Հանրապետության նախագահ Արմեն Սարգսյանը Ղազախստանի նախագահ Կասիմ-Ժոմարտ Տոկաևի հրավերով կմասնակցի ամենամյա տնտեսական ֆորումին

Արմինֆո. Ղազախստանի Հանրապետության նախագահ Կասիմ-Ժոմարտ Տոկաևի հրավերով Հայաստանի Հանրապետության նախագահ Արմեն Սարգսյանը կմասնակցի մայիսի 16-ին Նուր-Սուլթանում բացվող տնտեսական 12-րդ ամենամյա ֆորումին և հանդես կգա ելույթով:

Տնտեսական ֆորումն այս տարի անցկացվելու է «Ոգեշնչող աճ. մարդիկ, քաղաքներ, տնտեսություններե խորագրի ներքո: Ֆորումի շրջանակում ամեն տարի հայտնի քաղաքական գործիչները, տնտեսագետները, բիզնես-առաջնորդները, միջազգային կազմակերպությունների ներկայացուցիչները քննարկում են տնտեսության համաշխարհային միտումներն ու գլոբալ կառուցվածքային փոփոխությունները:

Տոկաևն իր հրավերում համոզմունք է հայտնել, որ նախագահ Արմեն Սարգսյանի մասնակցությունը ֆորումի աշխատանքներին կնպաստի երկու երկրների միջև բարեկամական հարաբերությունների հետագա զարգացմանը, ինչպես նաև ներդրումային ու առևտրային կապերի ամրապնդմանը:

Այցի շրջանակում Հայաստանի նախագահը հանդիպումներ կունենա Ղազախստանի ղեկավարության, ինչպես նաև ֆորումին մասնակցող երկրների պատվիրակությունների ղեկավարների հետ:

Ինչպես ավելի վաղ արդեն հայտնել էր ԱրմԻնֆո-ն, Ղազախստանի մայրաքաղաք Նուր-Սուլթանը հրավիրել է համաշխարհային առաջնորդներին և առաջատար միջազգային փորձագետներին՝ մասնակցելու Աստանայի 12-րդ տնտեսական ֆորում-2019-ին: Այն տեղի կունենա մայիսի 16-ին եւ 17-ին: Ֆորումին կմասնակցեն համաշխարհային առաջնորդներ և միջազգային առաջատար փորձագետներ: Ինչպես Արմինֆո գործակալությանը հայտնել են համաժողովի կազմակերպիչները, այդ երկու օրերի ընթացքում, այսպես կոչված, <Եվրասիական Դավոսի> պատվիրակները քննարկելու են համաշխարհային տնտեսության առավել կարեւոր խնդիրները և մշակելու են դրանց լուծմանն ուղղված առաջարկներ: Ավելի քան 80 երկրների հինգ հազարից ավել պատվիրակներ կմասնակցեն AEF-2019-ին:Սպասվում է, որ այդ մասշտաբային միջոցառմանը կմասնակցեն Արժույթի միջազգային հիմնադրամի գործադիր տնօրեն Քրիստին Լագարդը, 2018 թվականի տնտեսագիտության Նոբելյան մրցանակի դափնեկիր Փոլ Ռոմերը, ԱՄՆ Դաշնային պահուստային համակարգի նախագահ տեղակալ Սթենլի Ֆիշերը և ուրիշներ:

Ղազախստանի Հանրապետության նախագահ Կասիմ-Ժոմարտ Տոկաեւի

մասնակցությամբ կլոր սեղանը նույնպես AEF-ի առանցքային իրադարձություններից մեկը կդառնա:  Ղազախստանի նախագահի հետ պանել-քննարկումներ կանցկացվեն ՀՀ նախագահ Արմեն Սարգսյանի, Սբերբանկի ղեկավար Գերման Գրեֆի, Ասիայի եւ Խաղաղ օվկիանոսի տնտեսական եւ սոցիալական հանձնաժողովի գործադիր քարտուղար Արմիդա Սալսիա Ալիշահբանայի, <Բոստոն քոնսալթինգ գրուպ> - ի ղեկավար Հանս-Փոլ Բյուրքների, ամերիկացի նշանավոր տնտեսագետ եւ շախմատի գրոսմայստեր, Հարվարդի տնտեսագիտության պրոֆեսոր Քենեթ Ռոգոֆի, ԱՄՀ-ի նախկին գլխավոր տնտեսագետ, Բերկլիի Կալիֆոռնիայի համալսարանի տնտեսագիտության պրոֆեսոր Մորիս Օբստֆելդի եւ այլոց հետ միասին: Պանելային քննարկման մասնակիցները կքննարկեն AEF օրակարգում ընդգրկված՝ համաշխարհային տնտեսական զարգացման ընթացիկ հարցերն ու միտումները:

Համաժողովի օրակարգում կլոր սեղան է ՝ Կովկասի և Կենտրոնական Ասիայի երկրների ֆինանսների նախարարների և ազգային բանկերի ղեկավարների, Եվրասիական տնտեսական միության անդամ պետությունների և Մոնղոլիայի, ինչպես նաև տարբեր պետությունների գործարար մարդկանց մասնակցությամբ: Տեղի կունենա նաեւ 2020 թվականին Առեւտրի համաշխարհային կազմակերպության 12-րդ նախարարական խորհրդաժողովի միջանկյալ նախապատրաստական խորհրդակցությունը:  Կանցկացվի ռազմավարական նստաշրջան համաշխարհային ինտելեկտուալ էլիտայի եւ Ղազախստանի Հանրապետության կառավարության մասնակցությամբ ՝ G-Global Միջազգային քարտուղարության ղեկավարությամբ: Ֆորումի շրջանակներում տեղի կունենա <Եվրասիական ինտեգրման 25 տարի՝ գաղափարից մինչև իրագործում> խորագրով նստաշրջանը, տեղի կունենա Ղազախստանյան գլոբալ ներդրումային կլոր սեղան: Համաժողովի մասնակիցները՝ ի դեմս պետությունների ֆինանսական իշխանությունների, կլոր սեղան կանցկացնեն <Տնտեսական քաղաքականության միջոցները՝ ներառական աճի համար> թեմայով:

Ղազախստանի ԶԼՄ-ները հայտնում են, որ Աստանայի տնտեսական ֆորումի բյուջեն 2019 թվականին կկազմի 1,4 մլրդ տենգե կամ 3,7 մլն դոլար:

Ելբասի նախաձեռնությամբ ստեղծված Աստանայի տնտեսական համաժողովը միշտ անցկացվում է Նուրսուլթան Նազարբաևի անփոփոխ մասնակցությամբ ։  AEF-2019-ը բացառություն չի լինի: Ղազախստանի առաջին նախագահը կմասնակցի համաժողովի լիագումար նիստին։