աշխատանքները մեկնարկել են 2017 թվականի մարտին: Նախագծի իրագործումը նաև կարևոր նշանակություն կունենա Սևանա լճի էկոհամակարգի հավասարակշռության վերականգնման գործում: Վեդիի ջրամբարի կառուցման արդյունքում «Վեդի՚ և «Արարատ՚ ջրօգտագործողների ընկերությունների կողմից ոռոգվող 2900 հա հողերի մեխանիկական ոռոգումը կփոխարինվի ինքնահոս համակարգով, ինչի շնորհիվ ի հայտ կգա շուրջ 19 մլն կՎտ/ժ էլեկտրաէներգիա խնայելու հնարավորություն, իսկ ոռոգվող հողամասերի մակերեսը կավելանա 300 հա-ով: Ոռոգման ցանցի վերակառուցման և համակարգի արդիականացման արդյունքում կկրճատվեն ջրի կորուստները, ինչպես նաև շահագործման և պաշտպանության ծախսերը: Ներկայում համակարգի կորուստները գնահատվում են 40-50% սահմաններում: Ծրագրի ավարտին այդ կորուստները կկրճատվեն մինչև 15-20%: Որպես արդյունք` ոռոգման նպատակով Սևանա  լճից ջրառը կնվազի մինչև 18 մլն խմ, իսկ Արտաշատի ջրատարից` ավելի քան 11 մլն խմ-ով:

Հիշեցնենք, որ ջրամբարի նախագիծը պատրաստվել է ֆրանսիական «ARTELIA EAU & ENVIRONMENT» և բելգիական «SHER Ingenieurs-Conseils» ընկերությունների կողմից՝ «ՋՐՏՈՒՔ» ՍՊԸ-ի հետ համատեղ: Շինարարությունն իրականացվում է հայկական «Սահակյանշին» և իրանական «Պեգա Քընսթրաքշն» կոնսորցիումի կողմից: