Ինեկոբանկը 2017 թվականին ապահովել է 7 մլրդ. դրամ շահույթ՝ կապիտալի շահութաբերությամբ գրավելով առաջին տեղը

Արմինֆո. «Բանկի հաջողությունները շարունակական են. ճիշտ ընտրված ռազմավարության և դրա քայլ առ քայլ ճիշտ իրագործման արդյունքում ունենք գրեթե բոլոր դիրքերի բարելավում։ Ամենակարևոր ձեռքբերումն, իհարկե, շահույթի բարձր մակարդակն է, 7 մլրդ. դրամ շահույթը ապահովեց համակարգում կապիտալի շահութաբերությամբ առաջին տեղը»,- նշեց բանկի Ֆինանսական տնօրեն Հայկ Ոսկանյանը։

2017 թվականի ընթացքում ակտիվներն աճել են 18%-ով՝ կազմելով 278 մլրդ. ՀՀ դրամ։ Վարկային պորտֆելի և բարձր իրացվելի ակտիվների աճը կազմել է համապատասխանաբար 8% և 30%։

Վարկային պորտֆելը կազմել է 173 մլրդ. ՀՀ դրամ, որից.

-    մանրածախ վարկերի պորտֆելը կազմել է  57 մլրդ. ՀՀ դրամ՝ գրանցելով 15.2% աճ 2016 թվականի նկատմամբ,
-    կորպորատիվ վարկերի պորտֆելը կազմել է 121 մլրդ. դրամ՝ գրանցելով 4% աճ 2016 թվականի նկատմամբ: 

Իրացվելի ակտիվների եւ ընդհանուր ակտիվների հարաբերակցությունը կազմել է 29%։

Պարտավորությունների ծավալը կազմել է 230 մլրդ. դրամ՝ տարեսկզբի նկատմամբ գրանցելով 19% աճ։ Հաճախորդներից ներգրավված միջոցներն աճել են 28%-ով, որի արդյունքում ընդհանուր պարտավորություններում դրանց կշիռը կազմել է 61%։

Հաճախորդներից ներգրավումների ծավալը 2017 թվականի վերջի դրությամբ 141 մլրդ. դրամ է, որի 75%-ը անհատների խնայողություններն են։ 

«Արդյունավետության բարձրացման մեր ջանքերը շարունակական արդյունք են ապահովում. տարվա ընթացքում ծախս/եկամուտ հարաբերակցությունը կրճատվել է 5.6 տոկոսային կետով` կազմելով 34.2%։

Բանկն ակտիվորեն շարունակում է նոր տեխնոլոգիաների օգտագործումն իր գործունեության մեջ, ինչն իր դրական ազդեցությունն է թողնում բանկի տարբեր ցուցանիշների վրա։ 2017 թվականին բարելավվել և արդիականացվել է վարկային սքորինգի համակարգը, ինչի արդյունքում 2017 թվականի չաշխատող վարկերի մեր ցուցանիշը նախորդ տարվա համեմատ բարելավվել է 1.1 տոկոսային կետով, իսկ չաշխատող վարկերի ծածկման գործակիցը աճել է՝ կազմելով 62%։

ԿԲ կողմից սահմանված բոլոր նորմատիվներին համապատասխանում ենք՝ ապահովելով նաև այդ նորմատիվների գծով սահմանված ներքին բուֆերները։ Ինեկոբանկի սեփական կապիտալը 2017 թվականի վերջի դրությամբ կազմել է 48 մլրդ. դրամ, որն ապահովել է կապիտալի 14.6% համարժեքություն` ԿԲ կողմից սահմանված 12%-ի համեմատ։

Բանկի ցուցանիշները թույլ են տալիս դիմակայել շուկայի բոլոր անսպասելի զարգացումներին»,- ավելացրեց Հայկ Ոսկանյանը։

Զուտ տոկոսային եկամուտը 2017 թվականին նախորդ տարվա համեմատ աճել է 13.5%-ով՝ կազմելով 15.7 մլրդ. ՀՀ դրամ։ Ընդհանուր գործառնական եկամտի ծավալը հասել է 19.9 մլրդ. ՀՀ դրամի՝ աճելով 12.4%-ով։

Արժեզրկումից կորուստները բարելավվել են 9.6%-ով՝ կազմելով 4.1 մլրդ. ՀՀ դրամ։ Արդյունքում վարկային ռիսկի ցուցանիշը 0.5 տոկոսային կետով բարելավվել է` կազմելով 2.4%։