Կոնվերս բանկի աջակցությամբ Երևանում կանցկացվի SME Banking Club –ի սեմինար, «Գլոբալ զարգացման միտումներ և ՓՄՁ վարկավորման հնարավորություններ» թեմայով

Արմինֆո. Նոյեմբերի 9-ին  Երևանում կկայանա SME Banking Club –ի հերթական սեմինարը՝    նվիրված ՓՄՁ ոլորտի զարգացման համաշխարհային միտումներին և տնտեսության որոշ ոլորտներում գործող  ՓՄՁ վարկավորման հնարավորություններին: Սեմինարը անցկացվում է Կոնվերս Բանկի նախաձեռնությամբ և աջակցությամբ: Այս մասին տեղեկացրել է Բանկի մամուլի ծառայությունը:

«SME Banking Club-ը բիզնես-բանկիրների միջազգային  մասնագիտական ցանց է, որի նպատակը ՓՄՁ վարկավորում իրականացնող լոկալ, տարածաշրջանային, գլոբալ բանկերի և  ֆինանսական կազմակերպությունների մասին տեղեկատվության, ինչպես նաև այդ ոլորտում ֆինանսավորման փորձի փոխանակումն է: SME Banking Club-ը համագործակցում է միջազգային ֆինանսական կազմակերպությունների, ֆինանսական կառույցների՝ այդ թվում առևտրային բանկերի հետ, որոնք, ՓՄՁ-երին ֆինանսական և ոչ ֆինանսական տարաբնույթ ծառայությունների մատուցման միջոցով, փորձում են բարձրացնել իրենց ֆինանսական ծառայությունների արժեքը և հասնել որակական նոր բարձունքների»,- ասել է SME Banking Club-ի հիմնադիր, Գլխավոր գործադիր տնօրեն Անդրեյ Գիդուլյանը:

2010թ ի վեր SME Banking Club-ը պարբերաբար տարածաշրջանային և միջազգային բանկային միջոցառումներ է իրականացրել Լեհաստանում, Վրաստանում, Ուկրաինայում, Ղազախստանում և Եգիպտոսում:

«Սա SME Banking Club-ի  հետ Կոնվերս Բանկի համագործակցության շրջանակներում առաջին  սեմինարն է Հայաստանում, որի նպատակը ոչ միայն  ՓՄՁ  ոլորտի զարգացման միտումների մասին համապարփակ տեղեկատվության փոխանցումն է մասնակիցներին: Մենք ակնկալում են, որ արդյունքում կստեղծվի Հայաստանում հարթակ, որի շրջանակներում արդյունավետ համագործակցությունը հիանալի նախադրյալ կդառնա ՓՄՁ ֆինանսավորման ոլորտի հետագա զարգացման համար»,-ասել է Կոնվերս Բանկի Կորպորատիվ բիզնեսի դեպարտամենտի տնօրեն Ռոստոմ Բադալյանը:

Երևանյան սեմինարին կմասնակցեն հյուրեր արտերկրից և  ՀՀ բանկային համակարգից: Մասնավորապես, որպես բանախոսներ հանդես կգան SME Banking Club_ի հիմնադիր Անդրեյ Գիդուլյանը, ինչպես նաև ոլորտի փորձագետներ Ալեքսեյ Սայապինը, Իվան Երկոն և  Միխայիլ Մեդկոն՝ զեկույցներ ներկայացնելով ՓՄՁ  բանկինգի զարգացման միջազգային ամենաարդիական միտումների, ՓՄՁ ագրոսեկտորի վարկավորման,էներգաարդյունավետ և այլընտրանքային էներգետիկայի ֆինանսավորման վերաբերյալ:

Աղբյուրի համաձայն, մասնակցության համար անհրաժեշտ է նախապես գրանցվել՝ ուղարկելով հայտ [email protected] էլեկտրոնային հասցեին կամ SME Banking Club-ի ֆեյսբուքյան էջին : Սեմինարին մասնակցությունը անվճար է:

ԱրմԻնֆո-ի կողմից պատրաստված`Հայաստանի բանկերի Ֆինանսական վարկանիշի 2018 թվականի հուլիսի 1-ի արդյունքների, Կոնվերս Բանկի ՓՄՁ-ների վարկավորման պորտֆելը հասել է 29,9 մլրդ դրամի (ավելի քան $ 62 մլն), տարեկան աճը`32,3%: Միայն 2018 թվականի առաջին կիսամյակում բանկի այս պորտֆելի աճը կազմել է 23.4%: Կոնվերս Բանկը թե տարեկան, և թե կիսամյակային աճով շարունակում է մնալ առաջատարների հնգյակում: Բանկի վարկային պորտֆելում ՓՄՁ-ի վարկերի մասնաբաժինը կազմել է ավելի քան 17%, իսկ շուկայում ՓՄՁ-ներին տրամադրված վարկերի ընդհանուր ծավալում Կոնվերս Բանկի մասնաբաժինը գերազանցել է 4% -ը:

Հիշեցնենք, որ Կոնվերս բանկը գործում է հայկական շուկայում 1996 թվականի սեպտեմբերից: Բանկի բաժնետերերն են` «Ըդվանսդ Գլոբալ Ինվեսթմենթսե ԷլԷլՍի (80,94%), «ՀայՓոստ Թրասթ Մենեջմենթե Բի. ՎԻ. Ընկերություն (14.06%) և Հայաստանյաց Առաքելական Սուրբ Եկեղեցի (5%): Բանկն ունի 34 մասնաճյուղ, որից 13-ը գտնվում է Երևանում, 20-ը `Հայաստանի մարզերում և 1-ը` ԼՂՀ-ում:-