Արմինֆո. Մտահոգություն է հարուցում այն փաստը, որ Հայաստանի կառավարությունը մինչ օրս չի կատարել նոր ջերմային էներգաբլոկի կառուցման շուրջ իտալական «Ռենկո՚ ընկերության հետ պայմանագրի նախապատրաստման գծով իր պարտավորությունները: Հունիսի 1-ին կառավարության նիստում այդ մասին հայտարարել է վարչապետ Նիկոլ Փաշինյանը: Նրա ասելով, կառավարությունը ջանքեր է ձեռնարկում գրավիչ ներդրումային միջավայր ձևավորելու ուղղությամբ, միևնույն ժամանակ, նոր ներդրումային նախագիծը, չգիտես ինչու, արգելակվում է: «10 օր առաջ ես հանդիպել եմ «Ռենկո՚ ընկերության ղեկավարության հետ, և պարզվեց, որ ծրագրի իրագործմանն առնչվող խնդիրներ են ծագել՚, - նշել է Նիկոլ Փաշինյանը:
Ի պատասխան` արդարադատության նախարար Արտակ Զեյնալյանը հաղորդել է, որ «Ռենկո՚ ընկերության հետ պայմանագիրն ընկերույթյան ղեկավարույթյան և ՀՀ էներգետիկ ենթակառուցվածքների ու բնականն պաշարների նախարարության միջև քննարկման փուլում է: Նախարարը հավելել է, թե, քանի որ ծավալուն պայմանագիրը ներկայացված է անգլերեն, առկա է փորձաքննության անհրաժեշտություն, ինչով զբաղվում է Էներգետիկայի ինստիտուտը: էներգետիկ ենթակառուցվածքների և բնականն պաշարների նախարար Արթուր Գրիգորյանն, իր հերթին, հաղորդել է, որ նախատեսվում է երեք ամից սկսել բլոկի շինարարությունը, որը կտևի 25 ամիս: Պայմանագրի նախագծի համաձայն, պետությունը պարտավորվում է 20 տարվա ընթացքում գնել էլեկտրաէներգիայի ավելցուկը, քանի որ հիմնական մասն արտահանվելու է: Ի պատասխան` Նիկոլ Փաշինյնաը կոչ է արել արագացնել ծագած խնդրի լուծումը: «Եթե մենք նախագծին ասում ենք «այո՚, ապա հարկավոր է արագ ասել «այո՚, եթե «ոչ՚, ուրեմն` «ոչ՚, - հայտարարել է վարչապետը:
Ավելի վաղ ԱրմԻնֆո-ն հաղորդել էր, որ իտալական «Ռենկո՚ ընկերությունը շուրջ 250 մլն դոլար կներդնի Երևանի ՋԷԿ-ի երկրորդ էներգաբլոկի կառուցման համար, որը կաշխատի համակցված շոգեգազային ցիկլով (EKPGTS) 250 ՄՎտ հզորությամբ: Հիմնարկեքի արարողությունը տեղի է ունեցել մարտի 20-ին, Երևան ՋԷԿ-ին հարող տարածքում, որտեղ կսկսվի շինարարությունը: Ծրագրի շրջանակում կստեղծի շուրջ 900 ժամանակավոր աշխատատեղ, իսկ շահագործման պահից` 200 մշտական և բարձր վարձատրվող աշխատատեղ: Շինարարության ընթացքում կօգտագործվեն լավագույն արդյունավետ տեխնոլոգիաներ, իսկ օգտակար գործողության գործակիցը կլինի 53%, մինչդեռ, Հրազդանի էներգաբլոկում այս ցուցանիշը կազմում է 44%, Երևանի ՋԷԿ-ում`49%:
Բլոկում արտադրվելիք էլեկտրաէներգիայի մեծ մասը կարտահանվի կառուցվող Իրան-Հայաստան-Վրաստան էլեկտրահաղորդման գծով, որը շահագործման կհանձնվի 2019 թվականի վերջին: Պետությունը պարտավոր է 20 տարում ձեռք բերել արտադրվող էլեկտրաէներգիայի ավելցուկը` 6 ամերիկյան ցենտով առանց ԱԱՀ: Ավելի վաղ «Ռենկո՚ խմբի գլխավոր տնօրեն Ջովանի Ռուբինին նշել էր, որ ֆինանսավորման մի մասը կտրամադրվի Ռենկո-ի միջոցներից, իսկ երկրորդ մասը` միջազգային բանկերի ներգրավման միջոցով, որոնք, նրա խոսքով, նախագծի իրականացման առումով ցուցաբերել են մեծ ոգևորություն, ինչը, ըստ ներդրողի, խոսում է ընկերության և նախագծի նկատմամբ նրանց վստահության մասին:
Հիշեցնենք, որ «Ռենկո՚ ընկերությունը հայկական շուկայում աշխատում է սկսած 90- ականների վերջից, իրականացնելով խոշոր նախագծեր, այդ թվում երկու հյուրանոց` «Կոնգրես» և «Գոլդեն Թուլիփ Երևան», Իտալիայի դեսպանության շենքը, ինչպես նաև Երևանի կենտրոնում բնակելի համալիր և առաջին ստորգետնյա ավտոկանգառը: