Երկուշաբթի, 15 Ապրիլի 2019 16:18

Արմինֆո.Կոնվերս Բանկը հայտարարում է միաժամանակ երկու արժույթով՝ դրամով և դոլարով, պարտատոմսերի տեղաբաշխման մեկնարկի մասին:

 

Թողարկման շրջանակներում նախատեսվում է տեղաբաշխել 1 մլրդ դրամ ծավալով դրամային և 10 մլն ԱՄՆ դոլար ծավալով դոլարային պարտատոմս: Պարտատոմսերի տարեկան արժեկտրոնային եկամտաբերությունը կազմում է համապատասխանաբար 9,75% և 5,5%:  Շրջանառման ժամկետը 36 ամիս է, արժեկտրոնի վճարման պարբերականությունը՝ կիսամյակային:

 

« Կոնվերս Բանկը 2017թ-ից շարունակաբար իրականացնում է պարտատոմսերի թողարկումներ և այսօր թողարկված պարտատոմսերի պորտֆելով շուկայի առաջատարներից է: Վերջին երեք տարիներին տարբեր արժույթներով՝ ՀՀ դրամ, ԱՄՆ դոլար և Եվրո, տեղաբաշխվել է մոտ 17 մլրդ դրամին համարժեք գումարով պարտատոմս: Բանկի կողմից թողարկված պարտատոմսերը մեծ պահանջարկ ունեն թե ինստիտուցիոնալ ներդրողների, թե ֆիզիկական անձ հաճախորդների կողմից: Շուկայի պահանջները բավարարելու նպատակով այս թողարկումները կրելու են շարունակական բնույթ »,- ասել է Կոնվերս բանկի Ֆինանսական տնօրեն Հրանտ Հակոբյանը:

 

Պարոն Հակոբյանը նշել  է, որ պարտատոմսերը  խնայողության շատ գրավիչ և ճկուն գործիք են: Սովորաբար դրանց եկամտաբերությունը ավանդի համեմատ ավելի բարձր է, և դրանք  մինչև ժամկետի ավարտը կարող են մասամբ վաճառել՝ չկորցնելով կուտակված տոկոսագումարը:

 

Այս պարտատոմսերի տեղաբաշխման ավարտը նախատեսված է սեպտեմբերին, ինչից հետո դրանք կցուցակվեն Հայաստանի ֆոնդային բորսայում՝ երկրորդային շուկայում շրջանառվելու նպատակով:

 

Պարտատոմսերի թողարկման ազդագրին և վերջնական պայմաններին կարելի է ծանոթանալ հետևյալ հղումով՝ https://conversebank.am/hy/2019issue/