Միաձուլվել են երկու ներդրումային ընկերություններ. ՙԱրմենբրոկը՚ ձեռք է բերել «Կապիտալ Ինվեստմընթսը»

Արմինֆո. 2019 թվականի հունիսի 13-ին «Արմենբրոկ» բաց բաժնետիրական ընկերությունը և «Կապիտալ Ինվեստմընթս» փակ բաժնետիրական ընկերությունը հաջողությամբ ավարտեցին բաժնետոմսերի ձեռքբերման գործարքը։ Երկու ընկերություններիպաշտոնական հաղորդագրության համաձայն,  այդ գործարքի արդյունքում «Արմենբրոկ» ԲԲԸ ներդրումային ընկերությունը դարձել է «Կապիտալ Ինվեստմընթս» ՓԲԸ-ի միակ սեփականատերը: Գործարքն ավարտելու համար ստացվել են ՀՀ կենտրոնական բանկի և ՀՀ տնտեսական մրցակցության պաշտպանության պետական հանձնաժողովի համապատասխան թույլտվությունները։

Միաժամանակ, «Կապիտալ Ինվեստմընթս» ՓԲԸ-ի հետ փոխկապակցված «Կապիտալ Ասեթ Մենեջմենթ» փակ բաժնետիրական ընկերությունը գործարքում որևէ կերպ չի ընդգրկվել և շարունակելու է գործել որպես ինքնուրույն իրավաբանական անձ:

«Կապիտալ Ինվեստմընթս» փակ բաժնետիրական ընկերությունը Հայաստանի կապիտալի շուկայում գործել է 2006 թվականից՝ ՀՀ ԿԲ-ի կողմից տրամադրված լիցենզիայի հիման վրա: Արդյունավետ կառավարման շնորհիվ ընկերությանը հաջողել է բարձր արդյունքներ գրանցել և դառնալ շուկայի առաջատարներից մեկը: Ընկերությունների ղեկավարների հաղորդմամբ, միացման գործարքը երկկողմանի նպատակահարմար է դարձել, հաշվի առնելով շուկայում առկա մրցակցային պայմանները և հետագա գործունեության հեռանկարները:

Ըստ «Արմենբրոկ»-ի գլխավոր տնօրեն Արամ Կայֆաջյանի, «Կապիտալ Ինվեստմընթս»-ի ռազմավարությունն ու բիզնեսը ամբողջությամբ կինտեգրվեն «Արմենբրոկ»-ի գործունեության շրջանակներում: Նրա խոսքով, «Արմենբրոկ»-ը մեծ պատվով և պատասխանատվությամբ է մոտենում «Կապիտալ Ինվեստմընթս»-ի գործընկերների և հաճախորդների հետ համագործակցելու հնարավորությանը և վստահեցնում, որ նրանք կշարունակեն ստանալ անհատականացված մոտեցում, առաջնակարգ ծառայություններ և բարձրորակ սպասարկում:

ՙԿապիտալ Ինվեստմընթս՚ ընկերության գործադիր տնօրեն և հիմնական բաժնետեր Տիգրան Կարապետյանը ԱրմԻնֆո-ի թղթակցի հետ զրույցում հատուկ ընդգծել է, որ  ընկերությունը, ամենայն հավանականությամբ, կկլանվի ՙԱրմենբրոկի՚ կողմից և կշարունակի աշխատանքը պորտֆելային ներդրումների ներգրավման ոլորտում, իսկ իր ղեկավարած «Կապիտալ Ասեթ Մենեջմենթը» կկենտրոնանա ներդրումային և կամավոր կենսաթոշակային հիմնադրամների հետագա կառավարման վրա:

Նշենք, որ ՙԿապիտալ Ինվեստմընթսը՚ երկար տարիների աշխատանքի ընթացքում շուկայում բարձր հեղինակություն է ձեռք բերել ակտիվ եւ գրագետ աշխատանքի շնորհիվ: Ընկերությունն իրականացրել է հիփոթեքային վարկերի առաջին արժեթղթավորումը, հանդես է եկել որպես պարտքային արժեթղթերի մեծ թվով թողարկումների տեղաբաշխող, այդ թվում ՝ այնպիսի խոշոր շինարարական ընկերությունների, ինչպիսիք են ՙՇեն – կոնցեռնը՚ եւ ՙԷլիտ-Գրուպը՚, ինչպես նաեւ Ինեկոբանկը եւ Կոնվերս Բանկը:

AmRating վարկանշային գործակալության ղեկավար Էմանուիլ Մկրտչյանի կարծիքով,՝ Հայաստանի երկու առաջատար ներդրումային ընկերությունների միաձուլման գործարքն արտացոլում է երկրի ֆինանսական շուկայում ստեղծվող ոչ դյուրին իրավիճակը, որը բնութագրվում է վերջին տարիներին ներդրումային գրավչության զգալի անկմամբ, ՕՈՒՆ - ի ծավալների կրճատմամբ, ֆոնդային շուկայի ծայրահեղ թերզարգացմամբ եւ, որպես հետեւանք,  շուկայում ինստիտուցիոնալ եւ պորտֆելային ներդրողների գրեթե լիակատար բացակայությամբ: