Չորեքշաբթի, 11 Հուլիսի 2018 17:32

Արմինֆո. Արձագանքելով  Հարկային օրենսգրքի վերջին փոփոխություններին, Կոնվերս Բանկը որոշում  է կայացրել  զիջելու  ֆիզիկական անձ հաճախորդների՝ 2018թ. մայիսի 31-ի դրությամբ 271 և ավել օր ժամկետանց  անհուսալի դասակարգված  վարկերի գծով հաշվարկված տույժերը՝  վարկառուի հետ համաձայնեցված ժամանակացույցով վարկի մայր գումարը և հաշվարկված տոկոսները վճարելու պայմանով: 

 

Ինչպես տեղեկացրել է Բանկի մամուլի ծառայությունը, Բանկը պատրաստակամություն է հայտնում նշված վարկերը վերավարկավորել՝ մինչև 7 տարի մարման ժամկետով, հաշվի առնելով պարտավորության մեծությունը, դրամական հոսքերը, դրանց սեզոնայնությունը և առաջարկվող ապահովվածությունը: Ակնկալում ենք, որ նոր, համաձայնեցված ժամանակացույցով վարկային պարտավորությունները պատշաճ կատարող հաճախորդները կվերականգնեն իրենց վարկային պատմությունը և կընդլայնեն Բանկի հետ համագործակցելու և նոր պրոդուկտներից օգտվելու հնարավորությունները:

 

Գործընթացը սկսելու համար անհրաժեշտ է մինչև 2018թ. տարեվերջ դիմել Կոնվերս Բանկի ցանկացած մասնաճյուղ՝ մայր գումարի ու հաշվեգրված տոկոսների մարման ժամանակացույցը  քննարկելու համար։ 

 

Բանկից տեղեկացրեցին նաև, չնայած Հարկային օրենսգրքում կատարված վերջին փոփոխությունները վերաբերվում են ֆիզիկական անձանց վարկերին, մշակում է վարկային պարտավորությունների վերակառուցման  ծրագիր, որը կտարածվի նաև իրավաբանական անձանց և անհատ ձեռնարկատերերի՝ մինչև 20 մլն դրամ պայմանագրային գումարով անհուսալի դասակարգված  վարկերի վրա:

 

Ըստ ԱրմԻնֆո գործակալության, Հայաստանի Բանկերի Ֆինանսական Ռենկինգի, 31.03.2018թ. դրությամբ, Կոնվերս բանկը մանրածախ վարկավորման ծավալով գտնվում է առաջատար հնգյակում`73.8 մլրդ դրամ ($ 153.8 մլն), տարեկան աճը`34,4%: Բանկի ընդհանուր վարկային պորտֆելում մանրածախ վարկավորման մասնաբաժինը գերազանցում է 45% -ը, իսկ շուկայում Բանկի մասնաբաժինը կազմել է 9%: 2018 թվականի առաջին եռամսյակը Կոնվերս Բանկը եզրափակել է 1.01 մլրդ դրամ ($ 2.1 մլն) զուտ շահույթով, տարեկան աճը`2,6 անգամ: Բանկի հիփոթեքային պորտֆելով և վարկային քարտերի վրա եղած միջոցներով գտնվում է առաջատարների եռյակում:

 

Նշենք, որ «Կոնվերս Բանկ՚ ՓԲԸ գործում է 1996 թվականից: Բանկի բաժնետերերն են` «Ըդվանսդ Գլոբալ Ինվեսթմենթս» ԷլԷլՍի (80,94%), «ՀայՓոստ Թրասթ Մենեջմենթ» Բի. ՎԻ. Ընկերություն (14.06%) և Հայաստանյաց Առաքելական Սուրբ Եկեղեցի (5%): Բանկի մասնաճյուղերի ցանցը ներառում է 34 ստորաբաժանում, որոնցից 13-ը գտնվում է Երևանում, 20-ը` Հայաստանի մարզերում, 1-ը` Արցախում: