Լիդիան. 920 883 ԱՄՆ դոլար Ամուլսարի հարակից համայնքներին

Արմինֆո.

Լիդիանը շարունակում է հավատարիմ մնալ թափանցիկ և հաշվետու գործելաոճին և տարեվերջին, ավանդույթի համաձայն, հրապարակում է համայնքներին արված վճարումները: Չնայած Ամուլսարի ծրագիր տանող ճանապարհների ապօրինի շրջափակմանը, ինչի հետևանքով Ծրագիրը փաստացի կասեցված է արդեն գրեթե 6 ամիս՝ Լիդիանը շարունակել է պատշաճ իրականացնել Ամուլսարի ծրագրի ենթակառուցվածքների համար հողի վարձակալության դիմաց վճարումները շրջակա համայնքների բյուջեներ:

Այսպես, 2018թ. Լիդիանը հողի վարձակալության դիմաց վճարել է ընդհանուր 920 883 ԱՄՆ դոլարին համարժեք դրամ, որից՝ Ջերմուկ/Գնդեվազ – 403 701 ԱՄՆ դոլարին համարժեք դրամ. Զառիթափ/Սարավան – 265 955 ԱՄՆ դոլարին համարժեք դրամ, Գորայք – 251 227 ԱՄՆ դոլարին համարժեք դրամ: Այս փոխանցումները մի քանի անգամ գերազանցում են այս համայնքեր վճարվող պետական դոտացիաները:

2008-2018թթ. ընթացքում հողի վարձակալության դիմաց Լիդիանն այս համայքներին վճարել է ընդհանուր առմամբ 5,1 մլն ԱՄՆ դոլար:

Ամուլսարի ծրագրի տնտեսական ազդեցությունը շրջակա համայնքների վրա դժվար է թերագնահատել: Մինչ ճանապարհների ապօրինի շրջափակումը Ամուլսարի ծրագրում աշխատում էր մոտ 1400 մարդ, որից 428-ը շրջակա համայնքներից: Այսօր այս մարդկանց զգալի մասը դարձել է գործազուրկ:

Միայն Լիդիանի կապալառու ընկերությունները 2017-18թթ. ընթացքում տեղի համայնքներից կատարել են ավելի քան 2,2 մլն ԱՄՆ դոլարի գնումներ: Գնումների 75%-ը իրականացվել է Ջերմուկ և Գնդեվազ համայնքներում՝ հիմնականում վառելիքի, սպասարկման, հյուրանոցների և տրանսպորտի ոլորտներում:  

2008թ.-ից սկսած այս համայքներում սոցիալական զարգացման ծրագրերում Լիդիանն իրականացրել է ընդհանուր առմամբ 3,7 մլն ԱՄՆ դոլարի ներդրում: Այս ծրագրերի արդյունքում նորոգվել և բարեկարգվել են համայնքային նշանակության ենթակառուցվածքներ՝ ճանապարհներ, ոռոգման և ջրամատակարարման համակարգեր, կրթական հաստատություններ և այլն, ներդրվել են գյուղատնտեսական նորարարական ծրագրեր, աջակցություն է ցուցաբերվել  համայնքներում փոքր բիզնեսի զարգացմանը, որի համար ներդրվել է 130 000 ԱՄՆ դոլար: Այս պահի դրությամբ, Ամուլսարի ճանապարհների ապօրինի շրջափակման հետևանքով այս ծրագրերի մեծ մասը կասեցված է:

Հիշեցնենք, որ Lydian Armenia-ն բրիտանական Lydian International-ի դուստր ընկերությունն է, որի բաժնետերերն են նաև ԱՄՆ, Մեծ Բրիտանիայի, մի շարք եվրոպական երկրների միջազգային ինստիտուցիենալ ներրդողներ, այդ թվում` IFC և EBRD: Ամուլսարի ոսկու հանքավայրի շահագործման նախագիծն այսօր Հայաստանում արդյունաբերական ամենախոշոր նախագիծն է, որի ընդհանուր արժեքը կազմում է 370 մլն դոլար: 2016 թվականի օգոստոսին տեղի ունեցավ նախագծի մեկնարկի պաշտոնական արարողությունը, որը նախատեսում է շինարարության և հանքավայրի իրացման սկիզբը: Ամուլսարի հանքավայրի շահագործման ժամկետը կկազմի 10 տարի և 4 ամիս, նախատեսվում է տարեկան արդյունահանել 200 հազար ունցիա ոսկի (մոտ 10 մլն. տոննա հանքանյութ): Ընկերության բաժնետոմսերը ցուցակված են Տորոնտոյի ֆոնդային բորսայում: Ամուլսարի հանքավայրն իր պաշարնորով երկրորդն է Հայաստանում: