Արմինֆո. Կապանի լեռնահարստացման կոմբինատը (ԼՀԿ), որը Polymetal International plc անդամ է, 2018 թվականի առաջին 3 ամիսներն վերամշակել է 154 հազար տոննա հանքաքար, ինչը 34%-ով ավելի է նախորդ տարվա նույն ժամանակահատվածի ցուցանիշից: Արդյունահանման ծավալները եռամսյակում կազմել են 157 հազար տոննա, ինչը 36% -ով գերազանցում է նախորդ տարվա ցուցանիշը: Այս մասին է ասվում 2018 թվականի առաջին եռամսյակի արդյունքների մասին ընկերության հաում:
Զեկույցի համաձայն, մեկ տոննա վերամշակված հանքաքարում ոսկու պարունակությունն առաջին եռամսյակում կազմել է 1,8 գրամ, 2017 թվականի առաջին եռամսյակի համեմատ նվազելով 13%-ով, արծաթի պարունակությունը կազմել է 33 գրամ (-24%), պղնձինը`0.30% (+ 11%) և ցինկինը` 1.31% (-1%): Միևնույն ժամանակ, ոսկու կորզման գործակիցը կազմել է 81.9% (-1%), արծաթինը` 81.7% (-2%), պղնձինը` 94.5% (+ 4%), իսկ ցինկինը` 87.5% (-1%): Արդյունքում, առաջին եռամսյակում ոսկու արտադրությունը կազմել է 6.4 հազար ունցիա (+ 12%), արծաթինը` 0.1 մլն.ունցիա (-1%), պղնձինը` 0.4 հազար տոննա (+ 48%) և ցինկի արտադրությունը` 1.3 հազար տոննա (+ 28%):
Զեկույցում նշվում է, որ առաջին եռամսյակում Կապանը շարունակել է բարելավել իր արտադրական ցուցանիշները և արտադրել է 12 հազար ունցիա ոսկուն համարժեք, ինչը 18%-ով ավելի է նախորդ տարվա համեմատ: Դա հիմնականում պայմանավորված է եղել վերամշակման ծավալների աճով, ստորգետնյա հանքավայրերի արտադրողականության աճին ուղղված միջոցառումների շարունակական ներդրման ֆոնին:
Մասնավորապես, ստորգետնյա լեռնանցումային աշխատանքներն աճել են 61%-ով, այն բանից հետո, երբ հանքի անձնակազմն ամբողջությամբ անցավ մեխանիկական հորատման աշխատանքներին: Պարունակությունները նվազել են այն պատճառով, որ, անվտանգության խնդիրներից ելնելով, ընկերությունն աստիճանաբար հրաժարվեց ձեռքի աշխատանքի օգտագործումով հանույթից, որն ապահովում էր հանքանյութի նվազագույն աղքատացում:
Հիշեցնենք, որ «Polymetal»-ն սկսել է Հայաստանում գործունեությունը 2015 թվականից, ձեռք բերելով Լիճքվազ-Թեյի ոսկու հանքավայրի նկատմամբ ընդերքօգտագործման իրավունք ունեցող «Լիճքվազ» ՓԲԸ-ի բաժնետոսմերը, իսկ 2016 թվականի ապրիլին` Կապանի լեռնահարստացման կոմբինատը: Կոմբինատը ներառում է ստորգետնյա հանքը, վերամշակող ֆլոտացիոն ֆաբրիկան և ենթակառուցվածքային օբյեկտները: Լիճքվազում կատարվում են հանքուղու ընդլայնման աշխատանքներ, ընթացիկ տարում նախապատրաստական և հատման փորվածքների հետագա լեռնանցման համար:
«Մենք 2018 թվականը կայուն արդյունքներով սկսեցինք, մեր բոլոր ձեռնարկություններում», - ասել է Պոլիմետալ խմբի գլխավոր գործադիր տնօրեն Վիտալի Նեսիսը: 2018 թվականի առաջին եռամսյակում Polymetal-ն արտադրել է 295 հազար ունցիա ոսկու համարժեք, ինչը 5% -ով գերազանցում է նախորդ տարվա նույն ժամանակահատվածի ցուցանիշը: Ոսկու եռամսյակային արտադրությունն անցյալ տարվա համեմատ ավելացել է 8%-ով, մինչև 214 հազար ունցիա, իսկ արծաթի արտադրությունը կրճատվել է 3%-ով, մինչև 6.0 մլն ունցիա:
Հասույթը 2018 թվականի առաջին եռամսյակում, 2017-ի առաջին եռամսյակի համեմատ, ավելացել է 19%-ով, մինչև 354 մլն դոլար, կապված իրացման ծավալների աճի, մետաղների գների աճի և աֆինաժային գործարանների սեզոնային փակումների ազդեցության նվազման հետ (նախորդ տարվա համեմատ): «Պոլիմետալը» 2018 թվականի արտադրության պլանը հաստատում է 1,55 միլիոն ունցիա ծավալով, ինչպես նաև 650-700 ԱՄՆ դոլար մեկ ունցիա ոսկու համարժեքի դրամական ծախսերի և ԱՄՆ դոլար մեկ ունցիա ոսկու համարժեքի համախառն դրամական ծախսերի կանխատեսումը:
«Պոլիմետալ»-ն աշխարհի խոշորագույն առաջնային արծաթ արտադրողներից է և Ռուսաստանի ոսկի արդյունահանող առաջատար երեք ընկերություններից մեկը: Այն իրականացնում է թանկարժեք մետաղների արդյունահանում, ինչպես նաև երկրաբանական հետազոտություններ Ռուսաստանում, Ղազախստանում և Հայաստանում: Պոլիմետալն ինքնուրույն իրականացնում է հանքավայրերի շահագործումը, սկսած երկրաբանական ուսումնասիրությունից մինչև շահագործում: Ռազմավարության առանցքային տարրը վերամշակման կենտրոնների ստեղծումն է (hubs), որոնք հնարավորություն են տալիս առավել արդյունավետ և պատասխանատու օգտագործել ֆինանսական և մարդկային ռեսուրսները, նպաստել ներդրված կապիտալի եկամտաբերության աճին: 2011-ի նոյեմբերին Պոլիմետալը, առաջինը ռուսական ընկերություններից, պրեմիում ցուցակում անցավ Լոնդոնի ֆոնդային բորսայում (թիքքեր POLY):