Երկու մրցանակ Ամերիաբանկին՝ ՆԱՍԴԱՔ ՕԷՄԷՔՍ Արմենիայի և Հայաստանի կենտրոնական դեպոզիտարիայի «Լավագույն անդամ 2017» մրցանակաբաշխությունում  

Արմինֆո. Ամերիաբանկին շնորհվել է երկու մրցանակ ՆԱՍԴԱՔ ՕԷՄԷՔՍ Արմենիայի և Հայաստանի կենտրոնական դեպոզիտարիայի «Լավագույն անդամ 2017» մրցանակաբաշխությունում:

Ինչպես տեղեկացրել է Ամերիաբանկի մամուլի ծառայությունը, Բանկը հաղթող է ճանաչվել «Դեպոզիտար համակարգի լավագույն հաշվի օպերատոր - պահառու օտարերկրյա արժեթղթերի շուկայում» և «Կարգավորվող շուկայի հաշվարկային համակարգի լավագույն անդամ» անվանակարգերում:      

Նշենք, որ ՆԱՍԴԱՔ ՕԷՄԷՔՍ Արմենիայի և Հայաստանի կենտրոնական դեպոզիտարիայի կողմից անցկացվող «Լավագույն անդամ» ամենամյա մրցանակաբաշխության նպատակն է խրախուսել Բորսայում և Դեպոզիտարիայում ակտիվ ներգրավվածություն ունեցող, Հայաստանում կապիտալի շուկայի զարգացմանն ու կատարելագործմանն ուղղված միջոցառումներին մասնակցող, ինչպես նաև մասնագիտական էթիկայի կանոններին հավատարիմ ներդրումային ծառայություններ մատուցող ընկերություններին:  

Մրցանակաբաշխությունը տեղի է ունենում 9-րդ տարին անընդմեջ: Հաղթողին ընտրելու համար հաշվի են առնվում ՆԱՍԴԱՔ ՕԷՄԷՔՍ Արմենիա-ում կայացած գործարքների քանակը, ծավալները և արդյունավետությունը: Շուկայում լավագույն դիլերն ընտրվում է ՆԱՍԴԱՔ ՕԷՄԷՔՍ Արմենիա-ի անդամ հանդիսացող բանկերի և ներդրումային կազմակերպությունների դիլերների ընդհանուր քվեարկության հիման վրա:

Ըստ ԱրմԻնֆո գործակալության` Հայաստանի բանկերի Ֆինանսական վարկանիշի 2018 թվականի հուլիսի 1-ի արդյունքների, Ամերիաբանկը պետական ​​պարտատոմսերում կատարած ներդրումների 53.1 մլրդ դրամ (110.1 մլն դոլար) ծավալով գտնվում է առաջատարների եռյակում: Ամերիաբանկը առաջատարն է նաև իր սեփական պարտատոմսերի տեղաբաշխման արդյունքում ներգրավված միջոցների ծավալով`48 մլրդ դրամ (99.5 մլն դոլար), տարեկան 64.1% աճով:

Նշենք, որ Ամերիաբանկն իր թողարկած կորպորատիվ արժեկտրոնային պարտատոմսերի քանակով զբաղեցնում է երկրորդ տեղը շուկայում: 2018 թ. հոկտեմբերի 23-ի դրությամբ  ՆԱՍԴԱՔ ՕԷՄԷՔՍ Արմենիա ֆոնդային բորսայում ցուցակվել են Ամերիաբանկի պարտատոմսերի 9 տրանմշերը`7 դոլարային, 1 եվրոյով և 1 ՀՀ դրամով: Այսօրվա դրությամբ ֆոնդային բորսայում շրջանառվող Ամերիաբանկի պարտատոմսերի 7 դոլարային տրանշերի ընդհանուր ծավալը կազմում է 63 մլն դոլար, 1 դրամայինի ծավալը` 1 մլրդ դրամ, իսկ 1 եվրոյով տրանշի ծավալը` 3 մլն եվրո: Նշված թողարկումներով մարումները նախատեսված են 2018-2022 թվականներին, ընդ որում, 2018 թվականի նոյեմբերին լրանում է դրամով պարտամոմսերի շրջանառության ժամկետը, իսկ 2019 թվականի հոկտեմբերին`եվրոյով տրանշի  և 3 դոլարային տրանշերի (փետրվար, մայիս և օգոստոս) ժամկետները: Բացի այդ, 2016 թ. հունիսին Ամերիաբանկն իր ներդրումային կառավարչի միջոցով, ի դեմս responsAbility Investments AG ընկերության, հաջողությամբ տեղաբաշխեց իր 20 մլն.դոլար ծավալով պարտատոմսերը, լյուքսեմբուրգյան 4 ներդրումային հիմնադրամներում, իսկ մեկ տարի անց Cbonds առաջատար ֆինանսական գործակալության վարկածով ճանաչվեց Հայաստանի լավագույն ներդրումային բանկ:

Հիշեցնենք, որ «Ամերիաբանկ» ՓԲԸ-ն ունիվերսալ բանկ է, որը ներդրումային, կորպորատիվ և մանրածախ բանկային ծառայություններ է տրամադրում բանկային լուծումների համապարփակ փաթեթի տեսքով: Բանկը գործում է հայկական շուկայում 1996 թվականի հոկտեմբերի 31-ից: Վերջին տվյալների համաձայն, Ամերիաբանկի բաժնետերերն են`Ameriya Group CY Ltd.- 56.6%, ՎԶԵԲ - 17.8%, Ասիական զարգացման բանկ - 13.98%, ESPS Holding Limited - 11.62%: 2018 թվականի հուլիսի 1-ի դրությամբ Ամերիաբանկն ուներ 16 մասնաճյուղ, , որից 10-ը Երևանում, իսկ 6-ը մարզերում: