Արմինֆո.Ըստ հեղինակավոր «Euromoney» ամսագրի անցկացրած հարցման «Էյչ-Էս-Բի-Սի Բանկ Հայաստան» ՓԲԸ-ն (այսուհետ` HSBC Հայաստան) երկրորդ անգամ անընդմեջ ճանաչվել է «Դրամական միջոցների կառավարման լավագույն Բանկը Հայաստանում», ինչպես նաև առաջին անգամ արժանացել է «Դրամական միջոցների կառավարման ոլորտում լավագույն ծառայություններ մատուցող բանկ» մրցանակին:
«Euromoney» ամսագրի հարցմանը մասնակցել են դրամական միջոցների կառավարման և ֆինանսական շուկաների մասնագետներ, ինչպես նաև ֆինանսական փորձագետներ ամբողջ աշխարհից: Հարցվողներին առաջարկվել է գնահատել իրենց հետ համագործակցող ֆինանսական հաստատություններին, ինչպես նաև վերջիններիս կողմից մատուցվող դրամական միջոցների կառավարման ծառայությունների որակը:
«Euromoney» ամսագրի կողմից «Դրամական միջոցների կառավարման լավագույն բանկ» ճանաչվելը նախ և առաջ արտացոլում է մեր հաճախորդների վստահությունը HSBC Հայաստանի նկատմամբ: «HSBC Հայաստանի կողմից միջազգային բարձր որակի բանկային պրոդուկտների տրամադրման, որակյալ ծառայությունների մատուցման և դրամական միջոցների կառավարման ծառայությունների գծով արհեստավարժ մասնագետների առօրյա աշխատանքի շնորհիվ մենք փորձում ենք լիովին բավարարել մեր հաճախորդների կարիքները: Մենք շարունակելու ենք ջանքեր գործադրել շուկայում արդիական լուծումներ և բարձրորակ ծառայություններ առաջարկելու ուղղությամբ` մեր հաճախորդների վստահությունն արդարացնելու և սպասումները բավարարելու ու գերազանցելու մղումով»,-նշեց Կորպորատիվ ծառայությունների զարգացման և կառավարման վարչության ղեկավար Վարդան Շահբազյանը:
2018 թ.-ի հարցման ադյունքներով ևս HSBC Հայաստանը արժանացել էր «Դրամական միջոցների կառավարման լավագույն բանկը Հայաստանում» մրցանակին:
Բացի այդ, այս տարի, HSBC Բանկը 8-րդ անգամ անընդմեջ ճանաչվեց «Դրամական միջոցների կառավարման լավագույն բանկն աշխարհում»:
Հարցման արդյունքները վկայում են կորպորատիվ ծառայությունների ոլորտում HSBC Բանկի առաջատար դիրքի մասին ինչպես տեղական, այնպես էլ միջազգային շուկաներում:
«Euromoney» ամսագրի հարցումն անցկացվել է 2019թ.-ի մարտի 28-ից մինչև 2019թ.-ի մայիսի 10-ը, որի ընթացքում ստացվել են 25,000 վավեր պատասխաններ:
