«Ինեկոբանկ» ՓԲԸ-ն դարձել է կարգավորվող շուկայի հաշվարկային համակարգի անդամ

Արմինֆո. 2018 թվականի փետրվարի 28-ին «Ինեկոբանկ» ՓԲԸ-ին շնորհվել է «Հայաստանի Կենտրոնական Դեպոզիտարիա» ԲԲԸ (ՀԿԴ) կարգավորվող շուկայի հաշվարկային համակարգի անդամի կարգավիճակ: Ինչպես տեղեկացնում է ՆԱՍԴԱՔ ՕԷՄԷՔՍ Արմենիա բորսայի մամուլի ծառայությունը, այսուհետ Բանկի հաճախորդները կարող են անմիջապես Ինեկոբանկի միջոցով արժեթղթերի գնման և վաճառքի գործառնություններ կատարել ֆոնդային բորսայում: Բանկը համալրել է գործող 18 ԿՇՀՀԱ-ների ցանկը: 

Հիշեցնենք, որ ՀԿԴ-ն 2013թ.-ի մարտից անցում է կատարել դեպոզիտար համակարգի նոր մոդելի, ըստ որի արժեթղթերի ռեեստրի վարման և արժեթղթերի պահառության հետ կապված բոլոր ծառայությունները հաճախորդներին մատուցվում են հաշվի օպերատորների՝ ՀԿԴ-ի հետ համապատասխան պայմանագրեր կնքած ներդրումային ընկերությունների և բանկերի միջնորդությամբ:

Ինեկոբանկը 2014թ.-ի մայիսից հանդիսանում է նաև դեպոզիտար համակարգի հաշվի օպերատոր, ինչը հնարարվորություն է տալիս Բանկին սպասարկելու ՀԿԴ՝ ռեեստրի վարմանն ու արժեթղթերի պահառությանն առնչվող բոլոր ծառայությունները: 

Դեպոզիտար համակարգի Հաշվի օպերատորների և ԿՇՀՀԱ-ների ցանկը, կոնտակտային տվյալները, ինչպես նաև օպերատորների սակագների կանոնները հասանելի են ՀԿԴ պաշտոնական կայքի (www.cda.am) հետևյալ բաժիններում՝ «Դեպոզիտար համակարգի հաշվի օպերատորներ» և «Հաշվարկային համակարգի անդամներ»:

Նշենք, որ «Ինեկոբանկը» հիմնադրվել է 1996 թվականին և համարվում է Հայաստանի ֆինանսական շուկայի ամենաարագ աճող բանկերից մեկը: 2015 թվականի դեկտեմբերին Ինեկոբանկին միացավ ՊրոԿրեդիտ Բանկը: 2015 թվականի դեկտեմբերի 16-ին ՎԶԵԲ-ը գրանցվեց որպես ԻՆԵԿՈԲԱՆԿԻ բաժնետեր: Արդյունքում, ներկայումս Բանկի բաժնետոմսերը տեղաբաշխված են հետևյալ կերպ`Ավետիս Բալոյան – 30.01%, Կարեն Սաֆարյան – 25.93%, ՎԶԵԲ - 22.7%, մնացած ներդրողներ`DEG – 5.75%, IFC – 4.26%: Բանկն ունի 23 մասնաճյուղ, որից 15-ը`Երևանում, իսկ 8-ը`մարզերում:

Ըստ ԱրմԻնֆո գործակալության` Հայաստանի Բանկերի ֆինանսների Վարկանիշի, իր հիմնական ֆինանսական ցուցանիշներով ԻՆԵԿՈԲԱՆԿ-ը գտնվում է առաջատարների հնգյակում: Մասնավորապես, ընդհանուր կապիտալով զբաղեցնում է չորրորդ տեղը, ակտիվներով և պարտավորություններով`5-րդ, արժեթղթերում կատարած ներդրումների ծավալով`երրորդ, իսկ վարկային ներդրումներով`5-րդ տեղը: Բանկի ընդհանուր կապիտալը 2018 թվականի հունվարի 1-ին կազմել է 48,2 մլրդ դրամ, նորմատիվային ընդհանուր կապիտալը`39,7 մլրդ դրամ, ակտիվները` 277.8 մլրդ դրամ: Բանկի կապիտալի համարժեքության նորմատիվը կազմել է 14.55% (պահանջվող նվազագույնը`12%), ընդհանուր իրացվելիություն նորմատիվը`31,52% (15% min), ընթացիկ իրացվելիության նորմատիվը`180,62% (պահանջվողը`60%): Ավելին, բանկի կապիտալի եկամտաբերությունը`ROE = 17,00% (1-ին տեղ),  իսկ ակտիվների շահութաբերությունը`ROA = 2,88% (2-րդ տեղ): Banky 2017 թvakany ez8a3akel 1 7.02 մլրդ դրամի զուտ շահույթով, զբաղեցնելով 2-րդ տեղը: (ՀՀ դրամի հաշվարկային փոխարժեքը 2017 թվականի դեկտեմբերի 31-ի դրությամբ կազմել է 484.10 դրամ / $ 1):