Նախարար. Ռուսական գազի գնի շուրջ բանակցությունները կսկսվեն այս տարվա նոյեմբերին

Արմինֆո. Ռուսական գազի գնի շուրջ բանակցությունները կսկսվեն այս տարվա նոյեմբերին: Այս մասին օգոստոս 29-ին կայացած մամուլի ասուլիսում հայտարարել է ՀՀ էներգետիկ ենթակառուցվածքների և բնական պաշարների նախարար Արթուր Գրիգորյանը ամփոփելով իր պաշտոնավարման 100 օրվա արդյունքները:

Ըստ նրա, տարեվերջյան լրանում է «Գազպրոմի» հետ պայմանագրի ժամկետը, որի համաձայն, մեկ խմ գազի գինը կազմում է 150 դոլար: Հայկական կողմն ակնկալում է, որ 2019 թվականին այդ սակագինը կնվազի: Արթուր Գրիգորյանը բացառել է լարվածության գոյությունը Երևանի և Մոսկվայի միջև, կապված վերջին քաղաքական զարգացումների հետ, ինչպես նաև դրա հնարավոր ազդեցությունը գազի գնի բարձրացման վրա: «Ոչ մի լարվածություն չկա, բոլոր հարցերը լուծվում են աշխատանքային կարգով», - ասել է նախարարը, հավելելով, որ, միևնույն ժամանակ, Հայաստանը գազի գծով առաջարկներ է ուղարկվել նաև Իրանին և սպասում է պատասխանին: «Մենք ամեն ինչ անում ենք, որպեսզի գազի գինը լինի ավելի ցածր, քան այսօր», - ասել է նախարարը:

Ինչպես նշել է նախարարը, գազը սպառողին հասնում է մեկ հազար խորանարդ մետրի դիմաց 255 դոլարով: Պատճառն այն է, որ այդ գնի մեջ ֆիքսված է նաև ԱԱՀ-ն, ինչպես նաև տարբեր դրույքաչափեր, որոնք կիրառվում են տարբեր սպառողների համար`ջերմատների և այլ սպառողների համար: Սակայն, ամեն դեպքում, ինչպես նշել է նախարարը, մինչև 2019 թվականի փետրվարը նախարարությունը ՀԾԿՀ-ին կներկայացնի սակագնային քաղաքականության վերաբերյալ իր առաջարկությունները: