Երկուշաբթի, 21 Մայիսի 2018 19:33

Արմինֆո. Արդեն մի քանի օր է, ինչ աշխարհահռչակ «Գինու քաղաք» թանգարանում անցկացվում են հայկական գինու օրեր՝ «Հայաստան՝ գինու նվիրական երկիր» խորագրով:

 

Ինչպես տեղեկացրել է Հայաստանի Խաղողագործների և գինեգործների հիմնադրամի մամուլի ծառայությունը, 2017-թ նոյեմբերին Հայաստանի խաղողագործության և գինեգործության հիմնադրամի և La cite du Vin թանգարանի միջև ստորագրվել է համագործակցության հուշագիր՝ համաձայն որի 2018-ի մայիսից սկսած` մեկ տարի շարունակ թանգարանում պարբերաբար կանցկացվեն հայկական գինու օրեր։ 

 

Միջոցառումների մեկնարկին ընդառաջ՝ ՀԽԳՀ տնօրեն Զարուհի Մուրադյանը և փորձագետ Անահիտ Դավթյանը վարպետության դասեր են անցկացրել թանգարանի աշխատակազմի համար: Վերջիններս հետագայում պետք է այցելուներին ներկայացնեն հայ գինեգործության պատմությունն ու ավանդույթները, հայկական գինիները և խաղողի տեղածին սորտերի առանձնահատկությունները։

 

Միջոցառման պաշտոնական բացումից դեռ շաբաթներ առաջ բոլոր տոմսերը վաճառվել էին: Այցելուները մեծ հետաքրքրությամբ հետևեցին հայ գինեգործությանը նվիրված շնորհանդեսին և վայելեցին հայկական խաղողի տեղածին սորտերից պատրաստված բացառիկ գինիները:

 

Այցի շրջանակներում եղան հանդիպումներ գինու առաջատար փորձագետների հետ, ինչպես նաև հայկական գինիների շնորհանդես և համտեսներ անցկացվեցին Փարիզի, Բորդոյի և Տուլուզի հայ համայնքների ներկայացուցիչների և ֆրանսիացի ներմուծողների համար:

 

Հայկական գինիների շնորհանդեսները կազմակերպվել են Փարիզում գործող Հայկական միջմասնագիտական միջազգային խմբավորման աջակցությամբ՝ ՀԽԳՀ հետ համագործակցության շրջանակներում:

 

ՀԽԳՀ տնօրեն Զարուհի Մուրադյանը նշում է. «Չափազանց բարձր եմ գնահատում հայկական միջոցառումների կազմակերպումը աշխարհում գինու մասնագիտացված լավագույն  թանգարանում, և վստահ եմ, որ այն էապես նպաստելու է մեր գլխավոր առաքելության իրականացմանը, այն է՝ բարձրացնել հայկական գինիների ճանաչելիությունն ու պահանջարկն աշխարհում: Ֆրանսիացիների բարձր գնահատականները մեր գինիներին բավականին ոգևորիչ են, քանի որ սա վկայում է մեր գինիների բարձր որակի և միջազգային գինեսերի քիմքին բավարարող հատկություններով օժտված լինելու մասին»:

 

Նշենք, որ թանգարանը բացառիկ է իր տեսակով և տարեկան հյուրընկալում է շուրջ 450.000 այցելու աշխարհի տարբեր երկրերից: Իրադարձային տարում La Cite du Vin թանգարանում ներկայացված կլինեն 42 տեսակի հայկական գինիներ:

 

ՀՀ Ազգային վիճակագրական ծառայության տվյալներով, 2017 թվականին Հայաստանն արտադրել է 8,8 մլն լիտր գինի, տարեկան աճը`30%: ՀՀ մաքսային ծառայության տվյալներով, 2017 թվականին Հայաստանն արտահանել է 2,8 մլն լիտր գինի, տարեկան աճը`50.5%, իսկ մաքսային արժեքը կազմել է 81%, մինչեւ $ 10.8 մլն: