Արմինֆո. Վարչապետ Նիկոլ Փաշինյանն ընդունել է «Ռոսատոմ» կորպորացիայի գլխավոր տնօրեն Ալեքսեյ Լիխաչովին:
Ինչպես ԱրմԻնֆո-ին հաղորդեցին Հայաստանի կառավարության տեղեկատվության և հասարակայնության հետ կապերի վարչությունից, Նիկոլ Փաշինյանը կարևորել է Հայաստանի ու Ռուսաստանի միջև էներգետիկայի ոլորտում համագործակցության հետագա զարգացումը և գոհունակություն հայտնել երկկողմ փոխգործակցության մակարդակից: Վարչապետը նշել է, որ ՀՀ կառավարությունը մեծապես կարևորում է երկրում ատոմային էներգետիկայի զարգացումը և հույս հայտնել, որ այդ ուղղությամբ փոխգործակցությունը ռուսական կողմի հետ առավել արդյունավետ կերպով կշարունակվի: Նիկոլ Փաշինյանն ընդգծել է, որ հայ-ռուսական հարաբերություններում ավարտվել է հետհեղափոխական անցումային փուլը, առկա է լիարժեք փոխըմբռնում և հավելել, որ ՀՀ կառավարությունը շահագրգռված է երկկողմ փոխգործակցության շարունակական ընդլայնմամբ ու խորացմամբ:
Զրուցակիցներն անդրադարձել են «Ռոսատոմ»-ի հետ համագործակցությամբ իրականացվող ՀԱԷԿ-ի երկրորդ էներգաբլոկի շահագործման ժամկետի երկարաձգման աշխատանքների ընթացքին:
Ալեքսեյ Լիխաչովը նշել է, որ աշխատանքներն ընթանում են ըստ սահմանված ժամանակացույցի և հավելել, որ ՀԱԷԿ-ի ծրագիրն էներգետիկ ոլորտում երկու պետությունների համագործակցության կարևորագույն ծրագրերից մեկն է: Այնուհետև «Ռոսատոմ»-ի գլխավոր տնօրենը վարչապետին է ներկայացրել աշխատանքների միջանկյալ արդյունքները, անդրադարձել հետագա անելիքներին: «Ռոսատոմի՚ մամուլի ծառայության հաղորդման համաձայն, նա հաղորդել է, որ ռուսական պետական կորպորացիան աննախադեպ սեղմ ժամկետում արդիանակացնում է ՀԱԷԿ երկրորդ էներգաբլոկը: «Հասկանալով ԱԷԿ կարևոր դերը երկրի համար, «Ռոսատոմ՚ պետական կորպորացիան առաջնային նշանակություն է տալիս նախագծին` դրանում ներդնելով իր ողջ գործնական փորձը՚, - հավելել է Լիխաչովը:
Կողմերը մտքեր են փոխանակել նաև Հայաստանում ատոմային էներգետիկայի զարգացման հեռանկարների շուրջ, քննարկել են համագործակցությունը հումանիտար ոլորտում և Հայաստանի ատոմային ճյուղի կադրերի պատրաստման գործում, պայմանավորվել են ուժեղացնել փոխգործակցությունը Հայաստանում ատոմային էներգետիկայի ժողովրդականացման գործում: