Փաշինյան. Մեր դիրքորոշումն աներկիմաստ է. փոքր և միջին բիզնեսի շահերը հարկավոր է պաշտպանել

Արմինֆո. Կառավարության քաղաքականությունը նպատակաուղղված է փոքր և միջին բիզնեսի շահերի պաշտպանությանը: Այդ մասին հայտարարել է վարչապետ Նիկոլ Փաշինյանը` նախօրեին «Ֆեյսբուքի՚ ուղիղ եթերի ընթացքում:

Ինչպես հաղորդել է կառավարության ղեկավարը, այս շաբաթ կկայանա քննարկում` հասկանալու համար, թե հատկապես ինչ մեխանիզմներ է անհրաժեշտ կիրառել այդ ուղղությամբ: Միևնույն ժամանակ, նրա ասելով, արդեն կան բազմաթիվ հետաքրքիր գաղափարներ: «Կան գաղափարներ, կա բանավեճը, թե հատկապես որ մեխանիզմն է արդյունավետ, բայց հայեցակարգային առումով, իհարկե, պետք է պաշտպանենք փոքր ու միջին բիզնեսը։ Հիմա չեմ բարձրաձայնի այդ գաղափարները, որովհետեւ դեռ փորձագիտական քննարկում պետք է լինի։ Սակայն մեր դիրքորոշումն աներկիմաստ է. փոքր և միջին բիզնեսի շահերը հարկավոր է պաշտպանել՚, - հայտարարել է Փաշինյանը:

Ինչպես նշել է վարչապետը, մի շարք տոնավաճառների սեփականատերեր արձագանքել են կառավարության խնդրանքին և նվազեցրել վարձավճարները. «Մենք աշխատում ենք նաեւ մաքսային եւ հարկային մարմինների հետ` փոքր բիզնեսի համար նորմալ պայմաններ ապահովելու համար։ Փոքր ու միջին բիզնեսին չենք նեղացնի, կթողնենք զարգանա», - հայտարարել է վարչապետը։

Հիշեցնենք, որ 2017 թվականին Հայաստանի ՓՄՁ շրջանառությունն ավելացել է 14,2%-ով` մինչև 1920.3 մլրդ դրամ կամ ՀՆԱ 34,4%: Այդ մասին ասվում է ՎԶԵԲ կողմից ֆինանսավորվող Բիզնեսի աջակցության գրասենյակի «ՓՄՁ դերը Հայաստանի տնտեսությունում՚ տարեկան հետազոտությունում: Աղբյուրի համաձայն, ակտիվ հարկատուների կառուցվածքում ՓՄՁ բաժինը կազմում է 77% կամ 82 209 ընկերություն: Ընդ որում, հարկատուների ընդհանուր ցուցակում ակտիվների բաժինը հասել է 59,2% կամ 106 596 ընկերություն, ինչը թվային արտահայտությամբ 5 593-ով ավելի է մեկ տարվա վաղեմության ցուցանիշից: Հայաստանում ՓՄՁ-ն ապահովել են 246 702 աշխատատեղ, ինչը 8 391-ով ավելի է` քան մեկ տարի առաջ: Այլ կերպ ասած` աշխատատեղերի ընդհանուր թվում (չհաշված պետական մարմինները) ՓՄՁ բաժինը կազմել է 30,3%: ՓՄՁ սուբյեկտների գործունեության հիմնական ոլորտը մանրածախ և մեծածախ առևտուրն է (57%), միևնույն ժամանակ, ծառայությունների ոլորտում ՓՄՁ զբաղվածության բաժինն ավելացել է` 17%-ից մինչև 21%: