Չորեքշաբթի, 13 Փետրվարի 2019 11:16

Արմինֆո. ՀՀ կառավարությունը թույլ չի տալու իր հետ ստի լեզվով հարաբերվել: Այդ մասին փետրվարի 13-ին Ազգային ժողովում հայտարարել է ՀՀ վարչապետ Նիկոլ Փաշինյանը՝ պատասխանելով ոչ կոմերցիոն բեռների ներմուծման մաքսային վճարներին առնչվող հարցի կարգավորման անհրաժեշտության վերաբերյալ ԱԺ փոխնախագահ Վահե Էնֆիաջյանի հարցին

 

Պատգամավորն ընդգծել է, որ 2019 թ. հունվարի 1-ից հսկիչ անցակետերում կիրառվում են մաքսավճարի նոր դրույքաչափեր, ինչը վնաս է հասցնում 600 շահառուի: Բացի այդ, ևս 1000 մարդ անգործ է մնացել՝ փողոցային առևտրի արգելքի պատճառով: <Մարդկանց անհրաժեշտ է այլընտրանք առաջարկել, և նոր կանոններ ներմուծել աստիճանաբար>,- նշել է պատգամավորը:

 

Այս առաջարկը վրդովել է վարչապետին, ով անթույլատրելի է համարել, երբ առանձին քաղաքացիներ, ներմուծելով սահմանված չափաքանակը գերազանցող կոմերցիոն բեռ, փորձում են թոզ փչել մարդկանց աչքերին: <Չի լինելու նման բան: Չեն լինելու նման անսկզբունք կոմպրոմիսներ>,-հայտարարել է Փաշինյանը: <Ով ավելի շուստրի ա, կառավարությանը ստիպում է ինչ-որ բաներ: Բերելու եք, մաքսազերծելու եք, հարկը վճարելու եք, չկա այլ տարբերակ որևէ մեկի համար՝ շարքային, թե օլիգարխ: Ոչ մեկին թույլ չեմ տալու ինձ հետ հարաբերվել ստի լեզվով>,- հայտարարել է վարչապետը՝ անթույլատրելի համարելով Երևանի կենտրոնը Ստամբուլի բազար, իսկ Մաշտոցի պողոտան արևելյան բազար վերածելը: <Ինչի՞ համար ենք հեղափոխություն արել>,-հարցրել է վարչապետը:

 

Հիշեցնենք, որ 2019 թվականի հունվարի 1-ից առանց մաքսատուրքերի ու հարկերի վճարման ներմուծվող ապրանքների արժեքային չափը կրճատվել է 3 անգամ, իսկ կշիռը՝ 2 անգամ: Փոփոխությունները նախատեսված են Եվրասիական տնտեսական հանձնաժողովի խորհրդի` 2017թ. դեկտեմբերի 20-ի որոշմամբ:Պետական եկամուտների կոմիտեն ֆիզիկական անձանց դեռևս տարեվերջից պարբերաբար տեղեկացրել է նոր կարգավորման մասին, որի համաձայն` եթե ֆիզիկական անձինք ԵԱՏՄ մաքսային տարածք ներմուծեն անձնական օգտագործման ապրանք, որի արժեքը չի գերազանցում 500 եվրոյին համարժեք գումարը, իսկ քաշը` 25 կիլոգրամը, ապա որեւէ գանձում չի կատարվի: Չափաքանակները գերազանցելու դեպքում կիրառվելու է մաքսատուրքերի եւ հարկերի միասնական դրույքաչափ, այսինքն` ապրանքների արժեքի նկատմամբ 30%-ի չափով, բայց ոչ պակաս, քան 1 կիլոգրամի համար 4 եվրոյին համարժեք գումար նշված արժեքը կամ կշիռը գերազանցող մասի համար: ՊԵԿ-ն ընդգծում է՝  ոչ մեկ իրավունք չունի արտոնյալ պայմաններով ապրանք ներկրել. արտոնությունը վերաբերում է միայն մինչև 25կգ անձնական օգտագործման ապրանքների ներմուծմանը և նախատեսված չէ անօրինական բիզնես նպատակներով առևտրային շրջանառության մեջ ապրանքներ մտցնելու համար, քանի որ այդ դեպքում տուժում է մի կողմից շուկան, մյուս կողմից վնաս է հասցվում այն տնտեսվարողներին, ովքեր օրինական ճանապարհով են ապրանք ներմուծում` վճարելով հարկերը: