Հայաստանում գործող 27 մետաղական հանքավայրերից 10-ում խախտումներ են արձանագրվել

Արմինֆո. Հայաստանում գործող 27  մետաղական հանքավայրերից 10-ում խախտումներ են արձանագրվել: Այդ մասին նախօրեին մամուլի ասուլիսի ժամանակ հայտարարել է ՀՀ էներգետիկ ենթակառուցվածքների և բնական պաշարների նախարար Արթուր Գրիգորյանը:

Նրա խոսքով, այդ հանքավայրերում ստուգումների արդյունքում պարզվել է, որ խախտումները հիմնականում վերաբերել են ընկերությունների կողմից իրենց հարկային պարտավորությունների չկատարմանը: Հայտնաբերված խախտումների վերացման և ստանձնած պարտավորությունների կատարման համար հանքավայրերը շահագործողներին 90 օր ժամանակ է տրամադրվել: Հակառակ դեպքում, ինչպես նշել է նախարարը, նրանք կզրկվեն լցենզիաներից:

Նշենք, որ օգտակար հանածոների պաշարների պետական հաշվեկշռում ներկայումս հաշվառված է հաստատված պաշարներով պինդ օգտակար հանածոների ավելի քան 670 հանքավայր, այդ թվում` 30 մետաղական: Նշված հանքավայրերից շահագործվում են շուրջ 400-ը` այդ թվում` 22 մետաղական:    Մետաղական օգտակար հանածոների թվում առկա են  7 պղնձամոլիբդենային, 4 պղնձի, 14 ոսկու և ոսկի-բազմամետաղային, 2 բազմամետաղային, 2 երկաթահանքային և 1 ալյումինահանքային հանքավայր: Ոչ մետաղական հանքային պաշարների հարստությամբ ու բազմազանությամբ Հայաստանի Հանրապետությունն աշխարհում առաջատար տեղ է գրավում:

Անկախ դիտորդների կարծիքով, նախկին իշխանությունները պայմանավորվածություններ են ունեցել ընդերքօգտագործողների հետ, որոնք օգտագործելով իրենց օֆշորային ընկերությունները, իջեցված գներով հանքաքարային խտանյութ են վաճառել նրանց: Իսկ վերջիններս իրենց հերթին շուկայական գներով վերավաճառել են այն վերջնական սպառողներին: Այսպիսով՝ հանրապետությունն օգտակար հանածոների վաճառքից եկամուտների գրեթե կեսը պակաս է ստացել: