Արմինֆո. ՀՀ նախագահ Արմեն Սարգսյանը մայիսի 7-ին ընդունել է «Նաիրիտ» գործարանի մի խումբ նախկին աշխատակիցների, ովքեր բողոքի ակցիա էին անցկացնում նրա նստավայրի մոտ: Ինչպես նշել են բողոքի ակցիայի մասնակիցները, նախագահի հետ հանդիպման ընթացքում իրենք հերթական անգամ անդրադարձել են գործարանի վերաբացման անհրաժեշտությանը:
Գործարանի նախկին աշխատակիցները նախագահին են ներկայացրել իրենց բողոքները՝ կապված «դատաքննությունների ընթացքում իրենց իրավունքների խախտման հետ»: Ներկայումս, ինչպես հայտնել են նրանք, Հայաստանի դատարաններում գործարանի 132 աշխատակցի հայցադիմում կա, ովքեր պահանջում են անվավեր ճանաչել «Նաիրիտ 2»-ի հետ կնքված պայմանագրերը, որոնցով հրաժարվել էին աշխատավարձերի չվճարման տույժ տուգանքներից և համաձայնել, որ իրենց վճարեն միայն աշխատավարձերը: Գործարանի նախկին տնօրեն Կարեն Իսրայելյանի խոսքով, տույժ տուգանքները, որոնք պետք է գործարանը վճարեր երկար տարիներ աշխատավարձ չվճարելու պատճառով, կկազմի մոտ 15 միլիոն դոլար:
Հանդիպումից հետո գործարանի աշխատակիցները հայտնել են, որ նախագահը լսել է իրենց փաստարկները և հայտարարել, որ կխորհրդակցի Բարձրագույն դատական խորհրդի նախագահ Գագիկ Հարությունյանի հետ՝ խոստանալով հարցը պահել ուշադրության կենտրոնում:
«Նաիրիտ» գործարանը լիովին դադարեցրել է աշխատանքը 2014 թվականին: Գործարանի ընդհանուր պարտքը մոտեցել է 50 մլրդ դրամի (շուրջ 130 մլն դոլար): Մինչև նախորդ դարի 80-ական թվականների վերջը գործարանի արտադրանքն զբաղեցնում էր սինթետիկ կաուչուկի համաշխարհային շուկայի 10-12%-ը: 2006 թվականին «Նաիրիտե ընկերության բաժնետոմսերի 90%-ը վաճառվել է բրիտանական Rhainoville Property Limited կոնսորցիումին: Կոնսորցիումին է պատկանում «Նաիրիտ գործարանե ՓԲԸ բաժնետոմսերի 89,999%-ը, 4,496%-ը պատկանում է ՀՀ էներգետիկայի և բնական պաշարների նախարարությանը, 3,596%-ը` «ՀայՌուսգազարդե ՓԲԸ-ին, 1,907%-ը` «Երևանի ՏԷՑե ՓԲԸ-ին: 2006 թվականին գործարանի և հիմնական բաժնետեր Rhinoville Property Limited-ի հիմնական միջոցները գրավադրվել են Միջպետական բանկի 70 մլն դոլար վարկի դիմաց և դարձել են բանկի սեփականություն` վարկը չմարելու արդյունքում: 2015 թվականին Համաշխարհային բանկը Հայաստանի կառավարության պատվերով անցկացրել էր «Նաիրիտե գործարանի ֆինանսական և տեխնիկական աուդիտ: ՀԲ գնահատականների համաձայն, գործարանի վերագործարկումն աննպատակահարմար է թվում, քանի որ պահանջվում է առնվազն 250 մլն դոլար: Սակայն ներդրողներ հայտնվելու դեպքում էլ ՀԲ փորձագետները կասկածում են, որ գործարանի արտադրանքը գնորդ կգտնի և, ընդհանրապես, կլինի մրցունակ: ՀԲ աուդիտորները հանգել են հետևության, որ ինչպես բութադիենի, այնպես էլ ացետիլենի հիման վրա արտադրական գործընթացի պայմաններում «Նաիրիտիե արտադրանքը կունենա բավականին բարձր ինքնարժեք` նաև հիմնական միջոցների զգալի մասի էական մաշվածության պատճառով: Փորձագետների մեծ մասը կարծում է, որ ՀԲ աուդիտի արդյունքները կարելի է դիտարկել որպես գործարանի սնանկացման գործընթաց սկսելու հանձնարարական, ինչն էլ, ըստ էության, տեղի ունեցավ: