Ուրբաթ, 6 Հուլիսի 2018 13:35

Արմինֆո.ՀՀ վարչապետ Նիկոլ Փաշինյանը մտադիր է խորհրդակցություն անցկացնել՝ «Հյուսիս-հարավ» ավտոմայրուղու կառուցման խնդիրների հետ կապված: Այդ մասին նա հայտարարել է նախօրեին Սյունիքի մարզի մի շարք համայնքների բնակիչների հետ հանդիպումների ընթացքում

 

Բնակիչները հետաքրքրվել են, թե որքանով էր տրամաբանական ավտոճանապարհի կառուցման աշխատանքները սկսել Երևան-Արտաշատ հատվածից, այլ ոչ թե Մեղրի-Քաջարան: «Մեզ համար էլ այդ հարցը խնդիր է և առեղծված, թե ինչու ճանապարհի շինարարությունը սկսվեց Երևան-Արտաշատ հատվածից: Ինձ մոտ «Հյուսիս-հարավի» հետ կապված տեղի է ունենալու խորհրդակցություն: Անկեղծ ասած ճանապարհի հետ կապված բացահայտվում են բազմաթիվ թերություններ: Նաև իրավապահ մարմիններին եմ հանձնարարել ուսումնասիրել և պարզել, արդյոք կառուցապատման ընթացքում չարաշահումներ եղել են: Հայաստանում ամենաթողության ժամանակն ավարտվել է, այսօր որևէ մեկը չի կարող մտածել, որ հանցանք կկատարի ու կմնա անպատիժ»,- նշել է Նիկոլ Փաշինյանը:

 

Ինչպես ավելի վաղ հայտնել էր ԱրմԻնֆո-ն, 2018 թվականին «Հյուսիս-Հարավ՚ փոխադրամիջանցքի կառուցման ծրագրի շարունակմանը 47 մլն դոլար կուղղորդվի: Այդ միջոցները կներգրավվեն Ասիական զարգացման բանկից, Երոպական ներդրումային բանկից և Եվրասիական զարգացման բանկից` վարկային ռեսուրսների տեսքով, ևս 2,8 մլն դրամ նախատեսվում է ստանալ դրամաշնորհի տեսքով` Եվրոպական ներդրումային բանկից: Միաժամանակ հունիսի 1-ին կառավարության նիստում փոխվարչապետ Տիգրան Ավինյանը հայտարարել էր, որ  ՀՀ կառավարությունը մտադիր է «Հյուսիս-Հարավ» տրանսպորտային միջանցքի մաս հանդիսացող Թալին-Լանջիկ ճանապարհահատվածի շինարարության ընթացքում վարկային միջոցների օգտագործման արդյունավետության ստուգումներ անցկացնել:  Նրա խոսքով, խնդիրները կապված են «Սինոհիդրո Քորփորեյշնե չինական ընկերության կողմից աշխատանքների անորակ կատարման հետ: «Լավագույն ելքը կլիներ այդ ընկերության հետ պայմանագրի խզումը, բայց այդ քայլը խնդիրը չի լուծի»,-նշել է փոխվարչապետը՝ ավելացնելով, որ «Սինոհիդրո Քորփորեյշնի» գործողություններում առկա են նաև կոռուպցիոն ռիսկեր, ինչին անհրաժեշտ է հատուկ ուշադրություն դարձնել ուսումնասիրման ընթացքում: Նշենք, որ Թալին-Լանջիկ հատվածում շինարարական աշխատանքներ իրականացնող «Սինոհիդրո Քորփորեյշնե չինական ընկերությունն իր պատասխանատվությամբ, առանց կատարված աշխատանքների որակի թեստավորման, իրականացրել է ճանապարհի 1200մ բետոնապատում, այն դեպքում, երբ որպես թեստային փորձանմուշ անհրաժեշտ էր բետոնապատել 300մ ճանապարհահատված։ Այս առնչությամբ ՀՀ տրանսպորտի, կապի և տեղեկատվական տեխնոլոգիաների նախարարությունը պահանջել է չշարունակել բետոնապատման աշխատանքները մինչև որակի լաբորատոր փորձաքննության արդյունքները: Եթե որակի լաբորատոր փորձաքննության արդյունքները չհամապատասխանեն սահմանված չափորոշիչներին, չինական ընկերությունը պետք է քանդի և նոր, որակով բետոնապատում իրականացնի։