Արմինֆո. Երկու կամ երեք ամսից Եղվարդ քաղաքում նավթի վերամշակման գործարանը կդառնա իրականություն: «Նախնական բիզնես պլանի համաձայն, գործարանի տարածքն ավելացել է, ինչպես նաև արտադրական ծավալները», - ԱրմԻնֆո-ի հետ զրույցում ասել է ԱրմՕյլ-ի գլխավոր տնօրեն Ալֆրեդ Աբեդին: Հայաստանի կառավարությունը մարտի 22-ի նիստում հավանություն է տվել ԱրմՕյլ ընկերության լրացուցիչ ներդրումային ծրագրին:
ՀՀ տնտեսական զարգացման և ներդրումների նախարար Սուրեն Կարայանի խոսքերով, առաջարկվում է փոփոխություններ մտցնել կառավարության 2015 թ. դեկտեմբերի 24-ի որոշման մեջ, ընկերությանը երեք տարով ազատելով ԱԱՀ վճարներից: Մասնավորապես, ընկերությունը նախատեսում է ներմուծել 523 մլն դրամ արժողությամբ 31 սարքավորում:
Նախարարը նշել է, որ «ԱրմՕյլ» ընկերության ներդրումները Եղվարդի նավթի վերամշակման գործարանի կառուցման նախագծին կկազմեն մոտ 16,8 մլրդ դրամ: Ներդրումային ծրագրի շրջանակներում կստեղծվի 150 նոր աշխատատեղ, իսկ միջին ամսական աշխատավարձը կկազմի 250 հազար դրամ:
Նշենք, որ դեռ 2016 թ. մարտին ԱրմԻնֆո-ի հետ հարցազրույցում ԱրմՕյլ-ի գլխավոր տնօրեն Ալֆրեդ Աբեդին նշեց, որ ընկերության հիմնական նպատակը նավթամթերքի արտադրությունն է, «Պատրաստված է Հայաստանում» ապրանքանիշով: Ներդրումային փաթեթը նախապես պետք է իրականացվեր երեք փուլով, ներդրումների ընդհանուր ծավալը`35 մլն դոլար:
Նախագծի առաջին փուլը նախատեսվում է Եղվարդում նավթավերամշակման գործարան կառուցել, որը հագեցած կլինի գերմանական, իտալական և իրանական տեխնիկայով: Ըստ բիզնես-պլանի, առաջին փուլում արտադրության ծավալը կկազմի տարեկան 15 հազար տոննա շարժիչային յուղ և 6 հազար տոննա գուդրոն: Հետագայում գործարանը հնարավորություն կունենա վերամշակել արդեն օգտագործված շարժիչային յուղը և այն օգտագործել որպես հումք, ինչն առաջին հերթին կօգնի պահպանել շրջակա միջավայրի մաքրությունը: Գործարանը կունենա յուրահատուկ մասնագիտացված լաբորատորիա տարածաշրջանում, որը հագեցած կլինի ժամանակակից սարքավորումներով:
Ընկերությունը միայն ներքին շուկայում վաճառելու համար նախատեսում է արտադրել 100 միլիոն դրամի ապրանք: Գործարանը, որի տարածքը կազմում է 5 հազար քառակուսի մետր, հետագայում մինչև 15 հազար քառակուսի մետր ընդլայնման հնարավորությամբ, կունենա նաև ստորգետնյա և վերգետնյա բազաներ, որոնք անհրաժեշտ են 4 հազար տոննա դիզվառելիքի, 2 տոննա բիտումի և 2-3 հազար տոննա հումք պահեստավորման համար, տարբեր տեսակի յուղերի արտադրության, ինչպես նաև 20 հազար տոննա պատրաստի արտադրանքի համար: Տեղում կառուցվում են գրասենյակային տարածքներ, իսկ մնացած մասը կազմում են անգարները, լաբորատորիաները: Ծրագրի առաջին փուլի իրագործման համար նախատեսվում է ներդրնել մոտ 15 մլն դոլար: Ծրագիրը նախատեսվում է ավարտել երեք տարվա ընթացքում:
Նշենք, որ «ԱրմՕյլը» զբաղվում է նավթամթերքների, նավթային հումքի, շարժիչային յուղերի, դիզելային վառելիքի, բիտումի և այլն նյութերի ներմուծումով և արտահանումով: Ընկերությունը հիմնադրվել է 2013 թ.-ին, որի հիմնադիրներն ունեն ոլորտի ավելի քան 20 տարվա աշխատանքային փորձ (ԱՄԷ, Իրան, Ասիայի, Աֆրիկայի և Եվրոպայի որոշ երկրներում): Ընկերությունը հանդիսանում է «Լուբրեքս» ապրանքանիշի պաշտոնական ներկայացուցիչը Հայաստանում և ԱՊՀ երկրներում և շարժիչային յուղեր է ներմուծում ԱՄԷ--ից: