Հինգշաբթի, 24 Հունվարի 2019 17:09

Արմինֆո.ՊԵԿ կողմից 2019 թվականի հունվարի 21-ին հրապարակված հաղորդագրությունը «Նաիրի Ինշուրանս՚ ապահովագրական ընկերության հաճախորդների, գործընկերների և պարզապես հասարակության տարբեր շրջանակներում առաջացրել է որոշակի մտահոգություններ և թյուրըմբռնումներ, ինչի արդյունքում վերջին օրերին Ընկերությանն ուղղվել են տարբեր հեռախոսազանգեր և հարցադրումներ: Այդ առնչությամբ  «Նաիրի Ինշուրանս՚ ապահովագրական ընկերությունը պաշտոնապես իրազեկում է, որ Ընկերությունն աշխատում է իր բնականոն ռեժիմով:

 

«Նաիրի  Ինշուրանս՚ ԱԸ-ից ԱրմԻնֆո-ին տրամադրված հայտարարությունում, նշվում է, որ ընկերությունը տարիներ շարունակ հանդիսացել է պարտաճանաչ հարկ վճարող և երբեք չի խուսափել հարկերի վճարումից: Ընկերության ղեկավարության հավաստմամբ, շահութահարկի գծով  «Նաիրի Ինշուրանսը՚ վճարում է երկրում գործող 6 ապահովագրական ընկերությունների միագումար շահութահարկի գրեթե մեկ երրորդը:

 

Հունվարի 21-ին ՊԵԿ հաղորդագրություն էր տարածել այն մասին, որ «Նաիրի Ինշուրանս» ԱՍՊԸ-Ն, ըստ նախնական հաշվարկի,  պետությանը պատճառել է մոտ 200 մլն դրամի վնաս: «Իրավապահ մարմիների համագործակցության շրջանակում ՀՀ ՊԵԿ քննչական վարչության և Ոստիկանության կազմակերպված հանցավորության դեմ պայքարի գլխավոր վարչության աշխատակիցների կողմից կոռուպցիոն բնույթի հանցագործությունների բացահայտման ուղղությամբ ձեռնարկված համատեղ օպերատիվ-հետախուզական և քննչական միջոցառումների արդյունքում բացահայտվել է առանձնապես խոշոր չափերով հարկերը չվճարելու դեպք: ՀՀ Ոստիկանության ԿՀԴՊ գլխավոր վարչության աշխատակիցների կողմից ձեռնարկված օպերատիվ-հետախուզական միջոցառումների արդյունքում պարզվել է, որ 2016-2017 թվականների ընթացքում Նաիրի Ինշուրանս ապահովագրական ՍՊԸ ղեկավար անձինք շահառուների հետ ապահովագրական պայմանագրերի կնքումն արհեստականորեն ձևակերպել են որպես ապահովագրական միջնորդ հանդիսացող տարբեր անձանց անուններով և դրանց դիմաց դուրս գրել ապահովագրական միջնորդավճարներ: Ապահովագրական միջնորդ հանդիսացող անհատ ձեռնարկատերերը եղել են Նաիրի Ինշուրանս ապահովագրական ՍՊԸ նախկին աշխատակիցներ, ինչպես նաև ընկերության հետ առնչություն ունեցող այլ անձինք, որոնք  փաստացի ապահովագրական միջնորդային գործունեություն չեն ծավալել, սակայն վերջիններիս անվամբ, որպես ապահովագրական պոլիսների կնքման համար հասանելիք միջնորդավճարներ, Նաիրի Ինշուրանս ապահովագրական ՍՊԸ-ի կողմից փոխանցվել են առանձնապես խոշոր չափերի գումարներ:  Արդյունքում, որպես միջնորդավճար փոխանցված գումարները Նաիրի Ինշուրանս ապահովագրական ՍՊԸ-ի կողմից ներառվել են 2016-2017 թվականների հաշվետու տարիների համար հարկային մարմին ներկայացված հաշվարկների ծախսային հոդվածի մեջ, նշված գումարների չափով նվազեցվել է հարկվող շահույթը, ինչի հետևանքով, ըստ նախնական հաշվարկի, պետությանը պատճառվել է մոտ  200 միլիոն ՀՀ դրամ գումարի վնաս (առանց տույժ և տուգանքների):  

Դեպքի առթիվ ՀՀ ոստիկանության ԿՀԴՊ գլխավոր վարչությունում ՀՀ քրեական օրենսգրքի 205-րդ հոդվածի 2-րդ մասի հատկանիշներով հարուցվել է քրեական գործ: Նախաքննությունը շարունակվում է, ձեռնարկվում են անհրաժեշտ միջոցառումներ ենթադրյալ հանցագործություն կատարած անձանց շրջանակը պարզելու, պետությանը պատճառված վնասի վերջնական չափը հստակեցնելու և պետական բյուջե վերականգնելու ուղղությամբ՚, - ասվում էր ՊԵԿ հաղորդագրությունում: 

 

«Նաիրի Ինշուրանսը՚,  ի պատասխան ՊԵԿ մեղադրանքի, պաշտոնապես հայտարարել էր, որ ՊԵԿ աշխատակիցներն այս ընթացքում որևէ անգամ չեն այցելել «Նաիրի ինշուրանս՚ ԱՍՊԸ ստուգումներ իրականացնելու նպատակով, և անհասկանալի է, թե ինչ չարաշահումների և նախնական հաշվարկների մասին է խոսվում ՊԵԿ հաղորդագրության մեջ, և ինչ փաստերի վրա է հիմնված տվյալ հայտարարությունը: «Ընկերությունը ձեռնարկելու է օրենսդրությամբ սահմանված բոլոր միջոցներն իր իրավունքների և օրինական շահերի պաշտպանության համար, բացառելու՝ ընկերության գործարար բարի համբավն արատավորող ցանկացած փորձ և պատասխանատվության ենթարկելու նմանօրինակ դեպքերի մեղավորներին օրենքի ողջ խստությամբ՚,- ասվում էր «Նաիրի Ինշուրանս՚ ԱՍՊԸ հայտարարության մեջ:

 

Հավելենք, որ  «Նաիրի Ինշուրանս՚ ընկերությունը Հայաստանի ապահովագրական շուկայում աշխատում է 1996 թվականի դեկտեմբերից: 2008 թվականի մարտին ընկերությունը թարմացրել է ոչ կյանքի ապահովագրության լիցենզիան: 2018 թվականի հունվար-սեպտեմբերի ամիսներին երկրի խոշորագույն հարկատուների ցուցակում ընկերությունն զբաղեցրել է 488-րդ տեղը, իսկ ապահովագրական ընկերությունների շրջանում` երրորդ տեղը: Նախորդ տարվա առաջին 9 ամիսներին ընկերությունը բյուջե է  վճարել, ընդհանուր առմամբ,  205 մլն դրամ, իսկ ուղիղ հարկերի գծով` (շահութահարկ և եկամտահարկ)` 175.7 մլն դրամ:

 

Հիշեցնենք, որ ընկերության պաշտոնական կայքի համաձայն, ընկերության 60 տոկոս բաժնեմասը պատկանում է Լևոն Քոչարյանին: Հայտնի է, որ նա Հայաստանի երկրորդ նախագահ Ռոբերտ Քոչարյանի որդին է: 40 տոկոս բաժնեմասը պատկանում է մեկ այլ ֆիզիկական անձի` Վահագն Խաչատրյանին: