Ուրբաթ, 18 Հոկտեմբերի 2019 12:04

Արմինֆո. Հոկտեմբերի 17-ին փոխվարչապետ Տիգրան Ավինյանի գլխավորությամբ կայացել է խորհրդակցություն Համաշխարհային բանկի ֆինանսավորմամբ իրականացվող «Տեղական տնտեսության և ենթակառուցվածքների զարգացման» ծրագրի վերաբերյալ:

 

Ինչպես ԱրմԻնֆո-ին հաղորդեցին փոխվարչապետի գրասենյակից, խորհրդակցության ընթացքում ՀՀ էկոնոմիկայի նախարարության Զբոսաշրջության կոմիտեի և Հայաստանի տարածքային զարգացման հիմնադրամի  կողմից ներկայացվել է Ծրագրի իրականացման ընթացքը:

 

Քննարկվել են Գառնիի զբոսաշրջային գոտու, Հայաստանի պատմական մայրաքաղաք Դվինի թանգարանացման և հարակից տարածքների բարեկարգման, Հին Խնձորեսկի, Զորաց քարեր հուշարձանի մերձակա տարածքում զբոսաշրջային գոտու ձևավորման, Գորիս քաղաքի կենտրոնական մասի պատմաճարտարապետական միջավայրի վերականգնման և Վարարակ գետի աջափնյա հատվածի բարեկարգման ուղղությամբ իրականացվելիք աշխատանքների շրջանակը:

 

Մտքերի փոխանակության արդյունքում փոխվարչապետի կողմից հանձնարարություն է տրվել գերատեսչությունների ղեկավարներին՝ հնարավորինս սեղմ ժամկետներում ներկայացնել առաջարկներ քննարկված նախագծերը համալրելու և ամբողջական զբոսաշրջային արդյունք ձևավորելու նպատակով, ինչպես նաև նոր նախագծեր՝ համատեղ քննարկելու համար:   

 

Նշենք, որ Համաշխարհային բանկի կողմից ֆինանսավորվող "Տեղական տնտեսության եւ ենթակառուցվածքների զարգացում" ծրագիրը գործարկվել է 2015 թվականի դեկտեմբերին եւ կավարտվի 2021 թվականի ապրիլին: Ծրագրի ընդհանուր արժեքը կազմում է 68.7 մլն դոլար: Ծրագիրը նախատեսում է քաղաքային և գյուղական համայնքների, պատմամշակութային վայրերի բարեկարգում, զբոսաշրջային սպասարկման կենտրոնների ստեղծում, զբոսաշրջային երթուղիների ճանապարհներ, հասանելիության ապահովում, տեխնիկական աջակցություն: Ծրագիրը հատուկ նշանակություն կունենա տարածաշրջանի զբոսաշրջային ներուժի զարգացման հարցում։

 

Հայաստանը Համաշխարհային բանկի անդամ է 1992 թվականից: Ընդհանուր առմամբ, ՀԲ - ն Հայաստանին տրամադրել է 2.3 մլրդ դոլար՝ վարկերի եւ դրամաշնորհների տեսքով: Որպես կանոն, այդ միջոցների մեկ երրորդը ծախսվում է բյուջեի դեֆիցիտի փոխհատուցման, եւս մեկ երրորդը' ենթակառուցվածքային նախագծերի ֆինանսավորման համար: Համաշխարհային բանկի (ՀԲ) տնօրենների խորհուրդը 2019 թվականի մարտի 28 - ին Հայաստանի համար հաստատել է 500 մլն դոլարի նոր վարկային գիծ ՝ "Երկրի հետ գործընկերության շրջանակ" (Country Partnership Framework-CPF) ծրագրի շրջանակներում 2019-2023թթ.  երկրի բնակչության կայուն և ներառական աճի և բարեկեցության բարելավման նպատակով: Աղքատության հաղթահարման եւ համընդհանուր բարեկեցության խթանման նպատակով ՀԲ-ն CPF-ի միջոցով մտադիր է աջակցել Հայաստանին երեք ուղղություններով.  ձեռնարկությունների արտահանման և մրցունակության խթանում, մարդկային կապիտալի և հավասարության զարգացում, շրջակա միջավայրի և բնական ռեսուրսների կայուն կառավարում: