Երեթշաբթի, 24 Հուլիսի 2018 17:39

Արմինֆո.Կառավարությունում սկսվել են Հայաստանի Հանրապետության 2019 թվականի պետական բյուջեի նախագծի մշակմանն ուղղված աշխատանքները: Մասնավորապես, «ՀՀ 2019 թ. պետբյուջեի մասին» ՀՀ օրենքի նախագծի տեքստային մասի նախնական տարբերակի վերաբերյալ իրենց առաջարկություններն են ներկայացնում նախարարություններն ու պետական մյուս գերատեսչությունները: 2019 թվականի պետական բյուջեի նախագիծը մշակվում է ծրագրային բյուջետավորման ձևաչափով: 
 

Ինչպես ԱրմԻնֆո-ին հաղորդեցին կառավարության տեղեկատվության և հասարակայնության հետ կապերի վարչությունից, վարչապետ Նիկոլ Փաշինյանն ընդգծել է, որ պետք է շեշտադրումները դրվեն ծրագրերի բովանդակության վրա և կարևորել բյուջետային ծախսերի արդյունավետության բարձրացումը:

 

Հիշեցնենք, որ նախորդ տարվա դեկտեմբերի 14-ին ԱԺ-ն ուղղումներ է կատարել «Բյուջետային համակարգի մասին՚ օրենքում և հարակից օրենքների փաթեթում, որոնց համաձայն, 2019 թվականին պետբյուջեի նախագիծը կներկայացվի ծրագրային բյուջեավորման ձևաչափով: Բյուջեի յուրաքանչյուր առաձին ծրագրի կատարման համար պատասխանատվություն կկրի համապատասխան լիազոր մարմինը: Երկարաժամկետ ծրագրեր իրագործելիս պետբյուջեի փաթեթում կներկայացվի նաև տեղեկատվություն, որը պետք է ներառի այդ նախագծերի մանրամասն բնութագրերը: Խոսքը վերաբերում է, մասնավորապես, բյուջեի ծրագրերի իրագործման ժամկետներին, պետբյուջեի վրա դրանց ազդեցությանը և առաջիկա մի քանի տարվա ակնկալիքներին: