Արմինֆո. Ազոտական պարարտանյութերի շուկայի ազատականացումը 2018 թ. հանգեցրել է գների նվազման, հայտնում է ՀՀ գյուղատնտեսության նախարարության տեղեկատվության և հասարակայնության հետ կապերի բաժինը:
Մասնավորապես, աղբյուրի համաձայն, ազոտական պարարտանյութերի սուբսիդավորումը դադարեցվել էր դեռևս 2018 թվականի տարեսկզբին, ինչի արդյունքում շուկան ազատականացվել է, հայտնվել են մեծ թվով խաղացողներ, ստեղծվել է լայն մրցակցային դաշտ և արդյունքում գյուղացիական տնտեսություններին 1 պարկ (50 կգ) պարարտանյութը հասանելի է եղել 7000-7500 դրամով։ Այս տարի գների նվազման միտումը շարունակվել է, մասնավորապես վրացական արտադրության 1 պարկ ազոտական պարարտանյութի գինը նախորդ տարվա համեմատ նվազել է 300-500 դրամով և կազմում է շուրջ 6700 դրամ։ Համեմատության համար նշվում է, որ պետական օժանդակության ծրագրերի շրջանակում ձեռք բերված 1 պարկ ազոտական պարարտանյութի գինը կազմել է՝ 2015 թվականին՝ 9215 դրամ , սուբսիդիան՝ 3215 դրամ, 2016 թվականին՝ 8726 դրամ, սուբսիդիան ՝ 2729 դրամ, 2017 թվականին՝ 7000, 6582, 6990 դրամ , սուբսիդիան համապատասխանաբար՝ 1000, 582 և 990 դրամ։Նշենք, որ 1 հա-ի մշակության համար օգտագործվում է միջին հաշվով 400 կգ (8 պարկ) պարարտանյութ։ Արդյունքում, պետական աջակցության ծրագրի շրջանակում գյուղացիական տնտեսություններին 1 հա-ի հաշվով ցուցաբերվել է ընդամենը 8000-10000 դրամի չափով աջակցություն։
Ինչ վերաբերում է դիզելային վառելանյութի սուբսիդավորման ծրագրին, ապա 2018 թվականի տվյալներով՝ հանրապետության 317.000 գյուղացիական
տնտեսություններից ծրագրից օգտվելու հայտ է ներկայացրել ընդամենը 5220 շահառու (շուրջ 1,6%-ը), արդյունքում՝ նախատեսված 6 000 000 լիտրից փաստացի հատկացվել է շուրջ 1.9 մլն լիտրը։ Համեմատության համար նշվում է, որ պետական օժանդակության ծրագրերի շրջանակում ձեռք բերված 1 լիտր դիզելային վառելանյութի գինը 2018 թվականին կազմել է 440 դրամ, սուբսիդիան՝ 60 դրամ, իսկ 2019 թվականին դիզելային վառելանյութի շուկայական գինը կազմում է 450 դրամ։ 1 հա-ի մշակության համար օգտագործվում է շուրջ 120 լիտր դիզելային վառելանյութ։ Արդյունքում, պետական աջակցության ծրագրի շրջանակում գյուղացիական տնտեսություններին ցուցաբերվել է շուրջ 7200 դրամի չափով աջակցություն։