Ֆինանսների նախկին նախարարը կզբաղվի լուրջ նախագծերով` գլխավորելով «Վալլեքս Գրուպ՚ լեռնարդյունահանող հոլդինգը

Արմինֆո. Հայաստանի ֆինանսների նախկին նախարար Վարդան Արամյանն աշխատանքի է անցել մասնավոր հատվածում` դառնալով  «Վալլեքս Գրուպ՚  խոշոր լեռնարդյունահանող հոլդինգի գործադիր տնօրեն:

«Վալլեքս Գրուպ» ՓԲԸ (Vallex Group) հիմնադրվել է 1998 թվականին և միավորում է 20 դուստր և փոխկապակցված ընկերություններ: Դրանց թվում են «Թեղուտ» ՓԲԸ-ն, որն ստեղծվել է 2006 թվականին, բաժնետոմսերի լրիվ փաթեթը պատկանում է կիպրոսյան «Թեղուտ Ինվեսթմենթս Լիմիթիդ» ՓԲԸ-ին, որի քվեարկող բաժնետոմսերի 100 տոկոսը պատկանում է «Արմենիան քոփր Փրոգրամ» ՓԲԸ-ին, որի սեփականատերը Վալերի Մեջլումյանն է, ինչպես նաև` «Բեյզ Մեթըլս» ՓԲԸ-ն, որը շահագործում է Արցախի  Մարտակերտի շրջանում գտնվող Դրմբոնի պղինձ-ոսկու հանքավայրը, «Armenian Copper Programme» ՓԲԸ (ACP), որը շահագործում է Ալավերդու պղնձաձուլման կոմբինատը, որտեղ արտադրվում է սև պղինձ:

Թեղուտի պղնձամոլիբդենային հանքավայրի շահագործման ծրագիրը ՀՀ կառավարության կողմից հաստատվել է 2007 թվականի նոյեմբերին: Իր պաշարներով Թեղուտի հանքավայրը երկրորդն է Հայաստանում, Քաջարանի պղնձի հանքավայրից հետո: Դեռ 1972  թվականին այստեղ երկրաբանական հետախուզման լայնածավալ աշխատանքների արդյունքում հաստատված պաշարները կազմել են 450 մլն.տոննա հանքանյութ, այդ թվում` 1.6 մլն.տոննա պղինձ և 99 հազ. տոննա մոլիբդեն: Նշենք, որ խոշորագույն Թեղուտի նախագիծը բնապահպանական խնդիրների առնչությամբ անցած տարվա վերջին դադարեցվել է: Հանքավայրի շահագործումը կարող է շարունակվել միայն մի շարք տեխնիկական և բնապահպանական խնդիրների լուծումից հետո, որոնց պատճառով ընկերությունը, փաստորեն, զրկվել է վարկային աջակցությունից:

ԱրմԻնֆո-ի տնտեսական մեկնաբանների կարծիքով, Վարդան Արամյանի բարձր պրոֆեսիոնալիզմը և հեղինակությունը միջազգային կազմակերպություններում ընկերությանը թույլ կտան, նախ, ձգտել վերսկսել Թեղուտի շահագործումը, որի նկատմամբ լուրջ դժգոհություններ կան բնապահպանական հանրության կողմից` ինչպես երկրի ներսում, այնպես  էլ նրա սահմաններից դուրս, իսկ երկրորդը` նախապատրաստել և գործարկել Հայաստանում սեփական մետալուրգիական կոմբինատի կառուցման նախագիծը: Նոր ձուլման գործարանի նախագիծը Հայաստանին առաջարկել է չինական կողմը, դրան որպես փայատեր կմասնակցի  «Վալլեքս Գրուպ» ՓԲԸ-ն: Փորձագետների կարծիքով, սա բացառիկ արդիական նախագիծ է Հայաստանի համար, որը լեռնահանքային հումքի էական ծավալի առկայության պայմաններում թույլ կտա հրաժարվել պղնձի խտանյութի արտահանումից և հասնել դրա խորը վերամշակմանը երկրի ներսում: Նախագիծը վիթխարի մուլտիպլիկատիվ ազդեցություն կունենա նաև երկրի ներսում արդյունաբերական արտադրության վերականգնման համար: