Գինեգործների համար Վահե Քեոշքերյանի Wine Cubes նախագիծը մեկնարկում է առաջիկա ամռանը Վայոց ձորի մարզում

Արմինֆո. Առաջիկա ամռանը Վայոց ձորի մարզում մեկնարկում է Վահե Քեոշքերյանի Wine Cubes փորձնական  նախագիծը, որը կիրագործվի ONEArmenia's-ի հետ համատեղ և նպատակաուղղված է փոքր գիներգործներին աջակցությանը: ԱրմԻնֆո-ի հետ զրույցում այդ մասին հաղորդել է Semina Consulting ընկերության գործադիր տնօրեն Վահե Քեոշքերյանը:

Նա պարզաբանել է, որ նախագիծը կիրագործվի համայնքներում, սկսած Վայոց ձորից,  և նախատեսում է խաղողի այգիներում համտեսման փոքր սրահների ստեղծում, որտեղ զբոսաշրջիկները կարող են համտեսել տեղական այգիներում աճեցված խաղողից պատրաստված գինիներ: 2 տարվա ընթացքում ընկերությունն աջակցություն կտրամադրի գինեգործներին արտադրության, մասնավորապես, վերջնական արտադրանքի ձևավորման գործում` անհրաժեշտ պայմաններ ապահովելով զբոսաշրջիկների հարմարավետության համար: Իսկ  երբ իրացման տարեկան ծավալը կազմի 2 հազար շիշ գինի, գինեգործը պարտավորվում է 18 ամսվա ընթացքում ընկերությանը վճարել ներդրված միջոցները և հետագայում ինքնուրույն զարգացնել նախագիծը` այդպիսով աստիճանաբար հետ գնելով համտեսման սրահը: Ստացված միջոցներով ընկերությունը մտադիր է նախագիծն ընդլայնել Հայաստանի մյուս մարզերում: Քեոշքերյանը պարզաբանել է, որ ընկերության և ֆերմերների միջև կկնքվեն համապատասխան պայմանագրեր, որոնց շրջանակում գինեգործը պարտավորվում է ապահովել ապրանքի բարձր որակ և սպասարկման մակարդակ:

«Մեր նպատակը շատ պարզ է. մենք ցանկանում ենք օգնել փոքր գինեգործներին որակյալ ապրանք վաճառել և վաստակել: Եվ, վերջնական արդյունքում, նրա աշխատանքը ոչ թե կդառնա մեկ խոշոր գործարանի մաս, այլ կլցվի որակյալ գինու մեկ բացառիկ շշի մեջ՚, - ասել է նա:

Ինչպես նշել է Քեոշքերյանը, ընյկերությունը մտադիր է Վայոց ձորում կառուցել մոտ 5-6 այդպիսի համտեսման տուն, որոնցից յուրաքանչյուրի արժեքը կկազմի շուրջ 10 հազար դոլար: Ծրագիրը մեկնարկում է Արենի գյուղում, որը հայտնի է իր գինու ավանդույթներով, ինչից հետո նախագիծը կիրագործվի Եղեգնաձորում, Ռինդ, Խաչիկ և այլ գյուղերում: Վայոց ձորից հետո համտեսման սրահներ կհայտնվեն նաև Լոռու մարզում:

Գինեգործի ասելով, նախագծի գաղափարն առաջ է եկել դեռ 2-3 տարի առաջ: Դրա իրագործման համար ընկերությունն ապահովել է գործընկերների, մասնավորապես,  ONEArmenia's-ի աջակցությունը և գտել է նախագծի համար դոնորներ: Նա հավելել է, որ Wine Works ընկերությունը կզբաղվի ֆերմերների խաղողի ընդունմամբ և գինու արտադրությամբ: GIZ-ն աջակցություն կտրամադրի կրթության մասով: Ճարտարապետական մշակմամբ կզբաղվի Armenia's Architectural Design Studio-ն, Satrap Construction-ը կստանձնի համտեսման տների կառուցման պարտավորություններ և այլն: «Հուսով եմ, որ մեր նախագիծը  կաճի, և մեզ կհաջողվի արագացնել Հայաստանում գինեգործության խթանման միջոցով զբոսաշրջության զարգացման գործընթացը՚, - եզրափակել է նա:

Հավելենք, որ Վ. Քեոշքերյանի կողմից Հայաստանում հիմնադրված Semina Consulting ընկերությունը խորհրդատվական ծառայություններ է առաջարկում խաղողագործության բնագավառում, ինչպես նաև` ռազմավարական աջակցություն գինեգործներին: Ընկերության գործունեությունը նպատակաուղղված է գինու մշակույթի զարգացմանը արագ աճող գինեգործական հատվածի արդիականացման պայմաններում: