Միացյալ Թագավորությունը և Հայաստանը քննարկում են էներգետիկ ոլորտի մասնագետների վերապատրաստման կենտրոն ստեղծելու հնարավորությունը

Արմինֆո. ՀՀ էներգետիկ ենթակառուցվածքների և բնական պաշարների նախարար Աշոտ Մանուկյանը հանդիպել է Հայաստանում և Վրաստանում Միացյալ Թագավորության առևտրի և ներդրումների հարցերով հանձնակատար Մարկ Փրիթչարդին: Հանդիպմանը մասնակցել է նաև ՀՀ-ում Միացյալ Թագավորության արտակարգ և լիազոր դեսպան Ջուդիթ Ֆարնուորթը:

Ինչպես տեղեկացնում է նախարարության նախարարության մամուլի ծառայությունը, ողջունելով հյուրերին, նախարար Մանուկյանը գոհունակություն է հայտնել էներգետիկայի ոլորտում հայ-բրիտանական համագործակցության ձևավորման վերաբերյալ, համոզմունք հայտնելով, որ այս համագործակցությունը կընդլայնվի և կզարգանա:

Նախարարն անդրադարձել է վերականգնվող էներգետիկայի բնագավառում արտադրական կարողությունների զարգացմանն ուղղված ծրագրերի արդյունավետությանը, մասնավորապես, արևային կուտակիչ կայանների կառուցմանը: Այդ համատեքստում զրուցակիցներին է ներկայացրել նաև «Մասրիկ -1» արևային ֆոտովոլտային կայանի և «Շնող» ՀԷԿ-ի կառուցման ծրագրերը:

Դեսպան Ջուդիթ Ֆարնուորթը նշել է, որ Միացյալ Թագավորության կառավարությունը պատրաստ է խորացնել տնտեսական համագործակցությունը Հայաստանի հետ, պատրաստակամություն հայտնելով ներդրումների ներգրավմանը:

Իր հերթին Մարկ Փրիթչարդը շնորհակալություն է հայտնել նախարարին, ոլորտի ներդրումային ծրագրերը հանգամանալի ներկայացնելու համար և վերահաստատել համագործակցությունը խորացնելու պատրաստակամությունը:

Հանդիպման ընթացքում կարևորվել է էներգետիկայի բնագավառի մասնագետների վերապատրատման նպատակով համատեղ ուսումնական կենտրոնի ստեղծումը:

Կողմերն անդրադարձել են նաև հանքարդյունաբերության ոլորտում իրականացվող օրենսդրական բարեփոխումներին և զարգացման հեռանկարներին:

Խոսելով Արդյունահանող ճյուղերի թափանցիկության նախաձեռնությանը Հայաստանի Հանրապետության անդամակցության մասին, նշվել է, որ Հայաստանում Միացյալ Թագավորության դեպանատան հետ փոխգործակցությունը կնպաստի, որպեսզի 2019 թ. Հայաստանն, անցնելով միջազգային վավերացման գործընթացը, կարողանա ճանաչվել նախաձեռնության ստանդարտներին համապատասխանող երկիր:

Կարևորելով իրականացվող օրենսդրական փոփոխություններն ու քաղաքականության առաջնահերթությունները, Աշոտ Մանուկյանը նշել է. «Առաջիկա 1-2 տարում մենք պետք է հանքարդյունաբերության ոլորտի բացարձակ թափանցիկության հասնենք»:

ՀՀ Ազգային վիճակագրական ծառայության տվյալներով, Մեծ Բրիտանիայից Հայաստան ներդրումների համախառն ներհոսքը 2017-ի հոկտեմբերի 1-ին կազմել է 261.1 մլրդ դրամ կամ $ 545.7 մլն (տարեկան 41.8% աճով), որից ՕՈւՆ - 94.7 մլրդ դրամ կամ $ 197.8 մլն, տարեկան աճը`2.6%): Առանց մարումների, Մեծ Բրիտանիայից ներդրումների ներհոսքը կազմել է 85.6 մլրդ դրամ կամ $ 178.9 մլն (31.1% տարեկան անկում), որից ՕՈւՆ - 52.8 մլրդ դրամ կամ $ 110.5 մլն (տարեկան անկումը`42.2%):