Հաջորդ շաբաթ Fitch-ը կհրապարակի Հայաստանի նոր վարկանիշը

Արմինֆո. ՀՀ ֆինանսների նախարար Ատոմ Ջանջուղազյանն ընդունել է Fitch Ratings գործակալության սուվերեն վարկանիշների դեպարտամենտի տնօրեն Էրիկ Էրայսփի գլխավորած պատվիրակությանը:

ՀՀ ֆինանսների նախարարության հաղորդագրության համաձայն, Էրիկ Էրայսփը տեղեկացրել է, որ գործակալության ներկայացուցիչների ամենամյա այցի նպատակն է երկրի վարկանիշի գնահատումը, որի արդյունքները կհրապարակվեն հաջորդ շաբաթ:

Հանդիպման ընթացքում կողմերն անդրադարձել են երկրի տնտեսական կայունությանը, պարտքի կառավարելիությանը, հարկային բարեփոխումներին, ինչպես նաև հարկաբյուջետային կանոնների վերանայմանն առնչվող մի շարք հարցերի: Քննարկվել են նաև Հայաստանի կառավարության կողմից իրականացվող նախաձեռնությունների և ծրագրերի ընթացքն ու հետագա անելիքները:

Ատոմ Ջանջուղազյանը բարձր է գնահատել համագործակցությունը Fitch Ratings-ի հետ և նշել, որ հայկական կողմը կարևորում է գործակալության կատարած աշխատանքը և Հայաստանին շնորհված վարկանիշը:

Ավելի վաղ ԱրմԻնֆո-ն հայտնել էր, որ Fitch Ratings-ը Երևան քաղաքի թողարկողի դեֆոլտի արտարժույթով (ԹԴԱ) և տեղական արժույթով երկարաժամկետ վարկանիշները վերահաստատել է «Բ +» մակարդակում, «Դրական» կանխատեսումով, ինչպես նաև արտարժույթով կարճաժամկետ ԹԴԱ վարկանիշը`«Բ» մակարդակում: Վարկանիշների վերահաստատումը հաշվի է առնում երկրի իշխանությունների տեղական և տարածաշրջանային մարմինների թույլ ինստիտուցիոնալ միջավայրը, քաղաքի ընդունելի բյուջետային ցուցանիշների համադրմամբ, որոնք աջակցվում են կառավարության կայուն տրանսֆերտներով: Վարկանիշներում հաշվի են առնվում նաև Երևանի մայրաքաղաքային կարգավիճակը և զրոյական պարտքը: «Դրական» կանխատեսումն արտացոլում է սուվերեն վարկանիշներով կանխատեսումը: