Չորեքշաբթի, 4 Հուլիսի 2018 13:58

Արմինֆո.Միավորված ազգերի կազմակերպության Միջազգային առևտրի կենտրոնը (ITC) պաշտոնապես հայտարարեց ՓՄՁ աջակցման «Պատրաստ առևտրին» (Ready To Trade) ծրագրի մեկնարկի մասին, որը ֆինանսավորվում է ԵՄ կողմից, Արևելյան գործընկերության երկրների համար EU4BUSINESS նախաձեռնության շրջանակներում:

Հայաստանում ITC ծրագրի համակարգող Ադելաիդա Բաղդասարյանն ԱրմԻնֆո գործակալության հետ զրույցում տեղեկացվել է, որ ուսումնասիրության արդյունքում ընտրվել է 20 շահառու, որոնց 25% -ն արդեն զբաղվում են արտահանման գործունեությամբ, ընդ որում`ԵՄ ուղղությամբ, իսկ 32%-ը հետաքրքրված է իր արտադրանքը մատակարարել եվրոպական շուկա: Մոնիտորինգի համաձայն, ըստ նրա, ընտրվել են երեք առանցքային արտադրական խմբեր, որոնք, Կենտրոնի փորձագետների կարծիքով, ԵՄ երկրների հետ առևտրի մեծ ներուժ ունեն: Ա.Բաղդասարյանըպարզաբանել է, որ ITC- ն շահառուներին կտրամադրի տեխնիկական աջակցություն, դեպի ԵՄ երկրների շուկաներ արտահանման ծավալների ավելացման հարցում: «Մենք կարող ենք տեխնիկական աջակցություն ցուցաբերել փոքր և միջին բիզնեսին, տարբեր տեսակի արտադրանքի սերտիֆիկացման հետ կապված: Այսօր աշխարհը գնում է պահանջների և չափանիշների բարձրացման ուղղությամբ, հատկապես սննդի առումով, և Եվրամիության երկրների գործընկերներն ավելի քան լուրջ են այս հարցում», - ասել է ծրագրի համակարգողը: Բացի այդ, նա նշել է տեխնոլոգիական խնդիրները, համապատասխան սարքավորումներ տրամադրելու առումով, ինչպես նաև ապրանքային պիտակավորման ոլորտում մարքեթինգի խթանման անհրաժեշտությունը:

Ընդհանուր առմամբ, ծրագրի արժեքը, ըստ Ա.Բաղդասարյանի, կազմել է 1 մլն եվրո: Մասնավորապես, նա ավելացրել է, որ շուտով նման ծրագրեր, բայց ավելի փոքր չափերի, կիրականացվեն ՏՏ ոլորտում և տեքստիլ արտադրությունում:

Իր հերթին, ITC տարածաշրջանային ծրագրերի դեպարտամենտի տնօրեն Աշիշ Շահն ԱրմԻնֆո գործակալության հետ զրույցում նշել է, որ, հաշվի առնելով վերջին իրադարձությունները, որոնք թույլ տվեցին նոր էջ բացել Հայաստանի պատմությունում, ծրագրի իրականացման համար ըտրվել է ճիշտ ժամանակ: Առևտուրը, Ա. Շահի խոսքերով, կարևոր դեր ունի Հայաստանի զարգացման շարունակության առումով: Բացի այդ, ITC- ի ներկայացուցիչը կարևորել է Հայաստանում ՓՄՁ-ների իրազեկվածության բարձրացման մակարդակը: Նա պարզաբանել է, որ ծրագրի իրականացումն ապահովում է տեխնիկական աջակցություն: Յուրաքանչյուր շահառուի հետ կենտրոնի մասնագետները կկարողանան անհատական ​​հիմունքներով աշխատել, պարզելու հիմնական խնդիրները և անհրաժեշտ օգնություն տրամադրելու համար: «Ես կարծում եմ, որ այսօր ՓՄՁ առջև ծառացած է պահանջների ապահովման խնդիրը, որը դնում է Եվրամիության շուկան: Առաջին հերթին, դա արտադրանքի որակն է, սերթիֆիկացումը, փաթեթավորումը, պիտակավորումը, որի համար, որպես կանոն, փոքր և միջին բիզնեսը չունի պատշաճ ֆինանսավորում», - եզրափակել է նա:

Նշենք, որ Միջազգային առևտրի կենտրոնը (ITC) հանդիսանում է ՄԱԿ-ի առևտրի և զարգացման համաժողովի և Համաշխարհային առևտրի կազմակերպության տեխնիկական համագործակցության գործակալությունը, որը նպաստում է զարգացող երկրներում փոքր և միջին բիզնեսի արտահանման գործունեության զարգացմանը: ITC աշխատում է վեց ոլորտներում`արտադրանքի և շուկայի զարգացում, առևտրի զարգացման աջակցության ծառայություններ, առևտրի մասին տեղեկատվություն, կադրերի զարգացում և մատակարարումների միջազգային գնում և կառավարում: