Արմինֆո. Հայաստանի գործադիր մարմինների ղեկավարները հաշվետվություն կներկայացնեն 2018 թվականի առաջին եռամսյակում իրենց գործունեության մասին:
Ինչպես ԱրմԻնֆո-ին հաղորդեցին կառավարության տեղեկատվության և հասարակայնության հետ կապերի վարչությունից, կառավարության այսօրվա նիստում վարչապետը հանրապետական գործադիր մարմինների ղեկավարներին և մարզպետներին հանձնարարել է 15-օրյա ժամկետում ամփոփել և կառավարության աշխատակազմ ներկայացնել 2018 թ. 1-ին եռամսյակի համար նախատեսված միջոցառումների ծրագրերի, գերակա խնդիրների և արդյունքների վերաբերյալ կատարողականները՝ նշելով նաև առաջիկայում նախատեսված հիմնական միջոցառումներն ու դրանց կատարման ուղղությամբ ձեռնարկված գործողությունները: Ինչպես նաև տեղեկատվություն ներկայացնել նշված ժամանակահատվածում կատարված և ակնկալվող ներդրումային ծրագրերի վերաբերյալ։
Կառավարության նիստի ավարտին վարչապետ Կարեն Կարապետյանը տեղեկացրել է, որ, ելնելով Սահմանադրության պահանջից, առաջիկայում կառավարությունը հրաժարական է ներկայացնելու: «Օգտվելով առիթից՝ բոլորիդ ուզում եմ շնորհակալություն հայտնել համատեղ աշխատանքի համար»,- դիմելով նախարարներին ասել է վարչապետը՝ հորդորելով շարունակել աշխատանքը նույն տեմպով ու եռանդով:
Հիշեցնենք, որ 2015 թվականի սահմանադրական բարեփոխումների արդյունքում Հայաստանն անցնում է կառավարման խորհրդարանական ձևի: Նորընտիր նախագահ Արմեն Սարգսյանը պաշտոնը կստանձնի ապրիլի 9-ին: Նույն օրը լրանում է գործող նախագահ Սերժ Սարգսյանի լիազորությունների ժամկետը, և կառավարությունը պետք է հրաժարական տա: Ապրիլի 17-ին խորհրդարանը նոր վարչապետ կընտրի:
RUB | 4.20 | -0.01 |
USD | 391.44 | -1.16 |
EUR | 416.84 | -1.20 |
GBP | 482.49 | -5.63 |
CAD | 285.29 | 0.20 |
JPY | 25.29 | -0.11 |
CNY | 54.04 | -0.18 |
CHF | 429.40 | -2.65 |