Երկուշաբթի, 10 Սեպտեմբերի 2018 17:21

Արմինֆո.Վրաստանի վարչապետ Մամուկա Բախտաձեի կողմից շատ ամբիցիոզ ծրագիր է առաջարկվել՝ առաջիկայում, առաջիկա տարիների ընթացքում փոխադարձ առևտուրը, առևտրաշրջանառությունը հասցնել 1 մլրդ ԱՄՆ դոլարի մակարդակի: Այդ մասին սեպտեմբերի 10-ին Վրաստանի վարչապետի հետ հանդիպման արդյունքների համաձայն մամուլի ասուլիսի ժամանակ հայտարարել է Հայաստանի վարչապետ Նիկոլ Փաշինյանը:

 

<Այսօր մենք շատ կարևոր խոսակցություն ունեցանք և մեր բանակցությունների ընթացքում մեր հետագա հարաբերությունների զարգացման բավական ամբիցիոզ խնդիրներ ձևակերպեցինք: Իհարկե, Հայաստանի և Վրաստանի հարաբերությունները փայլուն են, շատ լավ են, և մենք խնդիր ունենք, ընդհանուր առմամբ, մեր հարաբերությունների տնտեսական կոմպոնենտը համապատասխանացնել մեր հարաբերությունների բովանդակային մակարդակին և այն էմոցիոնալ մակարդակին, որ հիմա գոյություն ունի մեր ժողովուրդների միջև: Մեր փոխայցելությունները պարբերական բնույթ են կրում, և շարունակելու են պարբերական բնույթ կրել:

 

Մենք քննարկել ենք մեր հարաբերություններին վերաբերող բազմաթիվ հարցեր՝ տրանսպորտային հարցեր, տնտեսական և քաղաքական փոխգործակցության հարցեր: Կարծում եմ, որ իսկապես ամենակարևոր արձանագրումն այն է, որ այս այցի արդյունքներով մենք նոր խթան կհաղորդենք մեր քաղաքական, հումանիտար և տնտեսական հարաբերություններին:

 

Վրաստանի վարչապետի կողմից շատ ամբիցիոզ ծրագիր է առաջարկվել, և մենք լիովին պաշտպանում ենք այդ ծրագիրը: Կոնկրետ խնդիր է ձևակերպվել՝ առաջիկայում, առաջիկա տարիների ընթացքում փոխադարձ առևտուրը, առևտրաշրջանառությունը հասցնել 1 մլրդ ԱՄՆ դոլարի մակարդակի: Սա մի կոնկրետ թեմա է, որի նկատմամբ բոլորս կարող ենք դիրքավորվել, ունենալ հստակ ճանապարհային քարտեզ և հստակ, պայմանավորված քայլերով գնալ դեպի այդ խնդրի լուծումը:

 

Մենք պայմանավորվեցինք, որ առաջիկայում տեղի կունենա Հայ-վրացական միջկառավարական հանձնաժողովի նիստը, և այդ հանձնաժողովի առաջ կդրվի կոնկրետ խնդիր, և մինչև այդ էլ մեր կառավարությունների առաջ այդ խնդիրը կդրվի՝ ձևավորել կոնկրետ ճանապարհային քարտեզ մեր առևտրատնտեսական հարաբերությունները զարգացնելու, մեր քաղաքական հարաբերությունները, ինչպես նաև հումանիտար, մշակութային, կրթական հարաբերությունները զարգացնելու համար:

 

Ամեն դեպքում կարող ենք արձանագրել, որ ամեն այցի հետ մեր երկրների հարաբերությունների մակարդակն ավելի է բարձրանում, մթնոլորտն ավելի բարեկամական և ավելի ջերմ է դառնում, և մեր կառավարությունների անդամների միջև հաստատվում, ամրապնդվում են բարեկամական, ընկերական կապեր, ինչը պակաս կարևոր չէ երկրների հարաբերություններում: Այս տեմպը պետք է անպայման շարունակել և վստահ քայլելով գնալ առաջ>,- ասել է Փաշինյանը:

Նշենք, որ Հայաստանի և Վրաստանի միջև արտաքին առևտրաշրջանառությունը  2017 թ. կազմել է $ 249 մլն՝ 1.5% տարեկան աճով: Ըստ որում, արտահանումը կազմել է  $155.2 մլն՝ 5.6% տարեկան աճով, ներմուծումը՝ $93.8 մլն՝ անկումը 4.6%: 

 

Մինչդեռ Հայաստանի և Վրաստանի միջև արտաքին ապրանքաշրջանառությունը 2018 թ. հունվար-հուլիսին կազմել է $ 73.7 մլն՝ անկումը 44.3%: Արտահանումը կազմել է  $34.5 մլն՝ անցած տարվա նույն ժամանակաշրջանի համեմատ անկումը 57.6% ներմուծումը ՝$39.2 մլն, անկումը 23.1%: