ԱՐԱՐԱՏԲԱՆԿ-ը և ՀԵԵՀ-ը 15 մլն դոլարի վարկային պայմանագիր են ստորագրել ՄՓՁ զարգացման նպատակով

Արմինֆո. ԱՐԱՐԱՏԲԱՆԿԸ եւ Հարավ-արեւելյան Եվրոպայի եվրոպական հիմնադրամը (EFSE) ստորագրել են 15 մլն դոլարին համարժեք դրամի սինթետիկ վարկի պայմանագիր, որը կուղղվի Հայաստանի միկրո եւ փոքր բիզնեսի զարգացմանը: Այդ մասին նախօրեին մամուլի ասուլիսի ժամանակ հայտնել է ԱՐԱՐԱՏԲԱՆԿ-ի վարչության նախագահ Աշոտ Օսիպյանը:

«Մենք համագործակցում ենք ավելի քան 15 միջազգային կառույցների հետ, բայց մեզ համար ռազմավարական գործընկերներից մեկը EFSE  հիմնադրամն է, որի հետ աշխատում ենք արդեն շուրջ 10 տարի: Մենք ստորագրել ենք հերթական վարկային պայմանագիրը, որի շնորհիվ մեր հաճախորդներին կներկայացնենք նոր տեխնոլոգիաներ և տեխնիկական աջակցություն, ինչը կնպաստի շուկայում նրանց մրցակցային առավելությունների բարձրացմանը՚, - նշել է նա։

Ա. Օսիպյանի հավաստմամբ, բիզնեսին վարկեր կտրամադրվեն, մինչև 5 տարի մարման ժամկետով, միջինը 9% տարեկան  տոկոսադրույքով, առանց գործունեության ոլորտի սահմանափակումների: Մասնավորապես, ինչպես նշել է նա, հիմնադրամի հետ համագործակցության տարիների ընթացքում ներգրավվել է շուրջ 63 մլն դոլար, որն ուղղորդվել է տնտեսության տարբեր ճյուղերում միկրո եւ փոքր բիզնեսի 2 հազար սուբյեկտների վարկավորմանը, այդ թվում` թեթեւ արդյունաբերության, ոսկերչության, սպասարկման ոլորտի, առեւտրի, շինարարության եւ այլն:

Միաժամանակ նա նշել է, որ EFSE-ի հետ համագործակցությունն արժեքավոր է, առաջին հերթին, ոչ թե ներգրավված միջոցներով, այլ տեխնոլոգիաներով, տեխնիկական  վերազինմամբ և կառավարումման մշակույթով, որը բանկը վերցնում և ներդնում է: Մասնավորապես, այս համատեքստում Ա. Օսիպյանն ընդգծել է 2015 թվականին ներդրված աուդիտի անցկացման ռիսկային-կողմնորոշման մոտեցումը, որի շնորհիվ այսօր ԱՐԱՐԱՏԲԱՆԿՆ աշխատում է միջազգային չափանիշներին համապատասխան: Որպես տեխնոլոգիական նորամուծություն նա նաեւ հիշատակել է գործառնական ռիսկերի քարտեզագրությունը:

Իր հերթին` EFSE խորհրդի նախագահ Քրիստոֆ Տիսկենսը նշել է, որ ուրախ է Արարատբանկի հետ երկարատեւ եւ հաջող համագործակցության համար: «Մեզ համար

չափազանց կարևոր է, որ գործընկեր Բանկն իր գործունեության մեջ կիրառի միջազգային չափանիշներին համապատասխանող տեխնոլոգիաներ, հաշվի առնի շուկայի վիճակը և հաճախորդների պահանջը տոկոսադրույքների սահմանման ժամանակ, ինչն էլ իրականացվում է մեր գործընկեր ԱՐԱՐԱՏԲԱՆԿԻ կողմից՚, - ասել է նա:

Պատասխանելով Հայաստանի տնտեսության վերաբերյալ ԱրմԻնֆո գործակալության հարցին` Կ. Տիսկենսը նշել է, որ իր մոտ տպավորություն է ստեղծվել ընդհանուր առմամբ բավարար իրավիճակի մասին: «Հայաստանը ճիշտ ուղու վրա է, չէ որ երկրի տնտեսության աճը գերազանցում է տարածաշրջանում աճի միջին ցուցանիշները։  Միաժամանակ աջակցության կարիք կա։  Այդ իսկ պատճառով մենք ԱՐԱՐԱՏԲԱՆԿԻ միջոցով փորձում ենք խթանել Հայաստանի տնտեսությունը՚, - ասել է նա։

Նշենք, որ Հարավ-արեւելյան Եվրոպայի եվրոպական հիմնադրամը (EFSE) ստեղծվել է 2005 թվականին Հարավ-արեւելյան Եվրոպայի երկրներում, մասնավորապես Ալբանիայում, Հայաստանում, Ուկրաինայում, Սերբիայում, Ադրբեջանում, Բելառուսում, Բոսնիա եւ Հերցեգովինայում, Բուլղարիայում, Մակեդոնիայում, Վրաստանում, Կոսովոյում, Մոլդովայում, Չեռնոգորիայում, Ռումինիայում տնտեսության եւ ընդհանուր բարեկեցության զարգացմանը նպաստելու նպատակով: Հիմնադրամը տեղական ֆինանսական հաստատություններին տրամադրում է երկարաժամկետ սուբսիդավորում միկրո եւ փոքր ձեռնարկությունների (ՄՄՀ), ինչպես նաեւ միջին ձեռնարկությունների եւ ցածր եկամուտ ունեցող մասնավոր տնային տնտեսությունների վարկավորման համար:  Ընդհանուր առմամբ, հիմնադրման պահից ի վեր EFSE-ն 922 մլն եվրո է ուղղորդել միկրոֆինանսավորման ոլորտում ներգրավված առեւտրային բանկերի, հիմնարկների, ինչպես նաեւ ոչ ֆինանսական հաստատությունների ֆինանսավորման համար, դրանով իսկ հնարավոր դարձնելով ավելի քան 247 000 վարկերի տրամադրումը ՄՄՀ-ի եւ մասնավոր տնային տնտեսությունների:

ԱրմԻնֆո-ի պատրաստած Հայաստանի Բանկերի Ֆինանսական Վարկանիշի 31.12.2018 թ. տվյալներով, ԱՐԱՐԱՏԲԱՆԿ-ի վարկային ներդրումները հասել են 126.5 մլրդ դրամի (261.6  մլն դոլար): Բանկի վարկային պորտֆելում ՓՄՁ վարկավորման մասնաբաժինը գերազանցում է 45%-ը` բացարձակ արտահայտությամբ կազմելով 57.7 մլրդ դրամ (6-րդ դիրքը շուկայում)` ծավալի տարեկան 13.8% աճով: Իսկ ՓՄՁ ոլորտում բանկերի ընդհանուր վարկային ներդրումներում ԱՐԱՐԱՏԲԱՆԿ-ի մասնաբաժինը հասնում է 8%-ի: 2018 թվականը ԱՐԱՐԱՏԲԱՆԿՆ ավարտել է 2.3 մլրդ դրամ զուտ շահույթով (4.7 մլն դոլար) ՝ 9.7% տարեկան աճով: "ԱՐԱՐԱՏԲԱՆԿ" ԲԲԸ-ն գործում է 2005 թվականի նոյեմբերից: Որպես ԱՐԱՐԱՏԲԱՆԿ-ի մեծամասնական բաժնետերեր 2019թ.հունվարի 1-ի դրությամբ հանդես են գալիս «Ֆլեշ՚ ընկերությունը՝ կապիտալում 72,73% բաժնեմասով, Բարսեղ Բեգլարյանը (հայտնի գործարար, «ֆլեշ՚-ի ղեկավար)՝ 18,33 %, Rural Impulse Fund II (մտնում է բելգիական Incofin Investment Management - Incofin IM կառուցվածքի մեջ)՝ 8,58 %: