HSBC Բանկ Հայաստանը հայտարարել է <Մեծ ընտանիք> հիփոթեքային ծրագրի մեկնարկը

Արմինֆո.  HSBC Բանկ Հայաստանը հայտարարել է <Մեծ ընտանիք> հիփոթեքային ծրագրի մեկնարկը, որի շրջանակներում հիփոթեքային վարկառուի համար գործող տոկոսադրույքը կնվազի 0,25% - ով յուրաքանչյուր ծնված կամ որդեգրված երեխայի համար, եւ երեք երեխայի հաշվարկով առավելագույն նվազումը նախատեսված է 0,75% - ով: Այս մասին սեպտեմբերի 14-ին այդ ծրագրի մեկնարկին նվիրված մամուլի ասուլիսում հայտարարել Է HSBC Բանկ Հայաստանի գլխավոր գործադիր տնօրեն Փոլ Էդգարը։

Փ. Էդգարի խոսքով՝ ծրագիրը պարունակում է ինչպես ֆինանսական, այնպես էլ սոցիալական առավելություն։  Մասնավորապես՝ հաճախորդի տեսանկյունից ֆինանսական առավելությունը հիփոթեքային վարկի տոկոսադրույքի նվազեցումն է, իսկ սոցիալական՝ օգնությունը համալրման սպասող, բայց հիփոթեքային վարկ ունեցող ընտանիքներին, որով բանկն այս ծրագրով աջակցում է՝ վարկային պարտավորությունների կատարման բեռի նվազեցման տեսքով: < HSBC Բանկ Հայաստանը կորպորատիվ սոցիալական պատասխանատվության շրջանակներում որոշել է այս ծրագրի միջոցով աջակցել հենց այն վարկառուներին, որոնց ընտանիքում համալրում է սպասվում: HSBC Բանկ Հայաստանը որդեգրել է դեպի հաճախորդները կողմնորված քաղաքականություն՝ ուղղված  հաճախորդին աջակցությանը նրա կյանքում գլխավոր իրադարձությունը կյանքի կոչելիս, ինչպիսին է երեխայի ծնունդը: Այսպիսով՝ HSBC Բանկ Հայաստանը իր ներդրումն է կատարում երկրում ժողովրդագրական իրավիճակի բարելավման գործում>, - ԱրմԻնֆո-ի հարցին պատասխանել է Փ. Էդգարը:

Նա նշել է, որ հաշվի առնելով <Մեծ ընտանիք> ծրագրի ուղղվածությունը՝ շնորհանդեսային միջոցառմանը հրավիրված են երեխաներ ունեցող հաճախորդները, որի ընթացքում նախատեսվում է նրանց հանձնել ծրագրի մասնակցի հավաստագիրը: <Եվ, իհարկե, սերտիֆիկատի վրա պատկերված է ընտանիքի համալրման խորհրդանիշը ՝ արագիլը>, - նշել է Փ.Էդգարը:

HSBC Բանկ Հայաստանի բանկային մանրածախ բիզնեսի դեպարտամենտի տնօրեն Միհրան Մուրադյանը, պատասխանելով ԱրմԻնֆո-ի հարցին, պարզաբանել է, որ այդ առաջարկի շրջանակներում հիփոթեքային վարկի տոկոսադրույքը նվազում է գործող տարեկան 11% - ից, սակայն սահմանափակող շեմ է համարվում 0,75% - ը երեք երեխայի հաշվարկով՝ յուրաքանչյուր երեխայի համար 0,25% նվազում: Ընդ որում, իջեցված տոկոսադրույքը գործելու է հիփոթեքային պայմանագրի ողջ ընթացքում։ <<Մեծ ընտանիք> ծրագրի շրջանակներում հիփոթեքային վարկի տոկոսադրույքի նվազեցումը սկսում է գործել 2019 թվականի սեպտեմբերի 16-ից ։ 2016 թվականի սեպտեմբերի 16-ից հետո ծնված կամ որդեգրված երեխա ունեցող հիփոթեքային վարկառուներին այս առաջարկից օգտվելու համար անհրաժեշտ է դիմում ներկայացնել բանկ ՝ կից ծննդյան/որդեգրման վկայականով: Իսկ մեր այն հաճախորդները, ովքեր արդեն այսօր սպասում են համալրման ընտանիքում և ապագայում նույնպես ծրագրում են երեխա ունենալ, ինքնաբերաբար դառնում են այդ ծրագրի շահառուները։ Մեր հիփոթեքային հաճախորդների շրջանում շատ են երիտասարդ ընտանիքները, որոնք սպասում են համալրման, եւ այդ պատճառով մենք որոշեցինք գործարկել հենց նրանց ուղղված աջակցության ծրագիր: <HSBC Բանկ Հայաստանը, հավատարիմ մնալով կորպորատիվ սոցիալական պատասխանատվության սկզբունքներին եւ կայուն ու տեւական հարաբերություններ կառուցելուն, անկյունաքար է դարձնում դեպի հաճախորդ ուղղվածությունը>,- նշել է

Մ. Մուրադյանը:

Ըստ ԱրմԻնֆո- ի պատրաստած՝ Հայաստանի բանկերի ֆինանսական վարկանիշի, HSBC Բանկ Հայաստանի ակտիվները 2019 թ. հուլիսի 1-ի դրությամբ կազմել են 410.5 մլն դոլար, որոնց կառուցվածքում վարկային ներդրումների մասնաբաժինը կազմել է ավելի քան 64% կամ $263.4 մլն: Բանկի վարկային պորտֆելում գերակշռում են կորպորատիվ վարկերը՝ շուրջ 71%, սակայն աճի տեմպերով առաջ է անցել մանրածախ վարկավորում՝ 24.6%-ով:

Ընդ որում, վերջիններիս կառուցվածքում 58,8%  կամ 34,3 մլն դոլար կենտրոնացած է հիփոթեքային վարկերի վրա ՝ ծավալի 12,9%  տարեկան աճով, որից 7,6% աճ է գրանցվել միայն II եռամսյակում: HSBC Բանկ Հայաստանը հիփոթեքային վարկավորման առումով 5-րդ տեղն է զբաղեցնում շուկայում: Բանկի վարկային պորտֆելում հիփոթեքին բաժին է ընկնում 13% - ը (նախորդ տարվա 10,1% - ի փոխարեն), իսկ բանկային հատվածի ընդհանուր հիփոթեքային վարկերում HSBC Բանկ Հայաստանն ընդգրկում է 5,4% - ը (նախորդ տարվա 6,5% - ի փոխարեն): Հատկանշական է, որ HSBC Բանկ Հայաստանի հիփոթեքային պորտֆելի գրեթե ամբողջ ծավալը գործող վարկեր են: HSBC Բանկ Հայաստանը 2019թ. առաջին կիսամյակն ավարտել է $ 2.8 մլն զուտ շահույթով, որի հիմնական մասը բանկն ապահովել է երկրորդ եռամսյակում: Տարեկան և եռամսյակային կտրվածքով բանկին հաջողվել է մի քանի անգամ ավելացնել զուտ շահույթը։

Նշենք, որ HSBC Բանկ Հայաստանը, որը ներկայացնում է Հայաստանում HSBC Bank plc խումբը, գործում է 1995թ. հունիսի 20-ից: HSBC Բանկ Հայաստանի բաժնետերերն են HSBC Europe BV` 70% եւ Wings Establishment` 30%: