Արմինֆո. Եվրասիական զարգացման բանկը (ԵԱԶԲ) և ԱՐԱՐԱՏԲԱՆԿ ԲԲԸ-ն պայմանագիր են ստորագրել ՀՀ-ում միկրովարկավորման խթանման նպատակով: Փաստաթուղթը ստորագրել են ԱՐԱՐԱՏԲԱՆԿ ԲԲԸ վարչության նախագահ Աշոտ Օսիպյանը և ԵԱԶԲ Ակտիվների և պարտավորությունների կառավարման գծով տնօրեն Դմիտրի Լադիկով-Ռոևը: Այս մասին տեղեկացրել է Բանկի մամուլի ծառայությունը:
Վարկային պայմանագրի համաձայն` Եվրասիական զարգացման բանկը 6 մլն ԱՄՆ դոլար կտրամադրի ԱՐԱՐԱՏԲԱՆԿԻՆ միկրո և միջին բիզնեսի ֆինանսավորման նպատակով:
«Ուրախ եմ նոր պայմանագիր ստորագրելու առթիվ, որը կամրապնդի և կընդլայնի համագործակցությունը Եվրասիական զարգացման բանկի հետ: Այս համաձայնագրի շրջանակում ներգրավված ֆինանսական միջոցները մեզ թույլ կտան միկրո և փոքր բիզնեսի հաճախորդներին առաջարկել ավելի մատչելի և մրցունակ վարկային պրոդուկտներ՝ դրանով իսկ մեր նպաստը բերելով Հայաստանի տնտեսության զարգացմանը»,-նշել է Ա. Օսիպյանը:
«ԱՐԱՐԱՏԲԱՆԿ-ի հետ միկրովարկավորման ծրագիրը մենք սկսել են դեռևս 2012 թվականից և արդեն ունենք հաջողված աշխատանքային փորձ: Կարծում եմ, որ այս նոր ծրագրի իրականացումը ևս կնպաստի միկրո և փոքր բիզնեսի կայուն զարգացման համար բարենպաստ պայմանների ստեղծմանը, մրցակցային միջավայրի զարգացմանը՝ խթանելով արտադրության ծավալների աճը, ապրանքների և ծառայությունների տեսականու ընդլայնումը, ապրանքի որակի բարձրացումը: Այսպիսով, միկրո և փոքր բիզնեսի աջակցությունը նշանակալի ազդեցություն կունենա Հայաստանի շուկայական տնտեսության զարգացման վրա»,-նշել է ԵԱԶԲ Ակտիվների և պարտավորությունների կառավարման գծով տնօրեն Դմիտրի Լադիկով-Ռոևը:
Նշենք, որ Եվրասիական զարգացման բանկը (ԵԱԶԲ) միջազգային ֆինանսական կազմակերպություն է, որը հիմնադրվել է Ռուսաստանի Դաշնության և Ղազախստանի Հանրապետության կողմից 2006թ. հունվարին՝ մասնակից պետությունների շուկայական տնտեսության զարգացմանը նպաստելու, դրանց կայուն տնտեսական աճի և փոխադարձ առևտրատնտեսական կապերի ընդլայնման նպատակով: ԵԱԶԲ կանոնադրական կապիտալը կազմում է 7 մլրդ ԱՄՆ դոլար: Բանկի անդամ պետություններն են Հայաստանի Հանրապետությունը, Բելառուսի Հանրապետությունը, Ղազախստանի Հանրապետությունը, Ղրղզստանի Հանրապետությունը, Ռուսաստանի Դաշնությունը, Տաջիկստանի Հանրապետությունը:
Հիշեցնենք, որ ԱՐԱՐԱՏԲԱՆԿ-ը միկրո և միջին բիզնեսի վարկավորման ոլորտում հանդիսանում է Հայաստանի առաջատար բանկերից մեկը, տեղ զբաղեցնեռլով առաջատարների հնգյակում: 2017 թվականին ԱՐԱՐԱՏԲԱՆԿ-ն զգալիորեն ավելացրել է այդ ոլորտի վարկավորումը`16.3%: Ոլորտը ֆինանսավորելու համար ԱՐԱՐԱՏԲԱՆԿ-ն օգտվում է եվրոպական լավագույն վարկավորման տեխնոլոգիաներից:
ԱրմԻնֆո գործակալության կողմից պատրաստված`Հայաստանի Բանկերի Ֆինանսական Վարկանիշի 2018 թվականի ապրիլի 1-ի արդյունքների համաձայն, ԱՐԱՐԱՏԲԱՆԿ-ի վարկային ներդրումները կազմել են 128.1 մլրդ դրամ, որից 41%-ը` ՓՄՁ վարկավորման հատվածում: Բանկի ակտիվները կազմել են 211,2 մլրդ դրամ, ընդհանուր պարտավորությունները`175,2 մլրդ դրամ: ԱՐԱՐԱՏԲԱՆԿ-ի ընդհանուր կապիտալը 2018 թվականի ապրիլի 1-ի դրությամբ գերազանցել է 36 մլրդ դրամը: 2018 թվականի առաջին եռամսյակը Բանկը եզրափակել է 903.1 մլն դրամի զուտ շահույթով, տարեկան աճը`4.7 անգամ, իսկ եռամսյակային աճը` 2.8 անգամ: «ԱՐԱՐԱՏԲԱՆԿ» ԲԲԸ-ն գործում է 2005 թվականի նոյեմբերից: 2018 թվականի ապրիլի 1-ի դրությամբ ԱՐԱՐԱՏԲԱՆԿ-ի մեծամասնական բաժնետերերն են`«Ֆլեշ» ընկերությունը - 72.73%, Բարսեղ Բեգլարյանը - 18,33%, Rural Impulse Fund II (բելգիական Incofin Investment Management - Incofin IM - Incofin IM անդամ) - 8.58%: