Ուրբաթ, 28 Դեկտեմբերի 2018 13:23

Արմինֆո. Եվրասիական զարգացման բանկը (ԵԱԶԲ) 20 մլն դոլարի վարկ կտրամադրի «Հայաստանի էլեկտրական ցանցեր՚ ՓԲԸ-ին (ՀԷՑ): Վարկային համաձայնագրի ստորագրման արարողությունը տեղի է ունեցել դեկտեմբերի 28-ին Երևանում: Փաստաթղթի ներքո իրենց ստորագրություններն են դրել ՀԷՑ գլխավոր տնօրեն Կարեն Հարությունյանը և ԵԱԶԲ արդյունաբերության և էներգետիկայի բլոկի ղեկավար Վսեվոլոդ Սմակովը:

 

Պատասխանելով ավելի վաղ հայտարարված 100 մլն դոլարի վարկային պորտֆելի մինչև 20 մլն դոլար կրճատման պատճառների վերաբերյալ ԱրմԻնֆո-ի հարցին` Վսեվոլոդ Սմակովն ընդգծել է, որ այսօր խոսք է գնում ընդամենը առաջին քայլի մասին: ԵԱԶԲ մասնակցում է ՀԷՑ արդիակնացման ծրագրին այլ ֆինանսական կազմակերպությունների`  ՎԶԵԲ և ԱԶԲ  հետ գործընկերության պայմաններում: Վարկային համաձայնագրի պայմանները թեև արտոնյալ չեն, սակայն, ընդունելի են: Վսեվոլոդ Սմակովի ասելով, միջոցները կուղղորդվեն ցանցային տնտեսության վերակառուցմանը, էլեկտրաէներգիայի հաշվառման համակարգի բարելավմանը և, որպես հետևանք, ընկերության ֆինանսական վիճակի որակական փոփոխմանը:

 

ՀԷՑ գլխավոր տնօրեն Կարեն Հարությունյանն, իր հերթին, ԱրմԻնֆո-ին հաղորդել է, որ ներգրավվող ռեսուրսները կուղղորդվեն ընկերության 726 մլն դոլար արժողությամբ (չհաշված ԱԱՀ) 10-ամյա ներդրումային ծրագրի իրագործմանը: Ֆինանսավորման նախագծի որոշ աղբյուրներ արդեն հայտնի են, մյուսների շուրջ ընթանում են քննարկումներ: Կարեն Հարությունյանն ընդգծել է, որ առաջիկա փետրվարից ակնկալվող էլեկտրաէներգիայի սակագների նվազումը չի անդրադառնա ընկերության գործունեության և ներրդումային պորտֆելի վրա: «Մինչև վարկերի տրամադրումը ներդրողները գնահատում են հնարավոր բոլոր ռիսկերը, այդ թվում, սակագների նվազման հնարավորությունը: Բացի այդ, էլեկտրական ցանցերը իրենց գործունեությունում ղեկավարվում են մարժայի չափով, որը կարգավորվում է օրենսդրությամբ և ենթաօրենսդրական ակտերով՚, - նշել է գլխավոր տնօրենը:

 

ԱրմԻնֆո-ի երկու զրուցակիցներն էլ խուսափել են պատասխանել վարկային համաձայնագրի պայմաններին առնչվող հարցին,  սակայն ՀԷՑ մամուլի ծառայությունն ավելի վաղ հաղորդել էր, որ վարկերը տրամադրվում են Հայաստանի համար ցածր  2,7%-3,7% տոկսադրույքներով: ԵԱԶԲ-ից զատ ծրագրին մասնակցում են ՎԶԵԲ-ը և ԱԶԲ, որոնցից յուրաքանրյունն արդեն հավանություն է տվել 80-ական մլն դոլարի վարկերի տրամադրմանը:

 

Ավելի վաղ ԱրմԻնֆո-ն հաղորդել էր, որ Եվրասիական զարգացման բանկը պատրաստ է 100 մլն դոլար տրամադրել «Հայաստանի էլեկտական ցանցեր՚ ՓԲԸ-ին` երկրի էներգետիկ ենթակառուցվածքների զարգացման և արդիականացման համար: Մտադրությունների շուրջ համաձայնագիրն ստորագրվել էր 2017 թվականի հոկտեմբերի 31-ին Մոսկվայում Եվրասիական զարգացման բանկի հովանու ներքո ընթացող «Եվրասիական ինտեգրում» ХII միջազգային խորհրդաժողովի շրջանակում` ԵԱԶԲ, «Հայաստանի էլեկտրական ցանցեր՚ ՓԲԸ և նրա բաժնետեր «Տաշիր՚ ընկերությունների ռուսական խմբի միջև:

 

«Տաշիր» ընկերությունների խումբը, որը գլխավորում է ռուսաստանցի խոշոր գործարար Սամվել Կարապետյանը, և «Ինտեր ՌԱՕ» ընկերությունը 2015 թվականի սեպտեմբերի 30-ին ստորագրել են Հայաստանի Հանրապետությունում ռուսական էներգահոլդինգի էլեկտրաէներգետիկ ակտիվների` ՀԷՑ և Հրազդանի ՋԷԿ առքուվաճառքի շուրջ պայմանագիր:

 

«Հայաստանի էլեկտրական ցանցեր» ՓԲԸ-ն հիմնադրվել է 2002 թ. մայիսին `չորս պետական ցանցերի`«Երևանի էլեկտրական ցանցեր», «Հյուսիսային էլեկտրական ցանցեր», «Հարավային էլեկտրացանցեր» և «Կենտրոնական էլեկտրական ցանցեր» ընկերությունների միավորման արդյունքում: Ընկերության հիմնական գործունեությունը էլեկտրաէներգիայի կարգավորումն է, ինչպես նաև բաշխումն ու վաճառքը: Ցանցի ընդհանուր երկարությունը կազմում է 36 հազար կմ: Ընկերությունն սպասարկում է շուրջ 985,000 սպառողի: «Հայաստանի էլեկտրական ցանցեր» ՓԲԸ-ն ունի Հայաստանի Հանրապետության տարածքում էլեկտրաէներգիայի փոխանցման և բաշխման բացառիկ լիցենզիա, երաշխավորված սակագներով, ելնելով ընկերության ծախսերից և ներդրված կապիտալում կարգավորվող եկամտաբերությունից: