Արմինֆո. Հաշվի առնելով Հայաստանում փոփոխությունները, Իրանի հետ հարաբերությունները զարգացնելու համար քաղաքական կամքի առկայությունը նոր ղեկավարության մոտ՝ Նիկոլ Փաշինյանի այցը այդ հարևան երկիր խիստ կարևոր նշանակություն ունի՝ ինչպես արտաքին քաղաքականության, այնպես էլ, իհարկե, Հայաստանի տնտեսության համար: ԱրմԻնֆո-ին այդպիսի կարծիք է հայտնել Միջազգային և անվտանգության հարցերի հայկական ինստիտուտի փորձագետ Ռուբեն Մեհրաբյանը:
Երկօրյա այցով Իրանում գտնվող վարչապետ Նիկոլ Փաշինյանն արդեն հանդիպել է ԻԻՀ նախագահ Հասան Ռոհանիի, Իսլամական հեղափոխության գերագույն առաջնորդ Այաթոլլա Սեյեդ Ալի Խամենեի, Իրանի Մեջլիսի նախագահ Ալի Լարիջանիի հետ:
<Այնպես է ստացվել, որ հայ-իրանական բավականին լայն օրակարգից շատ հարցեր մնում են միայն թղթի վրա՝ նույնիսկ պայմանագրաիրավական բազայի առկայության դեպքում: Հայ-իրանական հարաբերությունների ներուժն առաջվա պես մեծ է, և դրանց զարգացման ուղղությամբ կարելի է շատ բանի հասնել՝ նույնիսկ հաշվի առնելով Իրանի նկատմամբ միջազգային պատժամիջոցները և սահմանափակումները>,- նշել է նա:
Փորձագետի կարծիքով, Ռուսաստանի՝ հայրենական արտադրողին աջակցությանը և ներմուծման փոխարինմանն ուղղված պրոտեկցիոնիստական քաղաքականությունը որոշակի սահմանափակումներ է դնում ԵԱՏՄ անդամ Հայաստանի և հարևան Իրանի միջև հարաբերությունների վրա: Այս առումով ԵԱՏՄ-ին Հայաստանի անդամակցությունը, ըստ նրա, այդ սահմանափակումները միայն խորացնում է: Մինչդեռ Իրանն այսօր միակ երկիրն է, որը թույլ է տալիս Հայաստանին դիվերսիֆիկացնել Ռուսաստանից ածխաջրածինների ներմուծումը:
Ըստ Մեհրաբյանի, Հայաստանի նախորդ կառավարությունների կողմից <Գազպրոմի> և <Ռոսնեֆտի> հետ կնքված կաբալային պայմանագրերը թույլ են տալիս այդ ընկերություններին մենաշնորհային դիրքեր ունենալ Հայաստանում: Եվ իրավիճակի շտկման ուղղությամբ Երևանի որոշակի քայլերի համար անհրաժեշտ են հստակ փոխշահավետ առաջարկներ նաև Թեհրանի կողմից: Դրանից հետո միայն կարելի է զբաղվել էներգառեսուրսների դիվերսիֆիկացման հարցի լուծմամբ:
<Ի սկզբանե նախատեսվում էր, որ Իրանից Հայաստան գազատարը լինելու է տարանցիկ, սակայն նույն <Գազպրոմի> պնդմամբ 2006 թվականին դրա տրամագիծը կտրուկ նեղացվել է հայ-իրանական սահմանին: Սակայն, փոփոխված ներքաղաքական իրողությունների պայմաններում, նրա կարծիքով, հիմա ամենաճիշտ ժամանակն է այդ թեմայով երկխոսություն սկսելու համար: Կարծում եմ, որ դրա հաջող ավարտի համար այսօր կան բոլոր նախադրյալները>,- ամփոփել է փորձագետը: