Հինգշաբթի, 22 Մարտի 2018 16:25

Արմինֆո. Հայաստանում ռուսական «Պոլիմետալ» հանքարդյունաբերական ընկերության ներդրումների ծավալը 2017 թվականին կազմել է 24 մլն. դոլար: Ինչպես նշված է ընկերության անցյալ տարվա պաշտոնական հաշվետվության մեջ, ներդրումները հիմնականում ուղղվել են ստորգետնյա արդյունահանման  սարքավորումների ձեռքբերմանը և Սյունիքի մարզի գործող հանքավայրի մոտակայքում  երկրաբանական հետախուզմանը, ինչպես նաև հորատման աշխատանքներին Լիճքվազ-Թեյի հանքավայրում:

Որոշակի կապիտալ ներդրումներ են ուղղվել նաև անվտանգության բարձրացմանը և շրջակա միջավայրի վրա ձեռնարկության ազդեցության նվազեցմանն ուղղված մի շարք նախաձեռնությունների իրականացմանը: Մասնավորապես՝ դա ներառում է հանքի կենտրոնացված օդափոխման նոր համակարգը, պոչամբարի մոդերնիզացումը, ջրի կրկնակի օգտագործման համար նախապատրաստման և մաքրման կայանները:

Ընդհանուր առմամբ, 2016-2017 թվականներին «Պոլիմետալի» ներդրումների գումարային ծավալը Սյունիքի մարզում կազմել է մոտ 37 մլն դոլար: Ինչպես ասվում է ընկերության հաղորդագրության մեջ, նրան պատկանող Կապանի լեռնահարստացման կոմբինատում 2017 թվականին արտադրությունը ոսկու համարժեքով 2016 թվականի համեմատ աճել է գրեթե երկու անգամ և կազմել 1.6 տոննա ոսկու համարժեք: Լավ օպերացիոն ցուցանիշները կապված են վերամշակման ծավալների աճի և հանքաքարի պարունակության բարելավման հետ, ստորգետնյա հանքի արտադրողականության և կորզման մակարդակի բարձրացմանն ուղղված շարունակական միջոցառումների ներդրման ֆոնին: Մեկ ունցիա ոսկու համարժեքի դրամական ծախսերը կազմել են 871 ԱՄՆ դոլար, այն դեպքում, երբ խմբի ձեռնարկությունների միջին ցուցանիշը 658 ԱՄՆ դոլար է:

Կապանի լեռնահարստացման կոմբինատի ցուցանիշը նախորդ տարվա համեմատ բարելավվել է 3%-ով, ձեռնարկության արտադրական և ֆինանսական առողջացման, ինչպես նաև ստորգետնյա լեռնային աշխատանքներում նեղ հատվածների շարունակական վերացմանն ուղղված միջոցառումների իրականացման շնորհիվ: Ընդ որում, վերամշակող ֆաբրիկայի առկա հզորությունների բեռնման նպատակով ձեռնարկությունը գնել է ավելի թանկ կողմնակի հանքաքար:

2017 թվականին Կապանի ԼՀԿ հասույթը կազմել է 66 մլն դոլար, ճշգրտված EBITDA կազմել է 20 մլն դոլար: Ինչպես ավելի վաղ տեղեկացվել էր, «Պոլիմետալի» ձեռնարկությունների ընդհանուր վճարները Հայաստանի պետական ​​բյուջե 2017 թվականին կազմել են 6.5 մլրդ դրամ: Ընկերության սոցիալական ներդրումները Հայաստանի Հանրապետությունում 2017 թվականին կազմել են 400 միլիոն դրամ, որից 190 միլիոն դրամը կազմել են ուղղակի ներդրումները Սյունիքի մարզի սոցիալական ենթակառուցվածքում:

«Պոլիմետալ» խումբը թանկարժեք մետաղների արդյունահանման առաջատարներից է, որն ունի ակտիվներ Ռուսաստանում, Ղազախստանում և Հայաստանում: «Պոլիմետալ»-ի բաժնետոմսերը վաճառվում են Լոնդոնի և Մոսկվայի ֆոնդային բորսաներում: Ընկերությունը ներառված է FTSE 250 և FTSE Gold Mines ինդեքսներում: Ընկերությունն ունի ոսկու և արծաթի ութ հանքավայր, ինչպես նաև զարգացման ծրագրերի բարձրակարգ պորտֆել:

 

Ըստ խմբի ֆինանսական արդյունքների վերաբերյալ հաշվետվության՝ 2017 թվականին ընկերության եկամուտը կազմել է 1815 մլն ԱՄՆ դոլար, ճշգրտված EBITDA՝ 745 մլն ԱՄՆ դոլար, ճշգրտված զուտ շահույթը`376 մլն ԱՄՆ դոլար: Արտադրության արդյունքների համաձայն, տարեկան արտադրությունը ոսկու համարժեքով կազմել է 44.6 տոննա, ոսկու տարեկան արտադրությունը` 33.4 տոննա, արծաթի արտադրությունը`833.5 տոննա:

 

Ընկերությունը հաստատում է 2018 և 2019 թվականների արտադրական պլանը համապատասխանաբար` 48.2 տոննա և 52.9 տոննա ոսկու համարժեքով: 2018-ին նախատեսվում է սկսել արտադրություն Կիզիլում (Ղազախստան), որը, ինչպես սպասվում է, կսկսի ազատ դրամական հոսքեր գեներացնել նախագծային ցուցանիշների ապահովումից անմիջապես հետո: Միևնույն ժամանակ, ընկերությունը շարունակելու է ջանքերը կենտրոնացնել գործող ձեռնարկություններում գերազանց արտադրական արդյունքները պահելու և երկարաժամկետ աճի նախագծերի զարգացման վրա, ներառյալ Պրոգնոզը և Վիկշան:

 

2018-ին սպասվում է արտադրության հետագա աճ, որի աղբյուրը հիմնականում կլինի Կիզիլը, Կոմարովսկոյեն (Վարվարինսկոյե հանգույց) տարեկան 2,2 մլն տոննա նախագծային արտադրողականության հասնելուց հետո, ինչպես նաև գործող ձեռնարկությունների աշխատանքի կայուն ցուցանիշները: