Polymetal ընկերությունը 2018 թվականի առաջին կիսամյակում Կապանի ԼՀԿ-ում 312 հազար տոննա հանքաքար է վերամշակել

Արմինֆո. Կապանի լեռնահարստացման կոմբինատը, որը ներառված է Polymetal International plc խմբում, 2018 թվականի առաջինն կիսամյակում վերամշակել է 312 հազար տոննա հանքաքար` նախորդ տարվա առաջին կիսամյակի 246 հազար տոննայի դիմաց: Միայն II եռամսյակում վերամշակման ծավալը կազմել է 158 հազար տոննա` նախորդ տարվա նույն ժամանակահատվածի 132 հազար տոննայի դիմաց: 

Այդ մասին ասվում է ընթացիկ տարվա II եռամսյակի արտադրական արդյունքների մասին ընկերության հրապարակած հաշվետվությունում: Հաշվետվության համաձայն, II եռամսյակի արդյունքներով  1 տոննա հանքաքարում ոսկու պարունակությունը կազմել է 2.0 գրամ, ինչը 23% պակաս է 2017 թվականի II եռամսյակի արդյունքների համեմատ, արծաթի պարունակությունը կազմել է 34 գրամ (-25%), պղնձինը` 0.32% (+2%) և ցինկինը` 1.48% (+13%):

Ընդ որում, ոսկու կորզման գործակիցը  կազմել է 84.7% (- 2%), արծաթինը` 85.2% (+0%), պղնձինը` 95.8% (+5%) և ցինկինը` 86.7% (-4%): Արդյունքում` II եռամսյակում ոսկու արտադրությունը կազմել է 7.7 հազար ունցիա (առաջին կիսամյակում` 14.2 հազար), արծաթինը` 0.1 մլն ունցիա (0.2 մլն), պղնձինը` 0.4  հազար տոննա (0.8 հազար տ) և ցինկինը` 1.6 հազար տոննա (3.0 հազար տ): Ինչպես նշվում է հաշվետվությունում, ոսկու արտադրությունը II եռամսյակում փոքր-ինչ նվազել է նախորդ տարվա նույն ժամանակահատվածի համեմատ, քանի որ հանքի հարուստ մշակումներով վերին հորիզոնները ժամանակավորապես անհասանելի էին մահվան ելքով դժբախտ դեպքի պաշտոնական քննության առնչությամբ, որը տեղի էր ունեցել մարտի 2-ին: Հանքաքարի արդյունահանման ծավալները շարունակել են աճել ստորգետնյա հանքի արտադրողունակության բարձրացմանն ուղղված միջոցների շարունակվող ներդրման դրական արդյունքների ֆոնին, մասնավորապես այն բանից հետո, երբ  հանքի անձնակազմը  ձեռքով հորատումից լիովին անցել է  մեխանիզացվածի: Վերամշակման ծավալներն աճել են արդյունահանման ծավալների աճին համապատասխան:

Տարեցտարի ոսկու պարունակությունը նվազել է, քանի որ անվտանգության խնդիրների առնչությամբ ընկերությունը լիովին հրաժարվել է ձեռքով հանումից: Ընկերության կողմից շահագործվող Շահումյան հանքավայրում 2018 թվականի առաջին կիսամյակում լեռնանցման աշխատանքները (ստորգետնյա անցում) կազմել են 9, 684 մետր, նախորդ տարվա նույն ժամանակահատվածի 7,723 մետրի դիմաց: Առաջին կիսամյակում  արդյունահանվել է ընդամենը 311 հազար տոննա մետաղական հանքաքար` 2017 թվականի նույն ժամանակահատվածի 250 հազար տոննայի դիմաց: Միայն II եռամսյակում արդյունահանման ծավալները կազմել են 154 հազար տոննա, ինչը 14% գերազանցում է  2017 թվականի նույն ժամանակահատվածի ցուցանիշները: «Այս եռամսյակի գերազանց արդյունքի շնորհիվ մենք մեզ հարմարավետ ենք զգում 2018 թվականի արտադրական պլանի իրագործման առումով», -  հայտարարել է «Պոլիմետալ» խմբի գլխավոր գործադիր տնօրեն Վիտալի Նեսիսը:

2018 թվականի I կիսամյակում Polymetal ընկերությունն արտադրել է, ընդհանուր առմամբ, 619 հազար ունցիա ոսկու համարժեք, ինչը 11% ավելի է նախորդ տարվա նույն ժամանակահատվածի համեմատ և ինչը լիովին համապատասխանում է արտադրական ծրագրին: Տարվա երկրորդ կեսին արտադրության ծավալները զգալիորեն ավելի կլինեն Մայսկիում խտանյութի պաշարների սեզոնային իրացման հաշվին, ինչպես նաև արտադրության ցուցանիշներում  վերջերս գործարկված Կիզիլի առաջին ներդրման հաշվին: Եռամսյակի ընթացքում ոսկու  վաճառքի ծավալն ավելացել է 17%,  ինչն զգալիորեն փոխհատուցել է արծաթի վաճառքի ծավալի 7 տոկոս նվազումը: Ընդ որում, ընկերության հասույթը կազմել է 435 մլն ԱՄՆ դոլար, ինչը 13% ավելի է  նախորդ տարվա համեմատ: II եռամսյակում «Պոլիմետալը» ունեցել է զգալի ազատ դրամական հոսք: Մաքուր պարտքն աճել է  մոտ 75 մլն դոլարով, քանի որ վճարվել են 2017 թվականի վերջնական շահաբաժինները` 129 մլն դոլար գումար ( 0,30 դոլար 1 բաժանետոմսի դիմաց): Ինչպես և նախորդ տարիներին, ընկերությունն ակնկալում է, որ ազատ դրամական հոսքը զգալիորեն ավելի կլինի II կիսամյակում` արտադրության ծավալների աճի և շրջանառու կապիտալի ավանդական սեզոնային կրճատման շնորհիվ: «Պոլիմետալը» հաստատում է 2018 թվականի արտադրական պլանը 1,55 մլն ունցիա ոսկու համարժեք  ծավալի, ինչպես նաև դրամական ծախսերի կանխատեսումը 650-700ԱՄՆ դոլար/ունցիա ոսկու համարժեք և միագումար դրամական ծախսերը  875-925ԱՄՆ դոլար/ունցիա ոսկու համարժեք:  Հասույթի սեզոնային բնույթի պատճառով ընկերությունն ակնկալում է, որ դրամական և միագումար դրամական ծախսերը առաջին կիսամյակում կլինեն միջակայքի վերին մասին մոտ: Ծախսերի կանխատեսումը կախված է ռուբլի/դոլար փոխարժեքի դինամիկայից, որն էական ազդեցություն է գործում խմբի գործառնական ծախսերի վրա: «Պոլիմետալը» I կիսամյակի ֆինանսական արդյունքները կհրապարակի 2018 թվականի օգոստոսի 22-ին: 

Հիշեցնենք, որ «Polymetal»-ն սկսել է Հայաստանում գործունեությունը 2015 թվականից, ձեռք բե­րելով Լիճքվազ-Թեյի  ոսկու հանքավայրի  նկատմամբ ընդերքօգտագործման իրավունք ունեցող «Լիճքվազ» ՓԲԸ-ի  բաժնետոսմերը, իսկ 2016 թվականի ապրիլին` Կապանի  լեռնահարստացման կոմբինատը: Կոմբինատը ներառում է ստորգետնյա հանքը, վերամշակող ֆլոտացիոն ֆաբրիկան և ենթակառուցվածքային օբյեկտները:  «Պոլիմետալ»-ն աշխարհի խոշորագույն առաջնային արծաթ արտադրողներից է և Ռուսաստանի ոսկի արդյունահանող առաջատար երեք ընկերություններից մեկը: Այն իրականացնում է թանկարժեք մետաղների արդյունահանում, ինչպես նաև երկրաբանական հետազոտություններ Ռուսաստանում, Ղազախստանում և Հայաստանում: Polymetal Int ինքնուրույն իրականացնում է հանքավայրերի շահագործումը, սկսած երկրաբանական ուսումնասիրությունից մինչև շահագործում: Ռազմավարության առանցքային տարրը վերամշակման կենտրոնների ստեղծումն է (hubs), որոնք հնարավորություն են տալիս առավել արդյունավետ և պատասխանատու օգտագործել ֆինանսական և մարդկային ռեսուրսները, նպաստել ներդրված կապիտալի եկամտաբերության աճին: 2011-ի նոյեմբերին Polymetal Int  առաջինը ռուսական ընկերություններից, պրեմիում ցուցակում անցավ Լոնդոնի ֆոնդային բորսայում (թիքքեր POLY):