Երևանի քաղաքապետը Բրյուսելում ավտոբուսների ցուցահանդեսում՝ տրանսպորտային նոր համակարգի ներդրումը առաջնահերթ խնդիր է

Արմինֆո. Երեկվա տոնակատարություններից հետո Երևանի քաղաքապետ Հայկ Մարությանը մեկնել է Բրյուսել՝ մասնակցելու BusWorld Europe 2019 ցուցահանդեսին։Այդ մասին Մարությանը գրել է Ֆեյսբուքի իր էջում:

<Երեկվա տոնակատարություններից անմիջապես հետո մեկնեցի Բրյուսել՝ մասնակցելու BusWorld Europe 2019 ցուցահանդեսին։Տրանսպորտային նոր համակարգի ներդրումը մեր առաջնահերթ խնդիրն է>,- գրել է նա:

Նշենք, որ Երևանի քաղաքապետարանն իրականացնում է քաղաքի տրանսպորտային ցանցի բարեփոխման ծրագիր, որը մշակել են WYG խորհրդատվական ընկերության մասնագետները: Ներկայումս գործող 111 ավտոբուսային երթուղու փոխարեն տրանսպորտային նոր ցանցով առաջարկվում է 42-ը, էապես կնվազի նաև տրանսպորտային միջոցների քանակը: Կգործարկվի 845 ավտոբուս և 101 տրոլեյբուս: Ավտոբուսների քանակի մեջ ներառված են նաև պահուստային միջոցները, որոնք ընդհանուրի 15 տոկոսն են կազմում: Ավելի քան երեք անգամ կրճատվելու է նաև ցանցի երկարությունը: Սա չի նշանակում, որ նվազելու է ծածկույթը,պարզապես նվազելու են կրկնվող գծերը: Սրա շնորհիվ հնարավորություն կլինի ցանցի կիրառման և շահագործման ընթացքում լուրջ խնայողություններ անել, ինչն էապես կթեթևացնի սակագնային բեռը: