ՀՀ կենտրոնական բանկի նախագահը Վաշինգտոնում մասնակցելու է ԱՄՀ և ՀԲ աշնանային նստաշրջանին

Արմինֆո. ՀՀ կենտրոնական բանկի նախագահ Արթուր Ջավադյանը մեկնել է Վաշինգտոն, որտեղ մասնակցելու է Արժույթի Միջազգային Հիմնադրամի և Համաշխարհային Բանկի կառավարիչների խորհուրդների 2019 թ. տարեկան նստաշրջանին:

Ինչպես ԱրմԻնֆո-ին հաղորդեցին ԿԲ հասարակայնության հետ կապերի ծառայությունից, ԿԲ նախագահը մասնակցելու է ԱՄՀ/ՀԲ տարեկան նստաշրջանի պլենար նիստին, հոլանդաբելգիական ենթախմբի կառավարիչների նիստին, ինչպես նաև մի շարք կլոր սեղանների և թեմատիկ քննարկումների:

Նախատեսված են մի շարք երկկողմ հանդիպումներ՝ մասնավորապես ԱՄՀ նորանշանակ գործադիր տնօրեն Քրիստալինա Գերգիեվայի, ԱՄՀ Մերձավոր Արևելքի և Կենտրոնական Ասիայի տարածաշրջանային տնօրեն Ջիհադ Ազուրի, ԱՄՀ և ՀԲ հոլանդաբելգիական ենթախմբի գործադիր տնօրեններ Էնթընի ԴեԼաննոյի և Քոեն Դավիդսեի, ինչպես նաև ՀԲ փոխտնօրեն Սիրիլլ Միլլերի հետ:

Միջոցառման շրջանակում աշխատանքային քննարկումներ են նախատեսված Եվրոպական ներդրումային բանկի, գերմանական KfW բանկի, ՄՈւԴԻԶ վարկանշային կազմակերպության և միջազգային մի շարք այլ ֆինանսական կառույցների ղեկավարների հետ:

Նշենք, ամեն տարի աշնանը ԱՄՀ կառավարիչների եւ ՀԲ կազմակերպությունների խմբի խորհուրդները նիստեր եւ լիակազմ խորհրդակցություններ են անցկացնում, որտեղ քննարկվում է աղքատության կրճատմանը, միջազգային տնտեսական զարգացմանը եւ ֆինանսական գործունեությանը վերաբերող հարցերի լայն շրջանակ: Ամենամյա խորհրդակցությունները ծառայում են որպես միջազգային համագործակցության ֆորում և ՀԲ-ին ու ԱՄՀ-ին հնարավորություն են ընձեռում ավելի որակով սպասարկել  անդամ պետություններին: Խորհրդակցություններին մասնակցում է շուրջ 10 000 մարդ, այդ թվում՝  ՀԲ-ի եւ ԱՄՀ-ի անդամ պետությունների պատվիրակությունների շուրջ 3 500 անդամներ, մամուլի շուրջ 1 000 ներկայացուցիչներ եւ ավելի քան 5000 հրավիրյալներ, հիմնականում՝ մասնավոր հատվածի, բանկային համայնքի եւ ոչ կառավարական կազմակերպությունների ներկայացուցիչներ:

Բացի այդ, ՀԲ-ի եւ ԱՄՀ-ի ներկայացուցիչները մասնակցում են կառավարական պատվիրակությունների կազմում ընդգրկված պաշտոնատար անձանց հետ խորհրդակցություններին: ԱՄՀ-ի եւ ՀԲ-ի Հոլանդիայի/Բելգիա ենթախմբում ընդգրկված է 15 երկիր' Հայաստան, Բելգիա, Բոսնիա եւ Հերցեգովինա, Բուլղարիա, Խորվաթիա, Կիպրոս, Վրաստան, Իսրայել, Լյուքսեմբուրգ, Մակեդոնիա, Մոլդովա, Նիդեռլանդներ, Ռումինիա, Ուկրաինա, Չեռնոգորիա: