Երեթշաբթի, 30 Հոկտեմբերի 2018 15:49

Արմինֆո. Polymetal International plc կնքել է իրավաբանորեն պարտավորեցնող համաձայնագիր Chaarat Gold Holdings Limited-ի հետ (AIM:CGH) (դուստր ձեռնարկությունների հետ միասին այսուհետ՝  «Chaarat») Հայաստանի Հանրապետությունում «Կապանի ԼՀԿ» ՓԲ ընկերության (այսուհետ՝ Կապանի ԼՀԿ) վաճառքի վերաբերյալ ընդհանուր US$ 55 մլն վճարի դիմաց (այսուհետ՝ Գործարք).

 

«Կապանի ԼՀԿ-ի վաճառքը Պոլիմետալի ակտիվների ծավալի կրճատմանն ուղղված քայլ է, որի նպատակը խոշոր երկարաժամկետ ծրագրերի վրա կենտրոնանալն է, – հայտարարել է Պոլիմետալ խմբի գլխավոր գործադիր տնօրեն Վիտալի Նեսիսը. – Գործարքը անհապաղ օգուտներ կբերի՝ հանգեցնելով ծախսերի և պարտքային բեռի կրճատման: Պոլիմետալի անունից շնորհակալություն եմ հայտնում Կապանի ԼՀԿ-ի թիմին ջանադիր և անձնվեր  աշխատանքի համար և մաղթում եմ ամենայն բարիք ապագայում».

 

Գործարքի մանրամասները

Հիմնական պայմանները.

• Կապանի ԼՀԿ-ի համար ընդհանուր վճարը կկազմի US$ 55 մլն՝ ճշգրտված ըստ շրջանառու միջոցների մակարդակի և ըստ այլ ճշգրտումների: Դա կազմում է US$ 99՝ հանքային պաշարների ոսկու համարժեքի մեկ ունցիայի դիմաց:
• Վճարումը կլինի դրամական միջոցներով՝ Գործարքի ավարտման պահին, ընդ որում՝ Chaarat-ը հնարավորություն կունենա մինչև US$ 5 մլն վճարել Chaarat-ի փոխարկելի պարտատոմսերով՝ 2021թ. մարումով:
• Գործարքի ավարտման պայմաններն են. Chaarat-ի կողմից վճարման համար ֆինանսավորման ներգրավումը և կարգավորող մարմիններից հավանությունների ստացումը, այդ թվում՝ Հայաստանի Հանրապետության հակամենաշնորհային մարմիններից: Ակնկալվում է, որ Գործարքի ավարտումը կլինի 2019թ. առաջին եռամսյակում, սակայն ամեն դեպքում ոչ 2019թ. փետրվարի 15-ից հետո:
• Գործարքից հրաժարման համար Պոլիմետալը կստանա US$ 10 մլն կոմիսիոն վճար այն դեպքում, եթե գործարքը, անկախ պատճառից, չի ավարտվի մինչև 2019թ. փետրվարի 15-ը: Ընդ որում՝ այդ կոմիսիոն վճարի US$ 5 մլն-ը կվճարվեն առուվաճառքի համաձայնագրի կնքումից հետո 10 աշխատանքային օրվա ընթացքում՝ որպես գործարքի կանխավճար:
• Պոլիմետալը կտրամադրի Chaarat-ին Գործարքի ավարտման պահից 6 ամսվա ընթացքում բացառիկ և 12 ամսվա ընթացքում առաջնահերթ գնման իրավունք Հայաստանում Պոլիմետալի այլ ակտիվների նկատմամբ՝ ներառյալ «Լիճքվազ» ՓԲ ընկերությունը:

 

ԳՈՐԾԱՐՔԻ ՌԱԶՄԱՎԱՐԱԿԱՆ ՀԻՄՆԱՎՈՐՈՒՄԸ

Կապանի ԼՀԿ-ի վաճառքը համապատասխանում է խոշոր, շահագործման երկար ժամկետներով  ձեռնարկությունների վրա կենտրոնանալու Պոլիմետալի ռազմավարությանը:

Կապանի ԼՀԿ-ի կողմից շահագործվող հանքավայրը Պոլիմետալի փաթեթում ամենափոքրն է, ծախսերի ամենաբարձր մակարդակով, ընդ որում՝

• 2018թ. հունվարի 1-ի դրությամբ հանքավայրի պաշարները կազմել են Խմբի պաշարների 3%-ը (0,5 մլն ունցիա ոսկու համարժեք)
• Կապանի ԼՀԿ-ի արտադրությունը Խմբի արտադրության մոտ 3 %-ն է (2018թ. սեպտեմբերի 30-ին ավարտված 12 ամսում՝ 51 հազ. ունցիա ոսկու համարժեք) և 2019թ. Խմբի ակնկալվող տարեկան արտադրության 5%-ը (մոտ 90 հազ. ունցիա ոսկու համարժեք՝ ներառյալ Լիճքվազ-Թեյի հանքավայրից հանքաքարի վերամշակումը)
• 2018թ. հունիսի 30-ին ավարտված 12 ամիսների հաշվարկով՝ Կապանի ԼՀԿ-ի ճշգրտված EBITDA¹-ն կազմում է Խմբի ճշգրտված EBITDA¹-յի 3%-ը (US$ 22 մլն):
• 2018թ. սեպտեմբերի 30-ի դրությամբ Կապանի ԼՀԿ-ի աշխատողների քանակը կազմում է Խմբի աշխատողների քանակի 7%-ը:

2017թ. Կապանի ԼՀԿ-ի (առանց Լիճքվազի) դրամական ծախսերը և համախառն դրամական ծախսերը 1 ունցիա ոսկու համարժեքի համար կազմել են US$ 871 և US$ 1 292, ինչը բարձր է Պոլիմետալի ծախսերի միջին ցուցանիշից՝ US$ 650 և US$ 877 (առանց Կապանի ԼՀԿ-ի) ¹:

Պոլիմետալը ձեռք է բերել Կապանի ԼՀԿ-ն 2016թ. ապրիլին US$ 38 մլն-ով, որը ներառում է US$ 9 մլն արդարացված արժեքով ռոյալթի Կապանի ԼՀԿ-ի՝ արտադրությունից ստացված զուտ շահույթից (Net Smelter Return)՝ ձեռք բերման պահին: Ընկերությունն ակնկալում է, որ գործարքի արդյունքում հաշվապահական շահույթը կկազմի մոտ US$ 3 մլն: Պոլիմետալը ծրագրում է Կապանի ԼՀԿ-ի վաճառքից դրամական մուտքերն օգտագործել պարտքի նվազեցման համար:

Scotiabank Europe plc-ն հանդես է եկել որպես Պոլիմետալի ֆինանսական խորհրդատու:

Պոլիմետալի մասին

Պոլիմետալը (LSE, Մոսկովյան բորսա: POLY, ADR: AUCOY) (իր դուստր ընկերությունների հետ միասին՝ Պոլիմետալ, Ընկերություն կամ Խումբ) խոշորագույն 20 ոսկի և խոշորագույն 5 արծաթ արտադրողներից է աշխարհում, ակտիվներ ունի Ռուսաստանում, Հայաստանում և Ղազախստանում: Ընկերությունը համադրում է աճի նշանակալի տեմպերը կայուն դիվիդենդային եկամտաբերության հետ: