Ալավերդու պղնձաձուլական գործարանի հարցը կլուծվի Լոռու մարզի կայուն զարգացման համատեքստում

Արմինֆո.Հայաստանի կառավարությունը մտադիր է Ալավերդու պղնձաձուլական գործարանի հարցը լուծել Լոռու մարզի կայուն զարգացման համատեքստում՝ շրջակա միջավայրի պահպանության պահանջներին համապատասխան: Այդ մասին ԱրմԻնֆո-ի թղթակցին հայտարարել է ՀՀ փոխվարչապետ Տիգրան Ավինյանի մամուլի քարտուղար Վահան Հունանյանը:

Նախօրեին տեղի է ունեցել փոխվարչապետի պաշտոնակատար Տիգրան Ավինյանի և < Vallex> ընկերությունների խմբի նախագահ Վալերի Մեժլումյանի հանդիպումը: Հանդիպման ընթացքում քննարկվել են Ալավերդու պղնձաձուլական գործարանի սեփականատիրոջ առաջարկները: Կողմերն անդրադարձել են նաև չինական ներդրումների հիման վրա նոր գործարան կառուցելու ծրագրին, որը կհամապատասխաներ պղնձի՝ էկոլոգիական առումով անվտանգ արտադրության ժամանակակից ստանդարտներին: <Կառավարության հիմնական մտահոգությունն այսօր կապված է ինչպես մարզի բնակիչների սոցիալական խնդիրների լուծման, այն է՝ նրանց աշխատատեղերով ապահովման, այնպես էլ՝ բնապահպանական օրենսդրության նորմերի խիստ պահպանման հետ>,- հայտարարել է փոխվարչապետի մամուլի քարտուղարը: Կառավարությունն աշխատելու է նոր ներդրումնեի ներգրավման, նոր աշխատատեղերի ստեղծման և Լոռու մարզի համայնքների կայուն զարգացման ուղղությամբ: Հանդիպման արդյունքների և հնարավոր պայմանավորվածությունների մասին այլ մանրամասներ չեն հաղորդվում:

Մինչդեռ, ինչպես ԱրմԻնֆո-ի թղթակցի հետ զրույցում հայտնել է < Vallex>-ի աշխատակից Գարեգին Անթաշյանը, հանդիպման ընթացքում լուծումներ են տրվել ձեռնարկության բնապահպանական խնդիրներին: Թե ինչպես, ԱրմԻնֆո-ի զրուցակիցը ձեռնպահ է մնացել նշելուց, քանի որ <մանրամասներին չի տիրապետում>: < SOS Ալավերդի> նախաձեռնության անդամ Օլեգ Դուլգարյանն ԱրմԻնֆո-ին հայտարարել է, որ ներկայումս Ալավերդու պղնձաձուլական գործարանի աշխատակիցները զերծ են մնում որևէ ակցիայից՝ սպասելով հանդիպման արդյունքների մասին ավելի հստակ տեղեկատվության:

Նախօրեին, <Վալլեքս> խմբի ընկերությունները հայտնել են, որ 2018թ.  հոկտեմբերի 19-ից կասեցվել  են «Էյ-Սի-Փիե ընկերության Ալավերդու պղնձաձուլական գործարանի աշխատանքները (Ալավերդիում պղնձարտադրությունն իր 250-ամյա պատմության ընթացքում կանգ է առել չորս անգամ): Հիմնական պատճառը բնապահպանական խնդիրներ են, այսինքն՝ ձեռնարկության կողմից ծծմբի երկօքսիդի արտանետումների թույլատրելի նորմերի խախտումները, ինչի հետևանքով ձեռնարկությունը տուգանվել է և վերջինից պահանջվում է մինչև ընթացիկ տարվա դեկտեմբերի 25-ը արտանետումների քանակը նվազեցնել 90%-ով:  Միաժամանակ տեղեկացվում է, որ Թեղուտի լեռնահանքային համալիրի կառուցման նպատակով ՎՏԲ բանկից ներգրավված վարկային միջոցների դիմաց ՎՏԲ Բանկը պահանջել է գրավադրել իր վարկի գծով այլ երաշխավորությունների հետ մեկտեղ նաև «Էյ-Սի-Փիե ընկերության ակտիվներն ու բաժնետոմսերը, սակայն վերջիներիս հետ կապված Բանկի գրավի իրավունքի իրացման իրավական գործընթացներ դեռևս չեն իրականացվել:

Հիշեցնենք, որ ձեռնարկության փակման դեպքում շուրջ 630 մարդ գործազուրկ կմնա: Մինչդեռ, ինչպես հայտարարում են բնապահպանները, կոմբինատի աշխատանքը ներկայիս տեսքով հղի է բնապահպանական հետևանքներով և մարզի բնակիչների համար առողջական խնդիրներով:

Նշենք, որ «Վալլեքս Գրուպ» ՓԲԸ (Vallex Group) հիմնադրվել է 1998 թվականին և միավորում է 20 դուստր և փոխկապակցված ընկերություններ: Դրանց թվում են «Թեղուտ» ՓԲԸ-ն, որն ստեղծվել է 2006 թվականին, բաժնետոմսերի լրիվ փաթեթը պատկանում է կիպրոսյան «Թեղուտ Ինվեսթմենթս Լիմիթիդ» ՓԲԸ-ին, որի քվեարկող բաժնետոմսերի 100 տոկոսը պատկանում է «Արմենիան քոփր Փրոգրամ» ՓԲԸ-ին, որի սեփականատերը Վալերի Մեջլումյանն է, ինչպես նաև` «Բեյզ Մեթըլս» ՓԲԸ-ն, որը շահագործում է Արցախի  Մարտակերտի շրջանում գտնվող Դրմբոնի պղինձ-ոսկու հանքավայրը, «Armenian Copper Programme» ՓԲԸ (ACP), որը շահագործում է Ալավերդու պղնձաձուլման կոմբինատը, որտեղ արտադրվում է սև պղինձ: